ព័ត៌មានអន្ដរជាតិ

លោក ស៊ី ជីនពីង៖ ទោះពិភពលោកវឹកវរ មិត្តភាពចិន-រុស្ស៊ីនៅតែរក្សាតកូនតចៅ

បានផុស

២ years មុន

នៅ

ថ្ងៃពុធ ២៣ តុលា ២០២៤

ដោយ

Chheang

នៅមុខមេដឹកនាំរុស្ស៊ី ប្រធានាធិបតីចិនលោក ស៊ី ជីនពីង បានថ្លែងថា ភាពជាដៃគូរវាងសម្ព័ន្ធមិត្តទាំងពីរនឹងនៅរក្សាដល់គ្រប់ជំនាន់ទៅមុខទៀត បើទោះជាបច្ចប្បន្នពិភពលោកទាំងមូលកំពុងកើតក្ដីវឹកវរយ៉ាងណាក៏ដោយ។

លោក ស៊ី ជីនពីង និងលោក វ៉្លាឌឺមៀរ ពូទីន (រូបភាព៖ Xinhua)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃបើកកិច្ចប្រជុំកំពូល BRICS នៅរុស្ស៊ីកាលពីថ្ងៃទី២២ខែតុលា មេដឹកនាំចិន បាននិយាយថា ស្ថានភាពអន្តរជាតិកំពុងជាប់គាំងពោរពេញដោយភាពច្របូកច្របល់ ប៉ុន្តែការរួមគ្នារវាងក្រុងប៉េកាំង និងក្រុងមូស្គូ គឺជាកម្លាំងមួយបង្កើតបាននូវស្ថិរភាពនៅក្នុងរបត់ដ៏សំខាន់មិនធ្លាប់មាននៅក្នុងរយៈពេល១សតវត្សរ៍មកនេះ។

លោក ស៊ី បានប្រាប់ថា៖ «នៅពេលឥលូវ ពិភពលោកកំពុងឆ្លងកាត់ការផ្លាស់ប្ដូរដែលមិនធ្លាប់កើតឡើងនៅក្នុងរយៈពេល១០០ឆ្នាំ ហើយស្ថានភាពអន្តរជាតិកំពុងមានភាពវឹកវរ។ យ៉ាងណា ខ្ញុំជឿជាក់ខ្លាំងថា មិត្តភាពរវាងចិន និងរុស្ស៊ី នឹងបន្តច្រើនជំនាន់ ហើយទំនួលខុសត្រូវរបស់ប្រទេសដ៏អស្ចារ្យទាំងពីរនេះចំពោះប្រជាជនរបស់ពួកគេ នឹងមិនផ្លាស់ប្ដូរឡើយ»។

ជាការឆ្លើយតប លោក វ៉ា្លឌឺមៀរ ពូទីន ប្រធានាធិបតីរុស្ស៊ី បានឲ្យដឹងថា កិច្ចសហប្រតិបត្តិការរវាងរុស្ស៊ី-ចិននៅក្នុងកិច្ចការពិភពលោក គឺជាកត្តាដ៏សំខាន់មួយដែលអាចនាំមកនូវស្ថិរភាពសម្រាប់គ្រប់គ្នា។ លោក ពូទីន បាននិយាយថា៖ «យើងមានបំណងបង្កើនការសម្របសម្រួលបន្ថែមទៀតលើវេទិកាពហុភាគីទាំងអស់ ដើម្បីធានាសន្តិសុខពិភពលោក និងសណ្តាប់ធ្នាប់ពិភពលោកដែលមានយុត្តិធម៌»។

កាលពីខែឧសភា លោក ស៊ី និងលោក ពូទីន ធ្លាប់បានប្រកាសអំពី «សករាជថ្មី» នៃភាពជាដៃគូរវាងសម្ព័ន្ធមិត្តទាំងពីរ ដែលជាគូប្រជែងដ៏មានឥទ្ធិពលរបស់សហរដ្ឋអាមេរិក។ ទាំងចិន និងរុស្ស៊ី បានចោទប្រកាន់អាមេរិកថាជាអ្នកដឹកនាំសង្គ្រាមត្រជាក់ ដែលសាបព្រួសភាពវឹកវរនៅជុំវិញពិភពលោក។

ដោយឡែក អាមេរិក បានចាត់ទុកចិនថាជាគូប្រជែងដ៏ធំរបស់ខ្លួន ហើយរុស្ស៊ីវិញគឺជាការគំរាមកំហែងដ៏ចម្បងមួយ។ លោក ចូ បៃដិន ប្រធានាធិបតីអាមេរិក ធ្លាប់បានលើកឡើងថា ប្រទេសលទ្ធិប្រជាធិបតេយ្យបច្ចុប្បន្នកំពុងប្រឈមមុខនឹងបញ្ហា ដែលកើតចេញពីប្រទេសអត្តាធិបតេយ្យ រួមមាន ចិន និងរុស្ស៊ី៕

ដោយ៖ ឈាង