ព័ត៌មានអន្ដរជាតិ

ស៊ុយអែតជួបរឿងអកុសលទៀតហើយ ព្រោះការបាញ់ប្រហារក្នុងសាលារៀនសម្លាប់មនុស្ស១០នាក់

បានផុស

១ year មុន

នៅ

ថ្ងៃពុធ ៥ កុម្ភៈ ២០២៥

ដោយ

មនុស្សយ៉ាងតិច១០នាក់ត្រូវបានសម្លាប់រួមទាំងជនសង្ស័យជាខ្មាន់កាំភ្លើងផង នៅក្នុងការបាញ់ប្រហារនៅមជ្ឈមណ្ឌលអប់រំមួយនៅភាគខាងលិចប្រទេសស៊ុយអែត។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី៥ខែកុម្ភៈនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយករដ្ឋមន្ត្រីស៊ុយអែត លោក Ulf Kristersson បានពណ៌នាអំពីការវាយប្រហារនៅសាលា Risbergska ក្នុងទីក្រុង Orebro ចម្ងាយ២០០គីឡូម៉ែត្រភាគខាងលិចនៃរដ្ឋធានីស្តុកខុម (Stockholm) ថាវាជា«ការបាញ់ប្រហារដ៏ធំបំផុតក្នុងប្រវត្តិសាស្ត្រស៊ុយអែត»។

ការបាញ់ប្រហារដ៏ធំនេះបានកើតឡើងកាលពីយប់ថ្ងៃអង្គារវេលាម៉ោង ១២:៣៣ នាទីនៅមជ្ឈមណ្ឌលអប់រំមនុស្សពេញវ័យដែលបណ្ដុះបណ្ដាលអ្នកដែលមិនបានបញ្ចប់ការសិក្សានៅថ្នាក់បឋមសិក្សាឬអនុវិទ្យាល័យក្នុងទីក្រុង Orebro។

ប៉ូលិសបានរាយការណ៍បឋមថា មនុស្សយ៉ាងតិចប្រាំនាក់ត្រូវបានបាញ់សម្លាប់។ ប៉ុន្តែនៅក្នុងការធ្វើបច្ចុប្បន្នភាព (update) ប៉ុន្មានម៉ោងក្រោយមក មានមនុស្សប្រហែល១០នាក់ត្រូវបានសម្លាប់ តែមិនបានផ្តល់ចំនួនច្បាស់លាស់នោះទេ ហើយជនរងគ្រោះមិនត្រូវបានស្គាល់អត្តសញ្ញាណភ្លាមៗដែរ។

អ្នកនាំពាក្យមន្ទីរពេទ្យ បាននិយាយថា ក្នុងចំណោមអ្នករបួស៥នាក់បានទទួលការព្យាបាលនៅមន្ទីរពេទ្យសាកលវិទ្យាល័យ Orebro ម្នាក់បានរងរបួសស្រាលខណៈដែល៤នាក់ត្រូវបានវះកាត់។

ក្នុងសេចក្តីថ្លែងការណ៍របស់ប៉ូលិសបានឲ្យដឹងថា ខ្មាន់កាំភ្លើងស្ថិតក្នុងចំណោមអ្នកស្លាប់និងបានធ្វើសកម្មភាពតែម្នាក់ឯង។ ករណីនេះមិនមានការសង្ស័យពាក់ព័ន្ធនឹង «អំពើភេរវកម្ម» នោះទេ ហើយឧប្បត្តិហេតុនេះស្ថិតនៅក្នុងបទល្មើសប៉ុនប៉ងមនុស្សឃាត និងបទល្មើសអាវុធដែលមានស្ថានទម្ងន់ទោសធ្ងន់។

ពាក់ព័ន្ធបញ្ហានេះព្រះមហាក្សត្រស៊ុយអែតព្រះអង្គម្ចាស់ Carl XVI Gustaf បានមានបន្ទូលនៅក្នុងសេចក្តីថ្លែងការណ៍មួយថា ទ្រង់បានទទួលព័ត៌មាននៃការបាញ់ប្រហារនេះ ហើយទ្រង់ចាត់ទុកថាជារឿងគួរឲ្យសោកស្ដាយបំផុត។ ទ្រង់មានបន្ទូលថា «យប់នេះ យើងសូមចូលរួមរំលែកទុក្ខដល់ក្រុមគ្រួសារ និងមិត្តភ័ក្តិនៃសព។ នៅពេលនេះ យើងក៏មានទុក្ខដូចអ្នកអ្នករងរបួស និងក្រុមគ្រួសាររបស់ពួកគេ ក៏ដូចជាអ្នកផ្សេងទៀតដែលរងផលប៉ះពាល់ផងដែរ»។

ប្រទេសស៊ុយអែតកំពុងប្រឈមនឹងកើនឡើងនៃការបាញ់ប្រហារ និងបំផ្ទុះគ្រាប់បែកដែលបង្កឡើងដោយបញ្ហាឧក្រិដ្ឋកម្មរបស់ក្រុមប្រដាប់អាវុធ ប៉ុន្តែការវាយប្រហារដ៏សាហាវនៅសាលារៀនគឺកម្រណាស់។ យោងតាមក្រុមប្រឹក្សាជាតិស៊ុយអែតសម្រាប់ការទប់ស្កាត់ឧក្រិដ្ឋកម្មបានឱ្យដឹងថា មានតែមនុស្ស១០នាក់ប៉ុណ្ណោះត្រូវបានសម្លាប់នៅក្នុងអំពើហិង្សាចំនួនប្រាំពីរនៅសាលារៀនរវាងឆ្នាំ ២០១០ និង ២០២២។

ទោះបីការវាយប្រហារនៅសាលាគឺជារឿងកម្រក្នុងប្រទេសស៊ុយអែត ប៉ុន្តែមានឧប្បត្តិហេតុធ្ងន់ធ្ងរជាច្រើនក្នុងរយៈពេលប៉ុន្មានឆ្នាំចុងក្រោយនេះ។ នៅខែមីនា ឆ្នាំ ២០២២ សិស្សអាយុ១៨ឆ្នាំម្នាក់បានចាក់សម្លាប់គ្រូបង្រៀនពីរនាក់នៅវិទ្យាល័យមួយក្នុងទីក្រុង Malmo។

កាលពីពីរខែមុនក្មេងប្រុសអាយុ១៦ឆ្នាំម្នាក់ត្រូវបានចាប់ខ្លួន បន្ទាប់ពីបានយកកាំបិតចាក់សិស្សម្នាក់ និងគ្រូបង្រៀនម្នាក់ទៀតរបួសនៅសាលាមួយក្នុងទីក្រុង Kristianstad៕