ព័ត៌មានអន្ដរជាតិ

ដំណឹងល្អ WHO បញ្ជាក់រឿងវ៉ាក់សាំង AstraZeneca ដែលប្រទេសមួយចំនួនបារម្ភ

បានផុស

៥ years មុន

នៅ

ថ្ងៃសៅរ៍ ១៣ មីនា ២០២១

ដោយ

អង្គការសុខភាពពិភពលោក (WHO) បាននិយាយនៅថ្ងៃសុក្រម្សិលមិញថា គ្មានហេតុផលណាដែលឈប់ប្រើវ៉ាក់សាំងបង្ការកូវីដ-១៩ AstraZeneca ឡើយ បន្ទាប់ពីប្រទេសមួយចំនួនរាប់ទាំងប្រទេសថៃផងនោះបានផ្អាកដំណើរការវ៉ាក់សាំងនេះ ដោយសារភ័យខ្លាចរឿងការកកស្ទះឈាម។

WHO ដែលបាននិយាយពីគណកម្មាធិការប្រឹក្សាថ្នាំបង្ការរបស់ខ្លួនបានពិនិត្យពីទិន្នន័យសុវត្ថិភាពបានសង្កត់ធ្ងន់ថា វាគ្មានហេតុផលអ្វីដែលអាចកើតមានឡើងរវាងវ៉ាក់សាំង និងការកកស្ទះឈាមនោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសុខភាពអង្គការសហប្រជាជាតិក៏បាននិយាយដែរថា បន្ទាប់ពីចាក់អស់ជាង២៦០លានដូសទូទាំងពិភពលោក មិនទាន់មានការស្លាប់ណាម្នាក់ដែលត្រូវបានសន្និដ្ឋានថា ស្លាប់ដោយសារការចាក់វ៉ាក់សាំងនេះផ្ទាល់នោះទេ។

ប្រទេសដាណឺម៉ាក ន័រវែស និងអ៉ិស្លង់បានផ្អាកការប្រើវ៉ាក់សាំង AstraZeneca ដោយសារប្រុងប្រយ័ត្ន បន្ទាប់ពីព័ត៌មានដាច់ដោយឡែកដែលអ្នកទទួលវ៉ាក់សាំងបានវិវត្តទៅជាកកស្ទះឈាម។

ប្រទេសអ៉ីតាលី និងអូទ្រីសបានហាមការប្រើវ៉ាក់សាំង AstraZeneca ដាច់ដោយឡែកពីគ្នា ហើយប្រទេសថៃ និងប៊ុលហ្គារីបាននិយាយថា ពួកគេបានពន្យារដំណើរការវ៉ាក់សាំងប្រភេទនេះដែរ។

អាជ្ញាធរសុខាភិបាលជាច្រើនជុំវិញពិភពលោកបានទទួចពីវ៉ាក់សាំងប្រភេទនេះមានសុវត្ថិភាព ក្នុងនោះមានទាំងទីភ្នាក់ងារឱសថសាស្ត្រអឺរ៉ុប (EMA) និង WHO។

អ្នកនាំពាក្យ WHO លោកស្រីវេជ្ជបណ្ឌិត Margaret Harris បានប្រាប់អ្នកសារព័ត៌មានក្នុងសន្និសីទខ្លីមួយនៅទីក្រុងហ្ស៊ឺណែវថា ៖«AstraZeneca ជាវ៉ាក់សាំងល្អមួយ ដូចវ៉ាក់សាំងដទៃទៀតដែលកំពុងប្រើប្រាស់ដែរ»។

លោកស្រីវេជ្ជណ្ឌិតបន្ថែមថា ៖«មែនហើយ យើងគួរបន្តប្រើវ៉ាក់សាំង AstraZeneca» និងសង្កត់ធ្ងន់ថា ការព្រួយបារម្ភណាមួយជុំវិញសុវត្ថិភាពគួរតែត្រូវបានស៊ើបអង្កេត។

លោកស្រីថា ៖«យើងតែងតែត្រូវតែប្រាកដច្បាស់ថា យើងស្វែងរកសញ្ញាសុវត្ថិភាពណាមួយនៅពេលយើងចាក់វ៉ាក់សាំង ហើយយើងត្រូវតែព្រួតពិនិត្យពួកវា។ ប៉ុន្តែមិនមានការចង្អុលបង្ហាញណាមួយដែលមិនត្រូវឲ្យប្រើនោះទេ»។

EMA បាននិយាយកាលពីថ្ងៃព្រហស្បតិ៍ថា មាន៣០ករណីនៃព្រឹត្តិការណ៍ដែលគេហៅថា ការកកស្ទះឈាម ក្នុងចំណោមមនុស្ស៥លាននាក់ដែលទទួលការចាក់វ៉ាក់សាំងនេះនៅទ្វីបអឺរ៉ុប។

និយតករឱសថសាស្ត្រអឺរ៉ុបនិយាយថា ប៉ុន្តែប្រទេសអឺរ៉ុបនៅតែបន្តប្រើវ៉ាក់សាំងនេះ។

លោកស្រី Harris បាននិយាយថា នៅពេលប្រទេសមួយចំនួនតូច ដើម្បីប្រុងប្រយ័ត្ន បានផ្អាកការប្រើប្រាស់វ៉ាក់សាំង AstraZeneca ដែលបានចែកចាយនៅអឺរ៉ុប ដោយផ្អែកតាមព័ត៌មានពីការករណីកកស្ទះឈាម ទំនាក់ទំនងហេតុនិងផលជាក់លាក់ មិនមានបង្ហាញឡើយ»។

លោកស្រីថា ៖«ការចាក់វ៉ាក់សាំងប្រឆាំងកូវីដ-១៩មិនបានកាត់បន្ថយនៃការស្លាប់ដោយហេតុផលផ្សេងបានទេ»។

«កាលពីថ្ងៃទី៩ ខែមីនា វ៉ាក់សាំងបង្ការកូវីដ-១៩ជាង២៦៨លានដូសត្រូវបានចាក់ចាប់តាំងពីការចាប់ផ្តើមរីករាលដាលជំងឺនេះ»។

«មិនមានហេតុផលនៃការស្លាប់ណាមួយដែលត្រូវបានរកឃើញបណ្តាលមកពីការចាក់វ៉ាក់សាំងកូវីដ-១៩ទេរហូតដល់ពេលនេះ»។

លោកស្រីវេជ្ជបណ្ឌិត Harris មានប្រសាសន៍ថា គណកម្មាធិការប្រឹក្សាស្តីពីសុវត្ថិភាពវ៉ាក់សាំងរបស់ WHO ដែលហោចណាស់ជួបគ្នារាល់ពីរសប្តាហ៍ម្តងបានពិនិត្យឡើងវិញនូវរបាយការណ៍សុវត្ថិភាពណាមួយដែលកើតមានជាប្រព័ន្ធ។

លោកស្រីថា ៖«ពួកគេបច្ចុប្បន្ននេះកំពុងវាយតម្លៃរបាយការណ៍ពីវ៉ាក់សាំង AstraZeneca»។

ក្រុមហ៊ុនវ៉ាក់សាំង AstraZeneca-Oxford Covid ជាផ្នែកមួយក្នុងចំណោមតែ២ដែលត្រូវបានអង្គការសុខភាពពិភពលោក (WHO) បានបោះត្រាយល់ព្រម។ អង្គការនេះក៏ផ្តល់ការចុះបញ្ជីប្រើប្រាស់ជាបន្ទាន់នូវវ៉ាក់សាំង AstraZeneca កំពុងត្រូវបានផលិតនៅក្នុងប្រទេសឥណ្ឌា និងកូរ៉េខាងត្បូង៕

ប្រែសម្រួល៖ វីរបុត្រ
ប្រភព៖ Bangkokpost