ព័ត៌មានអន្ដរជាតិ

អាមេរិក សម្ពោធមូលដ្ឋានមីស៊ីលថ្មីនៅប៉ូឡូញ មុនពេលលោក ត្រាំ ឡើងកាន់តំណែង

បានផុស

២ years មុន

នៅ

ថ្ងៃព្រហស្បតិ៍ ១៤ វិច្ឆិកា ២០២៤

ដោយ

Chheang

សហរដ្ឋអាមេរិក បានបើកសម្ពោធជាផ្លូវការនូវមូលដ្ឋានការពារដែនអាកាសថ្មីមួយនៅភាគខាងជើងប្រទេសប៉ូឡូញកាលពីថ្ងៃទី១៣ខែវិច្ឆិកា។ ការសម្ពោធនេះ ធ្វើឡើងចំពេលដែលប៉ូឡូញកំពុងបង្កើនទំនុកចិត្តដល់ពលរដ្ឋខ្លួនថា អង្គការណាតូ (NATO) អាចធានាសន្តិសុខដល់ពួកគេ ទោះបីមានក្ដីព្រួយបារម្ភបន្ទាប់ពីជ័យជម្នះក្នុងការបោះឆ្នោតប្រធានាធិបតីអាមេរិករបស់លោក ដូណាល់ ត្រាំ ក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មូលដ្ឋានមីស៊ីលថ្មីរបស់អាមេរិកនេះ ត្រូវគេឲ្យឈ្មោះថា «Aegis Ashore» មានទីតាំងនៅទីក្រុង Redzikowo ក្បែរឆ្នេរបាល់ទិក ដែលបើកដំណើរការសាងសង់តាំងពីទសវត្សរ៍ឆ្នាំ២០០០មកម៉្លេះ ហើយមានសមត្ថភាពស្ទាក់ចាប់មីស៊ីលរយៈចម្ងាយខ្លី និងមធ្យម។

ប៉ូឡូញ និយាយថា វាជានិមិត្តរូបនៃការពិតដែលថា សម្ព័ន្ធភាពយោធារបស់ខ្លួនជាមួយទីក្រុងវ៉ាស៊ីនតោននៅតែរឹងមាំមិនថាអ្នកណានៅក្នុងសេតវិមាននោះទេ។

រដ្ឋមន្ត្រីការបរទេសប៉ូឡូញ លោក Radoslaw Sikorski បាននិយាយនៅក្នុងវីដេអូបង្ហោះនៅលើបណ្ដាញសង្គម X ថា៖ «វាចំណាយពេលមួយរយៈ ប៉ុន្តែការសាងសង់នេះបង្ហាញឲ្យឃើញពីដំណោះស្រាយភូមិសាស្ត្ររបស់សហរដ្ឋអាមេរិក»។

សូមបញ្ជាក់ថា ការរិះគន់កន្លងមករបស់លោក ត្រាំ បានធ្វើឲ្យសមាជិកណាតូមួយចំនួនមានការងឿងឆ្ងល់ ខណៈដែលលោកបានប្តេជ្ញាថា ក្រោមការដឹកនាំរបស់លោក សហរដ្ឋអាមេរិកនឹងមិនការពារប្រទេសណាដែលចំណាយថវិកាមិនគ្រប់គ្រាន់លើវិស័យការពារជាតិនោះទេ។

យ៉ាងណាមិញ រដ្ឋាភិបាលប៉ូឡូញ បានប្រាប់ថា ខ្លួនមិនគួរមានអ្វីដែលត្រូវភ័យខ្លាចនោះទេ ដោយសារការចំណាយលើវិស័យការពារជាតិរបស់ប៉ូឡូញ សមស្របទៅនឹងទំហំសេដ្ឋកិច្ចរបស់ខ្លួនរួចហើយ៕

ដោយ៖ ឈាង