ព័ត៌មានអន្ដរជាតិ

ជនជាតិប៉ាឡេស្ទីនហោចណាស់២៦នាក់បាត់បង់ជីវិតក្នុងថ្ងៃឆ្លងឆ្នាំដោយសារអ៊ីស្រាអែល

បានផុស

៣ ខែ មុន

នៅ

ថ្ងៃព្រហស្បតិ៍ ២ មករា ២០២៥

ដោយ

នៅថ្ងៃឆ្លងចាស់ឈានចូលឆ្នាំថ្មី២០២៥ អ៊៊ីស្រាអែលវាយប្រហារលើជំរំបណ្តោះអាសន្នរបស់ជនភៀសខ្លួនដែលបានជន់លិច បន្ទាប់ពីមានភ្លៀងធ្លាក់ខ្លាំងជាច្រើនថ្ងៃ ដោយសម្លាប់ជនជាតិប៉ាឡេស្ទីនយ៉ាងតិច២៦នាក់ រួមទាំងកុមារនៅទូទាំងតំបន់ហ្គាហ្សា។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២ខែមករានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារនេះត្រូវបានរាយការណ៍កាលពីថ្ងៃពុធនៅ Jabalia នៅភាគខាងជើងហ្គាហ្សា ជំរំជនភៀសខ្លួន Bureij និងទីក្រុងកណ្ដាលទីក្រុងហ្គាហ្សា និងទីក្រុង Khan Younis ភាគខាងត្បូង។

ក្រសួងសុខាភិបាលនៅតំបន់ហ្គាហ្សា បាននិយាយថា កុមារបួននាក់និងស្ត្រីម្នាក់ស្ថិតក្នុងចំណោមអ្នកស្លាប់។ យ៉ាងហោចណាស់មានជនជាតិប៉ាឡេស្ទីន១០នាក់ផ្សេងទៀតបានបាត់ខ្លួន ហើយត្រូវបានគេជឿថាស្ថិតនៅក្រោមគំនរបាក់បែក។

បើតាមអ្នកនាំពាក្យរបស់ទីភ្នាក់ងារការពារជនស៊ីវិលហ្គាហ្សា លោក Mahmoud Basal បាននិយាយថា៖«មនុស្ស ១៥នាក់ត្រូវបានសម្លាប់ ហើយជាង២០នាក់បានរងរបួសនៅក្នុងការសម្លាប់មួយនៅពាក់កណ្តាលអធ្រាត្រនៅក្នុងផ្ទះមួយដែលជនភៀសខ្លួនកំពុងរស់នៅក្នុងទីក្រុង Jabalia»។

ស្របពេលជាមួយគ្នានេះភ្លៀងធ្លាក់ខ្លាំងជាច្រើនថ្ងៃបានជន់លិចជម្រកបណ្ដោះអាសន្នរាប់រយកន្លែងនៅទូទាំងតំបន់ជុំវិញ ដែលបង្កឱ្យមានទុក្ខវេទនាកាន់តែខ្លាំងឡើងលើជនជាតិប៉ាឡេស្ទីនដែលត្រូវបានផ្លាស់ទីលំនៅដោយបង្ខំ ខណៈដែលអ៊ីស្រាអែលបន្តរឹតបន្តឹងការចូលនៃជំនួយមនុស្សធម៌។ យ៉ាងហោចណាស់ទារកចំនួនប្រាំមួយនាក់បានស្លាប់ដោយសារជំងឺផ្តាសាយក្នុងរយៈពេលប៉ុន្មានថ្ងៃថ្មីៗនេះ។

ពេញមួយការវាយលុករយៈពេល១៥ ខែរបស់អ៊ីស្រាអែលទៅលើតំបន់ហ្គាហ្សា កងកម្លាំងអ៊ីស្រាអែលបានឡោមព័ទ្ធ និងវាយប្រហារជាប្រចាំនូវកន្លែងព្យាបាលអ្នកជំងឺ និងក្រុមគ្រួសារជនភៀសខ្លួន។ កាលពីសប្តាហ៍មុន កងកម្លាំងអ៊ីស្រាអែលបានវាយឆ្មក់ចូលមន្ទីរពេទ្យ Kamal Adwan ភាគខាងជើងហ្គាហ្សា ដោយបង្ខំឱ្យជម្លៀសបុគ្គលិកពេទ្យ និងអ្នកជំងឺចេញពីកន្លែងនោះ ហើយចាប់ខ្លួនប្រធានន្ទីរពេទ្យគឺលោកវេជ្ជបណ្ឌិត Hussam Abu Safia។

ការបន្តវាយលុករបស់អ៊ីស្រាអែលលើតំបន់ហ្គាហ្សាបាននាំឲ្យមានការថ្កោលទោសជាអន្តរជាតិកាន់តែខ្លាំងឡើង ដោយមន្ត្រី និងក្រុមសិទ្ធិមនុស្សបានចាត់ទុកការវាយប្រហារ និងការទប់ស្កាត់ការផ្តល់ជំនួយថាជាអំពើប្រល័យពូជសាសន៍។

កាលពីខែវិច្ឆិកា តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួននាយករដ្ឋមន្ត្រីអ៊ីស្រាអែលលោក Benjamin Netanyahu និងអតីតរដ្ឋមន្ត្រីការពារជាតិលោក Yoav Gallant ពីបទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិនៅក្នុងតំបន់ហ្គាហ្សា។ អ៊ីស្រាអែលក៏ប្រឈមនឹងសំណុំរឿងប្រល័យពូជសាសន៍នៅតុលាការយុត្តិធម៌អន្តរជាតិសម្រាប់សង្គ្រាមដ៏សាហាវរបស់ខ្លួននៅតំបន់ហ្គាហ្សាផងដែរ៕