អ្នក​ជិះ​ស្គីទឹកកក​អាមេរិក និង​រុស្ស៊ី​ស្លាប់​ក្នុងហេតុការណ៍យ​​ន្តហោះ​បុកគ្នា​

អ្នកជិះស្គីកំពូលមកពីសហរដ្ឋអាមេរិកនិងរុស្សី ស្ថិត​ក្នុង​ចំណោម​​អ្នកដំណើរ​៦០​នាក់​ដែល​ជិះ​យន្តហោះ​របស់ក្រុមហ៊ុនអាកាសចរណ៍អាមេរិច ដែលបានធ្លាក់កាលពីយប់ថ្ងៃពុធ ចូលទៅក្នុងទន្លេ Potomac ក្នុងទីក្រុង Washington, DC បន្ទាប់ពីបានបុកជាមួយឧទ្ធម្ភាគចក្រយោធាដែលជាសោកនាដកម្មដ៏គួរឱ្យរន្ធត់ និងមានសោកស្ដាយជុំវិញពិភពលោក។ នេះបើយោងតាមការចេញផ្សាយរបស់សារព័ត៌មាន ​CBS នៅថ្ងៃទី៣១ខែមករានេះ។

U.S. Figure Skating ដែលជាអង្គការដែលបម្រើការជាស្ថាប័នគ្រប់គ្រងកីឡាជាតិ បានបញ្ជាក់ថា អ្នកដំណើររបស់យន្តហោះនេះ រួមមានសមាជិកកីឡាករនិងកីឡាការិនីរបស់ខ្លួនជាច្រើននាក់ ដែលបានចូលរួមជំរុំហ្វឹកហាត់ដ៏មានកិត្យានុភាពសម្រាប់អ្នកជិះស្គីថ្មីថ្មោង និងកម្រិតមធ្យមនៅ Wichita រដ្ឋ Kansas ជាកន្លែងដែលជើងហោះហើរបានហោះឡើង។

U.S. Figure Skating បាននិយាយនៅក្នុងសេចក្តីថ្លែងការណ៍មួយថា៖ «អត្តពលិក គ្រូបង្វឹក និងសមាជិកគ្រួសារទាំងនេះបានត្រលប់មកផ្ទះវិញពីជំរុំអភិវឌ្ឍន៍ជាតិដែលធ្វើឡើងដោយភ្ជាប់ជាមួយ US Figure Skating Championships នៅទីក្រុង Wichita រដ្ឋ Kansas បានបាត់បង់ជីវិតនៅក្នុងហេតុការណ៍ធ្លាក់យន្តហោះនេះ»។

CBS News Boston បានរាយការណ៍ថា គ្មានអ្នកជិះស្គីជនជាតិអាមេរិក គ្រូបង្វឹក ឬសមាជិកគ្រួសាររបស់ពួកគេត្រូវបានគេកំណត់អត្តសញ្ញាណជាផ្លូវការនោះទេ ប៉ុន្តែក្លឹប Skating Club of Boston បាននិយាយថា អ្នកជិះស្គីវ័យក្មេងពីរនាក់ ម្តាយ និងគ្រូបង្វឹកពីរនាក់គឺស្ថិតក្នុងចំណោមអ្នកដំណើរ។ នៅក្នុងសេចក្តីថ្លែងការណ៍មួយ លោក Doug Zeghibe ដែលជានាយកប្រតិបត្តិ និងជានាយកប្រតិបត្តិរបស់ក្លឹបជិះស្គីបានកំណត់អត្តសញ្ញាណសមាជិកក្លឹបនៅលើយន្តហោះដូចជា Jinna Han, Jin Han, Spencer Lane, Christine Lane, Vadim Naumov និង Evgenia Shishkova ។

ក្លឹបបាននិយាយថា Shishkova និង Naumov គឺជាអ្នកជិះស្គីលើទឹកកកដែលមានដើមកំណើតរុស្ស៊ី និងជាអតីតជើងឯកពិភពលោក ដែលបានបង្វឹកនៅក្លឹប Skating Club of Boston ។ ជាមួយគ្នានេះទីភ្នាក់ងារព័ត៌មានរដ្ឋ TASS ក៏បានរាយការណ៍ដែរថា ពួកគេនៅលើយន្តហោះរួមជាមួយពលរដ្ឋរុស្ស៊ីផ្សេងទៀត។

គួរបញ្ជាក់ថាយន្តហោះ American Eagle Flight No. 5342 ដែលជាយន្តហោះដឹកអ្នកដំណើរដែលដំណើរការដោយក្រុមហ៊ុនអាកាសចរណ៍ PSA និងគ្រប់គ្រងដោយជនជាតិអាមេរិក បានបុកគ្នានៅកណ្តាលអាកាសជាមួយឧទ្ធម្ភាគចក្រ Black Hawk នៅជិតកន្លែងចុះចតដែលគ្រោងទុកនៅអាកាសយានដ្ឋានជាតិ Reagan បណ្តាលឱ្យទាំងយន្តហោះនិង ឧទ្ធម្ភាគចក្រធ្លាក់ចូលទៅក្នុងទន្លេ Potomac ខាងក្រោម។

ក្រុមមន្ត្រីបាននិយាយថា យន្តហោះនេះបានដឹកអ្នកដំណើរ ៦០នាក់ និងសមាជិកនាវិក ៤ នាក់ រួមទាំងទាហាន៣នាក់បានជិះនៅលើឧទ្ធម្ភាគចក្រដែលមានមូលដ្ឋាននៅ Fort Belvoir ក្នុងរដ្ឋ Virginia ឧទ្ធម្ភាគចក្រនេះកំពុងហោះហើរហ្វឹកហាត់មុនេពេលបុកជាមួយយន្តហោះ។

យ៉ាងហោចណាស់សាកសពចំនួន ២៨ត្រូវបានគេរកឃើញពីទន្លេនៅម៉ោង ៨ព្រឹកថ្ងៃព្រហស្បតិ៍ ខណៈការស៊ើបអង្កេតលើការបុកគ្នានេះកំពុងដំណើរការ។

ហេតុការណ៍បានរម្លឹកទៅដល់ឧបទ្ទវហេតុដ៏ធ្ងន់ធ្ងរមួយទៀត គឺហេតុការណ៍ធ្លាក់យន្តហោះក្នុងឆ្នាំ ១៩៦១ ដែលក្រុមអ្នកជិះស្គីលើទឹកកកអាមេរិក ១៨នាក់បានស្លាប់នៅពេលធ្វើដំណើរទៅកាន់ការប្រកួតជើងឯកពិភពលោកនៅទីក្រុងPrague សាធារណរដ្ឋឆេក៕

អត្ថបទ៖ ប៊ុន សុភាព