ព័ត៌មានអន្ដរជាតិ

លោក បៃដិន ប្រាប់ឲ្យក្រុងកៀវវាយបក បើទ័ពកូរ៉េខាងជើងឈានជើងចូលដីអ៊ុយក្រែន

បានផុស

២ years មុន

នៅ

ថ្ងៃពុធ ៣០ តុលា ២០២៤

ដោយ

Chheang

ប្រធានាធិបតីអាមេរិក លោក ចូ បៃដិន (Joe Biden) បាននិយាយកាលពីថ្ងៃទី២៩ខែតុលាថា អ៊ុយក្រែនគួរតែវាយបកវិញ ប្រសិនបើកងទ័ពកូរ៉េខាងជើងឆ្លងចូលទឹកដីរបស់អ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោក បៃដិន ធ្វើឡើងមួយថ្ងៃបន្ទាប់ពីមន្ទីរបញ្ចកោណបានប្រកាសថា សហរដ្ឋអាមេរិកនឹងមិនដាក់កំហិតថ្មីលើអ៊ុយក្រែនក្នុងការប្រើប្រាស់អាវុធអាមេរិកនោះទេ បើកូរ៉េខាងជើងចូលដៃចូលជើងជាមួយរុស្ស៊ីប្រឆាំងនឹងទីក្រុងកៀវ។ មន្ទីរបញ្ចកោណបានប៉ាន់ប្រមាណថា ទាហានកូរ៉េខាងជើងចំនួន ១ម៉ឺននាក់ ត្រូវបានដាក់ពង្រាយទៅកាន់ភាគខាងកើតប្រទេសរុស្ស៊ី សម្រាប់ការហ្វឹកហ្វឺន។

ក្រៅតែពីការជំរុញឲ្យអ៊ុយក្រែនវាយបក លោក បៃដិន បានឲ្យដឹងទៀតថា លោកពិតជាមានក្ដីព្រួយបារម្ភអំពីវត្តមានកងកម្លាំងកូរ៉េខាងជើងដែលស្ថិតនៅក្នុងតំបន់ Kursk របស់រុស្ស៊ី។

លេខាធិការព័ត៌មានរបស់មន្ទីរបញ្ចកោណ លោក Pat Ryder បានប្រាប់កាលពីថ្ងៃអង្គារថា ទាហានកូរ៉េខាងជើងមួយចំនួនតូចបានស្ថិតនៅក្នុងតំបន់ Kursk រួចហើយ ខណៈទាហានប្រមាណ២ពាន់នាក់ផ្សេងទៀតនឹងទៅដល់ទីនោះក្នុងពេលឆាប់ៗខាងមុខ។

សូមបញ្ជាក់ថា វិមានក្រឹមឡាំងដំបូងឡើយបានច្រានចោលរបាយការណ៍អំពីការដាក់ពង្រាយទាហានកូរ៉េខាងជើងថាជា «ព័ត៌មានក្លែងក្លាយ»។ ប៉ុន្តែលោក ពូទីន កាលពីថ្ងៃព្រហស្បតិ៍សប្ដាហ៍មុនមិនបានបដិសេធថា ទាហានកូរ៉េខាងជើងស្ថិតនៅក្នុងប្រទេសរុស្ស៊ីទេ ហើយបាននិយាយថា វាជារឿងផ្ទាល់ខ្លួនរបស់ទីក្រុងមូស្គូ ក្នុងការអនុវត្តសន្ធិសញ្ញាភាពជាដៃគូជាមួយទីក្រុងព្យុងយ៉ាង៕

ដោយ៖ ឈាង