ធម្មជាតិកាន់តែសាហាវ! គ្រោះមហន្តរាយទឹកជំនន់នៅអេស្ប៉ាញ សម្លាប់មនុស្សជិត ១០០នាក់

តាមការចុះផ្សាយរបស់ BBC នៅថ្ងៃព្រហស្បតិ៍ទី៣១ខែតុលាឆ្នាំ២០២៤, នេះជាលើកដំបូងចាប់តាំងពីឆ្នាំ១៩៧៣មក! ប្រទេសអេស្ប៉ាញ បានជួបគ្រោះមហន្តរាយទឹកជំនន់ធ្ងន់ធ្ងរបំផុត បណ្តាលឲ្យមនុស្សជិត១០០នាក់បាត់បង់ជីវិត ភាគច្រើននៅក្នុងទីក្រុង Valencia។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោះមហន្តរាយនេះបណ្តាលមកពីព្យុះភ្លៀងដែលវាយប្រហារប្រទេសតាំងពីថ្ងៃអង្គារមក ដោយបង្កជាជំនន់រហ័ស ធ្វើឲ្យជន់លិចធំធេង ប្រែក្លាយដងផ្លូវនានាទៅជាទន្លេ។

ក្នុងចំណោមមនុស្សស្លាប់ទាំង៩៥នាក់, នៅទីក្រុងValencia មានច្រើនជាងគេពោលគឺរហូតដល់៩២នាក់ ខណៈ២នាក់នៅតំបន់ Castilla-La Mancha និងម្នាក់នៅ Málaga។

យ៉ាងណាក្តី ក្រុមជួយសង្គ្រោះព្រមានថា តួលេខនេះអាចបន្តកើនឡើងព្រោះ នៅមានមនុស្សច្រើននាក់ទៀត ដែលកំពុងបាត់ខ្លួនរកមិនទាន់ឃើញ។

ពាក់ព័ន្ធគ្រោះមហន្តរាយនេះដែរ លោកនាយករដ្ឋមន្ត្រី Pedro Sanchez បានប្រកាសកាន់ទុក្ខថ្នាក់ជាតិរយៈពេលបីថ្ងៃ ហើយលោកបានអំពាវនាវឲ្យប្រជាជនប្រុងប្រយ័ត្ន និងសន្យាដោះស្រាយបញ្ហាក្នុងគ្រាមានទុក្ខលំបាកនេះឲ្យបានឆាប់ជាទីបំផុត។

ទោះបីជាយ៉ាងណាក៏ដោយ រដ្ឋាភិបាលអេស្ប៉ាញក៏កំពុងប្រឈមមុខនឹងការចោទប្រកាន់ផងដែរពាក់ព័ន្ធគ្រោះមហន្តរាយនេះ ជាពិសេសពីសំណាក់ប្រជាជនតែម្តង ដែលស្តីបន្ទោសថា ការដែលតួលេខមនុស្សស្លាប់ហក់ឡើងខ្ពស់បែបនេះ គឺបណ្តាលមកពីរដ្ឋាភិបាលអសមត្ថភាព និងធ្វើសកម្មភាពយឺតពេក តួយ៉ាងដូចជាការព្រមានមិនទាន់ពេល ឬមិនព្រមជម្លៀសពលរដ្ឋទៅទីទួលសុវត្ថិភាពជាដើម។

សូមបញ្ជាក់ថា គ្មានអ្វីចម្លែកឡើយដែលរាល់ឆ្នាំឲ្យតែដល់រដូវនេះ អេស្ប៉ាញតែងជួបព្យុះជានិច្ច ប៉ុន្តែឆ្នាំនេះ គ្រោះធម្មជាតិហាក់ធ្ងន់ធ្ងរខ្លាំង ខណៈក្រុមអ្នកជំនាញបានបញ្ជាក់ច្បាស់ៗថា រឿងទាំងអស់គឺបណ្តាលមកពីបម្រែបម្រួលអាកាសធាតុ៕

អត្ថបទ៖ សុខ សុវណ្ណ

ចុចអាន៖ ព្យុះភ្លៀងធ្ងន់ធ្ងរ ផ្តាច់ជីវិតមនុស្ស ៥១នាក់ នៅអេស្ប៉ាញ