ក្រោយ ត្រាំ-ពូទីន ជជែក​គ្នា ប្រទេស​ធំៗ​នៅ​អឺរ៉ុបចេញ​សេចក្ដី​ថ្លែងការណ៍​គាំទ្រ​អ៊ុយក្រែន​ទ្វេ​ដង

បន្ទាប់​ពី​មាន​ជំនួប​តាម​ទូរសព្ទ​​រយៈពេល​ប្រមាណ​​មួយ​ម៉ោង​កន្លះ​រវាង​​ប្រធានាធិបតី​អាមេរិក លោក ដូណាល់ ត្រាំ និង​សមភាគី​រុស្ស៊ី លោក វ៉ា្លឌីមៀរ ពូទីន ដែល​និយាយ​អំពី​បញ្ហា​សង្គ្រាម​នៅ​អ៊ុយក្រែន បណ្ដា​ប្រទេស​ធំៗ​​មួយ​ចំនួន​នៅ​អឺរ៉ុប បាន​នាំ​គ្នា​ចេញ​សេចក្ដី​ថ្លែងការណ៍​រួម​មួយ ដោយ​បង្ហាញ​ពី​ការ​គាំទ្រ​ទ្វេដង​បន្ថែម​ទៀត​ចំពោះ​រដ្ឋាភិបាល​ក្រុង​កៀវ ក្នុង​ការ​ទប់ទល់​នឹង​ការ​ឈ្លាន​ពាន​ពី​​ក្រុង​មូស្គូ។

សេចក្ដី​ថ្លែងការណ៍​រួម​របស់​បារាំង អាល្លឺម៉ង់ ប៉ូឡូញ អ៊ីតាលី អេស្ប៉ាញ ចក្រភពអង់គ្លេស តំណាងជាន់ខ្ពស់របស់សហភាពអឺរ៉ុបសម្រាប់កិច្ចការបរទេស និងគោលនយោបាយសន្តិសុខ កាល​ពី​ថ្ងៃ​ទី​១២​ខែ​កុម្ភៈ​ឆ្នាំ​២០២៥​​ បាន​រៀបរាប់​ថា៖ «យើងត្រៀមខ្លួនជាស្រេច ដើម្បីបង្កើនការគាំទ្ររបស់យើងសម្រាប់អ៊ុយក្រែន។ យើងប្តេជ្ញាចំពោះឯករាជ្យ អធិបតេយ្យភាព និងបូរណភាពទឹកដីរបស់​អ៊ុយក្រែន ដើម្បីប្រឈមមុខនឹងសង្រ្គាមឈ្លានពានរបស់រុស្ស៊ី»។

សេចក្ដី​ថ្លែងការណ៍​ដដែល បាន​បន្ថែម​ថា៖ «យើងចែករំលែកគោលដៅ ដើម្បីបន្តគាំទ្រអ៊ុយក្រែនរហូតដល់សន្តិភាពពេញលេញ និងយូរអង្វែងត្រូវបានសម្រេច។ សន្តិភាព​ដែល​ធានា​ផលប្រយោជន៍​អ៊ុយក្រែន​និង​ខ្លួន​យើង។ យើងទន្ទឹងរង់ចាំការពិភាក្សាអំពីវិធីខាងមុខរួមគ្នាជាមួយសម្ព័ន្ធមិត្តអាមេរិករបស់យើង»។

បណ្ដា​ប្រទេស​អឺរ៉ុប​ទាំង​នោះ បាន​បញ្ជាក់​ថា គោលបំណងរួមរបស់ពួក​គេ គឺ​​ដាក់អ៊ុយក្រែន​ឲ្យ​ស្ថិតក្នុង​ជំហរ​រឹងមាំ ហើយ​​កិច្ចចរចា​ណាមួយ​អំពី​សង្គ្រាម​ ត្រូវ​តែ​មាន​វត្តមាន​របស់​អ៊ុយក្រែន និងអឺរ៉ុបចូលរួម។ ក្រុង​កៀវ គួរតែត្រូវបានផ្តល់ការធានាសុវត្ថិភាពដ៏​ខ្លាំង​ក្លា​មួយ។ សន្តិភាពដ៏យុត្តិធម៍ និងយូរអង្វែងនៅអ៊ុយក្រែន គឺជាលក្ខខណ្ឌចាំបាច់សម្រាប់សន្តិសុខ​នៃ​តំបន់​មហា​សមុទ្រ​អាត្លង់ទិក​ដ៏រឹងមាំ។

សេចក្ដី​ថ្លែងការណ៍ ក៏​បាន​សង្កត់​ធ្ងន់​ដែរ​ថា៖ «យើងសូម​រឭក​ថា សន្តិសុខនៃទ្វីបអឺរ៉ុបគឺជាការទទួលខុសត្រូវរួមរបស់យើង។ ដូច្នេះហើយ យើងកំពុងធ្វើការរួមគ្នា ដើម្បីពង្រឹងសមត្ថភាពការពាររួមរបស់យើង»។

សូម​បញ្ជាក់​ថា បន្ទាប់​ពី​​ការហៅទូរសព្ទដ៏ភ្ញាក់ផ្អើលរវាងមេដឹកនាំទាំងពីរ លោក ដូណាល់ ត្រាំ បាន​​ប្រកាស​ថា លោក​នឹងជួបជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន នៅប្រទេសអារ៉ាប៊ីសាអូឌីត សម្រាប់កិច្ចចរចាសន្តិភាពអ៊ុយក្រែន ក្នុង​ពេល​ឆាប់ៗ ប៉ុន្តែ​​ពេល​វេលា​ជាក់លាក់ មិនត្រូវ​បាន​បង្ហាញ​ឡើយ៕

ដោយ៖ ឈាង

ចុចអាន៖ ត្រាំ និង​ ពូទីន ត្រៀម​ជួប​មុខ​គ្នា​នៅ​អារ៉ាប៊ីសាអូឌីត និយាយ​ពី​សង្គ្រាម​នៅអ៊ុយក្រែន