មនុស្សជាង ២០០ លាននាក់នៅទូទាំងពិភពលោកទទួលការចាក់វ៉ាក់សាំងហោចណាស់ មួយដូស

ក្រុមអ្នកស្រាវជ្រាវនៅក្នុងប្រទេសអង់គ្លេសបាននិយាយថា ប្រជាជនជាង ២០០ លាននាក់នៅទូទាំងពិភពលោកបានទទួលការចាក់វ៉ាក់សាំងការពារជំងឺកូវីដ ១៩ យ៉ាងតិចមួយដូស ។

តួលេខនេះគិតត្រឹមថ្ងៃព្រហស្បតិ៍ត្រូវបានផ្តល់ដោយគេហទំព័រ Our World in Data ដែលមានមូលដ្ឋាននៅសាកលវិទ្យាល័យ Oxford ។

គេហទំព័រនិយាយថា មនុស្ស ២០២,៥១០.០០០ នាក់បានទទួលការចាក់វ៉ាក់សាំងយ៉ាងហោចណាស់មួយដូស ។ បើគិតតាមប្រទេស សហរដ្ឋអាមេរិកមានចំនួនច្រើនជាងគេគឺ ៦៤.០៧ លាននាក់ ។ បន្ទាប់មកគឺចក្រភពអង់គ្លេសដែលមានចំនួន ២៣.០៥ លាននាក់ ឥណ្ឌា ២១.៤៤ លាននាក់ ប្រេស៊ីល ៨.០៩ លាននាក់ និងទួរគីមាន ៧.៨១ លាននាក់ ។

ទាក់ទងនឹងចំនួនប្រជាជនសរុបដែលបានទទួលការចាក់វ៉ាក់សាំងយ៉ាងហោចណាស់មួយដូសវិញ អ៊ីស្រាអែលនាំមុខគេគឺ ៥៩ ភាគរយ ។ បន្ទាប់មកគឺ អារ៉ាប់រួមដែលមាន ៣៥.២ ភាគរយ ចក្រភពអង់គ្លេស ៣៤ ភាគរយ ឈីលី ២៤.២ ភាគរយ និងសហរដ្ឋអាមេរិកមាន ១៩.២ ភាគរយ ។

របាយការណ៍និយាយថា មានតែ ២.៦ ភាគរយនៃប្រជាជនពិភពលោកប៉ុណ្ណោះបានទទួលការចាក់វ៉ាក់សាំងយ៉ាងហោចណាស់មួយដូស ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ដំណឹង​​ល្អ​​ WHO​ បញ្ជាក់​​រឿង​​​វ៉ាក់​សាំង​​ AstraZeneca​ ដែល​​ប្រទេស​មួយ​ចំនួន​បារម្ភ

ចុចអាន ៖ វ៉ាក់សាំងកូវីដចាក់តែមួយដូស ទទួលបានភ្លើងខៀវសម្រាប់ការប្រើប្រាស់ជាបន្ទាន់ពី WHO