ព័ត៌មានអន្ដរជាតិ

អគ្គរដ្ឋអាជ្ញា ICC ស្វែងរកដីកាចាប់ខ្លួនមេដឹកនាំតាលីបង់ពីរនាក់នៅអាហ្វហ្គានីស្ថាន

បានផុស

១ year មុន

នៅ

ថ្ងៃសុក្រ ២៤ មករា ២០២៥

ដោយ

អគ្គរដ្ឋអាជ្ញានៃតុលាការឧក្រិដ្ឋកម្មអន្តរជាតិ (ICC) បានដាក់ពាក្យសុំដីកាចាប់ខ្លួនមេដឹកនាំតាលីបង់ពីរនាក់នៅក្នុងប្រទេសអាហ្វហ្គានីស្ថាន រួមទាំងមេដឹកនាំកំពូលផ្នែកសាសនា Haibatullah Akhundzada ដោយចោទប្រកាន់ពួកគេពីបទធ្វើទុក្ខបុកម្នេញលើស្ត្រីនិងកុមារី។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍ដែលចេញដោយការិយាល័យរដ្ឋអាជ្ញាលោក Karim Khan បាននិយាយថា អ្នកស៊ើបអង្កេតបានរកឃើញហេតុផលសមស្រប ថា លោក Akhundzada ជា មេដឹកនាំកំពូលនៃឥស្លាមអេមីរ៉ាតអាហ្វហ្គានីស្ថាននិង លោក Abdul Hakim Haqqani ជាប្រធានផ្នែកយុត្តិធម៌អាហ្វហ្គានីស្ថានតាំងពីឆ្នាំ ២០២១ ត្រូវតែទទួលបន្ទុកព្រហ្មទណ្ឌចំពោះឧក្រិដ្ឋកម្មប្រឆាំងមនុស្សជាតិនៃការធ្វើទុក្ខបុកម្នេញលើហេតុផលយេនឌ័រ។ ពួកគេទាំងពីរទទួលខុសត្រូវព្រហ្មទណ្ឌចំពោះការបៀតបៀនក្មេងស្រី និងស្ត្រីអាហ្វហ្គានីស្ថាន។

សេចក្តីថ្លែងការណ៍នោះ ថា ការធ្វើទុក្ខបុកម្នេញនេះបានកើតឡើងនៅទូទាំងប្រទេសអាហ្វហ្គានីស្ថាន ដោយយ៉ាងហោចណាស់ចាប់ពីថ្ងៃទី១៥ខែសីហា ឆ្នាំ ២០២១ ដែលជាថ្ងៃដែលកងកម្លាំងតាលីបង់បានកាន់កាប់រដ្ឋធានីកាប៊ុល រហូតមកដល់សព្វថ្ងៃនេះ។ ចាប់តាំងពីក្រុមអ៊ិស្លាមនិយមបានវិលត្រឡប់មកកាន់អំណាចវិញនៅឆ្នាំ២០២១ វាបានបិទសិទ្ធិស្ត្រី រួមទាំងការកំណត់ចំពោះការសិក្សា ការងារ និងឯករាជ្យភាពទូទៅក្នុងជីវិតប្រចាំថ្ងៃរបស់ស្រ្តី។

ជាមួយគ្នានេះ ការបកស្រាយរបស់ពួកតាលីបង់នៃច្បាប់អ៊ីស្លាម sharia មិនអាចជាហេតុផលសម្រាប់ការរំលោភសិទ្ធិមនុស្ស ឬឧក្រិដ្ឋកម្មនោះទេ ខណៈស្ត្រី និងក្មេងស្រីអាហ្វហ្គានីស្ថាន ក៏ដូចជាសហគមន៍ LGBTQI+ កំពុងប្រឈមមុខនឹងការបៀតបៀនដែលមិនធ្លាប់មានពីមុនមក និងកំពុងបន្តអនុវត្តដោយពួកតាលីបង់។

វាជាលើកទីមួយហើយដែលរដ្ឋអាជ្ញា ICC បានស្វែងរកដីកាជាសាធារណៈនៅក្នុងការស៊ើបអង្កេតរបស់ពួកគេលើឧក្រិដ្ឋកម្មសង្គ្រាមនៅក្នុងប្រទេសអាហ្វហ្គានីស្ថាន។

យ៉ាងណាមិញតុលាការឧក្រិដ្ឋកម្មអន្តរជាតិ ក៏កំពុងស្ថិតនៅក្នុងវិបត្តិផងដែរដោយទីក្រុងមូស្គូបានវាយបកតុលាការ ICC វិញចំពោះដីកាឆ្នាំ ២០២៣ ប្រឆាំងនឹងប្រធានាធិបតីរុស្ស៊ី លោក វ្ល៉ាឌីមៀ ពូទីន ដោយការចេញដីការចាប់ខ្លួនលោក Khan វិញ។

ទោះបីជាមានដីកាចាប់ខ្លួនកម្រិតខ្ពស់នាពេលថ្មីៗនេះក៏ដោយ ក៏បន្ទប់សវនាការនៅទីក្រុងឡាអេគឺស្ទើរតែទទេ ហើយលោក Khan កំពុងស្ថិតនៅក្រោមការស៊ើបអង្កេតលើបទចោទប្រកាន់ពីបទប្រព្រឹត្តិខុសផ្លូវភេទនៅកន្លែងធ្វើការ ដែលលោកបានបដិសេធ។

គួរបញ្ជាក់ថាICC មិនមានកម្លាំងប៉ូលិសទេ ហើយពឹងផ្អែកលើរដ្ឋសមាជិកចំនួន ១២៥ របស់ខ្លួនក្នុងការចាប់ខ្លួន។ ប៉ុន្តែប្រទេសជាសមាជិកអឺរ៉ុបមួយចំនួនបានបង្ហាញការសង្ស័យអំពីការឃុំខ្លួនលោក Netanyahu ហើយក្នុងសប្តាហ៍នេះ ប្រទេសអ៊ីតាលីបានចាប់ខ្លួនជនសង្ស័យ ICC ម្នាក់ ប៉ុន្តែបរាជ័យក្នុងការប្រគល់បុគ្គលនោះ៕