ព័ត៌មានអន្ដរជាតិ

សហរដ្ឋអាមេរិក និងហ្វីលីពីនធ្វើសមយុទ្ធរួមគ្នាទ្រង់ទ្រាយធំមានទាហាន៥០០០នាក់

បានផុស

១ year មុន

នៅ

ថ្ងៃអង្គារ ២៥ មីនា ២០២៥

ដោយ

កងទ័ពហ្វីលីពីន និងសហរដ្ឋអាមេរិកចាប់ផ្តើមសមយុទ្ធយោធារួមគ្នាទ្រង់ទ្រាយធំរយៈពេលបីសប្តាហ៍ ផ្តោតលើការការពារទឹកដី និងការពង្រាយកងកម្លាំងទ្រង់ទ្រាយធំរហូតដល់៥០០០នាក់ ដែលជាសមយុទ្ធធំលើកដំបូងក្រោយលោក ដូណាល់ ត្រាំ ឡើងកាន់អំណាច។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២៥ខែមីនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធនេះហៅថា «Salaknib» នឹងមានការចូលរួមពីទាហានប្រហែល៥០០០នាក់មកពីភាគគីកងទ័ពហ្វីលីពីន និងកងទ័ពអាមេរិកប្រចាំតំបន់ប៉ាស៊ីហ្វិក ដែលនឹងចូលរួមក្នុងការសមយុទ្ធរួមគ្នានិងការផ្លាស់ប្តូរជំនាញនៅក្នុងដំណាក់កាលដំបូងនៃសមយុទ្ធ ខណៈដំណាក់កាលទីពីរគ្រោងធ្វើនៅចុងឆ្នាំនេះ។

មន្ទីរបញ្ចកោណ បានប្រកាសកាលពីសប្តាហ៍មុនថា រដ្ឋមន្ត្រីការពារជាតិអាមេរិក Pete Hegseth នឹងធ្វើដំណើរទៅកាន់ទីក្រុងម៉ានីលក្នុងសប្តាហ៍នេះ ដើម្បីជួបជាមួយមេដឹកនាំ និងកងកម្លាំងហ្វីលីពីន។ លោក Hegseth គឺជាមន្ត្រីគណៈរដ្ឋមន្ត្រីដំបូងគេរបស់រដ្ឋបាល ដូណាល់ ត្រាំ ដែលធ្វើទស្សនកិច្ចនៅទីក្រុងម៉ានីល ចាប់តាំងពីប្រធានាធិបតីអាមេរិក ដូណាល់ ត្រាំ ចូលកាន់តំណែងក្នុងខែមករា។

យោងតាមកងទ័ពហ្វីលីពីនបានឲ្យដឹងថា សមយុទ្ធនេះនឹងផ្តោតលើការពង្រឹងប្រតិបត្តិការរួមបញ្ចូលគ្នារវាងកងទ័ពរបស់ភាគីទាំងពីរ សមយុទ្ធទ្រង់ទ្រាយធំ សមយុទ្ធបាញ់គ្រាប់ពិត និងការការពារទឹកដី។

ប្រទេសហ្វីលីពីនក៏បានទទួលការលើកលែងពីការបង្កកមូលនិធិរយៈពេល៩០ថ្ងៃ ដែលលោក ត្រាំ បានបញ្ជាកាលពីខែមករា ដូច្នេះប្រទេសនេះអាចទទួលបាន ៣៣៦លានដុល្លារអាមេរិកសម្រាប់ការធ្វើទំនើបកម្មកងកម្លាំងសន្តិសុខរបស់ខ្លួន៕