សាលារៀន​នៅ​កូរ៉េ​ខាង​ត្បូង​រាប់​សិប​កន្លែង ត្រៀម​បិទ​ទ្វារ ព្រោះ​អត្រាកំណើតថយចុះ​ខ្លាំង

ប្រទេសកូរ៉េខាងត្បូង នឹងបិទសាលារៀនចំនួន ៤៩​កន្លែង​​នៅទូទាំងទីក្រុង និងខេត្តចំនួន​១៧ ក្នុងឆ្នាំ​២០២៥​នេះ ដោយសារតែការថយចុះគួរ​ឲ្យ​កត់សម្គាល់នៃចំនួនប្រជាជនដែល​ដល់​អាយុចូលរៀន។

ការបិទនេះរួមមានសាលាបឋមសិក្សា អនុវិទ្យាល័យ និងវិទ្យាល័យ ដែលឆ្លុះបញ្ចាំងពីបញ្ហាប្រឈមផ្នែកប្រជាសាស្រ្តកាន់តែធ្ងន់ធ្ងរ​ដែល​កូរ៉េ​ខាង​ត្បូង​កំពុង​ជួប​ប្រទះ។ ការថយចុះអត្រាកំណើតបាននាំ​ឲ្យ​មានការធ្លាក់ចុះយ៉ាងខ្លាំងនៃការចុះឈ្មោះចូលរៀននៅសាលាបឋមសិក្សានៅទូទាំងប្រទេស ជាពិសេសនៅក្នុងតំបន់ដូចជា​ទីក្រុង Gwangju និងខេត្ត Jeolla ខាងត្បូង។

ចំនួន​សាលា​បិទ​ទ្វារ​ដោយ​សារ​កង្វះ​សិស្ស​ បាន​កើន​ឡើង​យ៉ាង​ឆាប់​រហ័ស​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ ដោយ​កើន​ឡើង​ពី ២២សាលា​​ក្នុង​ឆ្នាំ​២០២៣ ឡើង​ដល់ ៣៣​សាលា​ក្នុង​ឆ្នាំ​២០២៤ ។

ដើម្បីឆ្លើយតបទៅនឹងអត្រាកំណើតទាប កូរ៉េខាងត្បូងបានអនុវត្តវិធានការផ្សេងៗដើម្បីលើកទឹកចិត្តដល់ការមានកូន ដូចជាការផ្តល់អត្ថប្រយោជន៍យ៉ាងច្រើន ការថែទាំវេជ្ជសាស្រ្តឥតគិតថ្លៃ និងការឧបត្ថម្ភធនជាដើម។ គំនិតផ្តួចផ្តើមទាំងនេះ មាន​គោល​បំណង​ជំរុញ​ឲ្យ​មាន​ការ​កើន​ឡើង​អត្រា​កំណើត និងអាពាហ៍ពិពាហ៍ ខណៈ​ចំនួនប្រជាជនកូរ៉េខាងត្បូង​កំពុង​ធ្លាក់ចុះយ៉ាងសម្បើម។

ទោះបីជាមានការខិតខំប្រឹងប្រែងទាំងនេះក៏ដោយ ក៏អត្រាកំណើតនៅតែទាប ប៉ុន្តែ​វាចាំបាច់ក្នុងការរក្សាគោលនយោបាយទាំងនេះ ដើម្បីការពារការធ្លាក់ចុះនៃប្រជាសាស្រ្តបន្ថែមទៀត។ ការបិទសាលារៀនបង្ហាញពីតម្រូវការបន្ទាន់សម្រាប់វិធានការបន្ត និងមានប្រសិទ្ធភាព ដើម្បីដោះស្រាយបញ្ហាប្រឈមប្រជាសាស្រ្តរបស់​កូរ៉េ​ខាង​ត្បូង៕

ដោយ៖ ឈាង