​​មេដឹកនាំ​ចិន​បង្ហាញ​ការ​ប្តេជ្ញា​ចិត្ត​ធ្វើ​ការជាមួយ​វៀតណាម ​ក្នុងដំណើរ​ទស្សនកិច្ច​ដែលហ៊ុំព័ទ្ធ​ដោយសង្គ្រាម​ពាណិជ្ជកម្ម​​​ដ៏ស្រួចស្រាល​

អគ្គលេខាគណៈកម្មាធិការមជ្ឈិមបក្សកុម្មុយនិស្តចិន និងជាប្រធានរដ្ឋ​ចិន លោក ស៊ី ជីនពីង (Xi Jinping) បាន​ធ្វើ​ដំណើរ​ទៅដល់​ប្រទេសជិត​ខាងវៀតណាម ​ដែល​ជា​​ដៃគូ​​​ពាណិជ្ជកម្ម​ដ៏សំខាន់​របស់​សហរដ្ឋអាមេរិក​​នៅតំបន់​អាស៊ីអាគ្នេយ៍ ​ដោយ​បង្កើត​ឲ្យ​​មាន​ការ​វិភាគ​​យ៉ាងច្រើន​​​ជុំវិញដំណើរទស្សនកិច្ចរបស់​លោក ចំពេល​សង្គ្រាម​ពាណិជ្ជកម្ម​ផ្ទុះ​ឡើង​យ៉ាង​​ខ្លាំង​​បង្ក​ឡើង​ដោយរដ្ឋបាល​របស់​ប្រធានាធិបតី​ ដូណាល់ ត្រាំ​ក្នុង​ប៉ុន្មានសប្តាហ៍ចុងក្រោយ​នេះ​។

​​ប្រធានាធិបតីចិន លោក ស៊ី ជីនពីង ដែល​ចាប់​ផ្តើម​ដំណើរទស្សនកិច្ច​​ផ្លូវរដ្ឋ​ទៅ​កាន់​ប្រទេស​ក្នុង​តំបន់​អាស៊ី​អា​គ្នេយ៍​ចំនួន​៣ រួម​មាន​ វៀតណាម កម្ពុជា និង​ម៉ាឡេស៊ី បាន​​និយាយ​នៅ​ពេល​ទៅដល់​ប្រទេស​វៀតណាម​​កាល​ថ្ងៃទី​១៤ខែ​​មេសា​នេះ​ថា ប្រទេសចិនត្រៀមខ្លួនជាស្រេចក្នុងការធ្វើការជាមួយវៀតណាមដើម្បីរក្សាចំណងមិត្តភាព និងបេសកកម្មរួមទ្វេភាគីដែល​មាន​យូរអង្វែង។

​ការ​លើក​ឡើង​​របស់​លោក ស៊ី ជីនពីង នៅ​ក្រោយ​ពេលដែល​សង្គ្រាមពន្ធ​​​នាំចូល​ជាមួយសហរដ្ឋអាមេរិក​បាន​ផ្ទុះ​ឡើង​ជាបន្តបន្ទាប់ ខណៈដែលវៀតណាម​​ក៏​ប្រឈម​ការ​ដាក់​​​ពន្ធ​បដិការ​​រហូត​ដល់​​​ជិត​​៥០%​​ពី​សំណាក់​រដ្ឋបាល​​ប្រធានាធិបតី​សហរដ្ឋអាមេរិក លោក ដូណាល់ ត្រាំ ហើយ ​ក្រោយ​មក អគ្គលេខា​ធិការ​​បក្សកុម្មុយនីស្តវៀតណាម លោក To Lam​ បានស្នើ​​អាមេរិក​​ដាក់​ពន្ធ​សូន្យ​ទៅវិញទៅមក។ ​​ប៉ុន្តែ​​​ក្រោយ​មក​រដ្ឋបាល​សហរដ្ឋអាមេរិក បាន​បន្ធួរបន្ថយភាព​តានតឹងជាមួយ​បណ្តា​ប្រទេស​​នានា​ ដោយ​ពន្យាការអនុវត្ត​ពន្ធបដិការ​នោះ ​ដោយ​លើក​កម្ពស់​ការ​ចរចា​​ជាថ្មី និង​ពន្យារ​រហូត​ដល់​ខែ​​កក្កដា។

សារ​ព័ត៌មាន​សំឡេង​វៀតណាមអន្តរជាតិ (VOVWORLD) បានចុះ​​ផ្សាយ​​ថា បន្ទាប់ពីបានមកដល់អាកាសយានដ្ឋានអន្តរជាតិ Noi Bai ក្នុងទីក្រុងហាណូយកាលពីថ្ងៃត្រង់ដោយចាប់ផ្តើមដំណើរទស្សនកិច្ចផ្លូវរដ្ឋរយៈពេលពីរថ្ងៃនៅ​វៀត​ណាម​តាមការអញ្ជើញរបស់អគ្គលេខាគណៈកម្មាធិការមជ្ឈិមបក្សកុម្មុយ​និស្ត​វៀតណាម លោក To Lam និងប្រធានាធិបតី លោក Luong Cuong ​មេដឹកនាំកំពូលចិន លោក ស៊ី ជីនពីង បានធ្វើសេចក្តីថ្លែងការណ៍ភ្លាមៗ​​ ដោយ​​​បង្ហាញ​​នូវ​មនោសញ្ចេតនា និង​ការ​ប្តេជ្ញាចិត្ត​​ធ្វើ​ការ​ងារ​ជាមួយ​វៀតណាម​​ឲ្យ​កាន់តែ​រឹងមាំ​ក្នុង​​ទំនាក់​ទំនង​ទ្វេភាគី ក៏​ដូច​ជា​កិច្ចសហប្រតិបត្តិការ​លើ​វិស័យ​ពាណិជ្ជកម្ម​តំបន់​​។

​ក្នុងសេចក្តី​ថ្លែង​ទៅកាន់​​មេដឹកនាំវៀតណាម​ ​លោក ស៊ី ថ្លែងថា៖​«វៀតណាមកំពុងសម្រេចបាននូវការកើនឡើងជាលំដាប់នៃកម្រិតជីវភាពរស់នៅរបស់ប្រជាជន ឥទ្ធិពលអន្តរជាតិ និងតំបន់កាន់តែខ្លាំង ព្រមទាំងលើកទឹកចិត្តនូវលទ្ធផលក្នុងឧស្សាហូបនីយកម្ម និងទំនើបកម្មសង្គមនិយម។ ភាគី​ចិន​ពិត​ជា​រីករាយ​ដែល​បាន​ឃើញ​រឿង​ទាំង​អស់​នេះ»។

នេះ​ជា​ដំណើរ​ទស្សនកិច្ច​នៅ​បរទេស​លើក​ដំបូង​របស់​លោក ស៊ី ក្នុង​ឆ្នាំ​២០២៥ ជា​ទស្សនកិច្ច​លើក​ទី​៤​របស់​លោក​នៅ​ប្រទេស​វៀតណាម និង​ជា​លើក​ទី​២​ក្នុង​អាណត្តិ​បច្ចុប្បន្ន​របស់​លោក។ វាបង្ហាញពីការយកចិត្តទុកដាក់ខ្ពស់ដែលបក្ស រដ្ឋ និងមេដឹកនាំចិនមានចំពោះភាពជាអ្នកជិតខាងមិត្តភាព និងកិច្ចសហប្រតិបត្តិការលើគ្រប់វិស័យរវាងវៀតណាម និងចិន។

ដំណើរទស្សនកិច្ចរបស់លោក នេះ គឺជាព្រឹត្តិការណ៍នយោបាយដ៏សំខាន់មួយ ដែលមានសារៈសំខាន់ជាយុទ្ធសាស្ត្រ និងមានឥទ្ធិពលយូរអង្វែងលើទំនាក់ទំនងវៀតណាម-ចិន ខណៈដែលប្រទេសទាំងពីរឈានចូលយុគសម័យថ្មីនៃការអភិវឌ្ឍន៍។

សារព័ត៌មាន​វៀតណាម VN Express បាន​ចុះ​ផ្សាយ​​​នៅ​មុន​កា​រមក​ដល់​របស់​​ប្រធានាធិបតីចិនថា ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសវៀតណាម លោក Bui Thanh Son បាន​​និយាយថា៖​«ថ្នាក់ដឹកនាំបក្ស និងរដ្ឋវៀតណាមទន្ទឹងរង់ចាំដំណើរទស្សនកិច្ចនេះ ហើយរំពឹងថានឹងមានផ្លែផ្កាក្នុងការបង្កើនការផ្លាស់ប្តូរយុទ្ធសាស្ត្រកម្រិតខ្ពស់ ជាពិសេសទំនាក់ទំនងទៀងទាត់រវាងថ្នាក់ដឹកនាំកំពូលនៃបក្ស និងប្រទេសទាំងពីរ»។

លោកឧបនាយករដ្ឋមន្ត្រី Son បាននិយាយថា «នេះនឹងពង្រឹងទំនុកចិត្តផ្នែកនយោបាយ ពង្រីកការចែករំលែកបទពិសោធន៍ក្នុងអភិបាលកិច្ច និងការអភិវឌ្ឍន៍ជាតិ ព្រមទាំងជំរុញការអភិវឌ្ឍប្រកបដោយស្ថិរភាព និងសុខភាពល្អនៃទំនាក់ទំនងទ្វេភាគី ចំពេលមានការផ្លាស់ប្តូរដ៏ស្មុគស្មាញលើសកលលោក និងតំបន់»​។

​​ក្នុងដំណើរ​ទស្សនកិច្ច​​​ដ៏​មានសារសំខាន់​ក្នុង​ពេលដែលពិភពលោក​​ប្រឈម​វិបត្តិសង្គ្រាមសព្វាវុធ បច្ចេកវិទ្យា ​ពាណិជ្ជកម្ម និង​ការ​ប្រជែងឥទ្ធិពល​ភូមិសាស្រ្ត​នយោបាយ​នេះ ​ភាគី​វៀតណាម​និង​ចិន​​ត្រូវបាន​គេ​រាយការណ៍​​ គ្រោយ​ចុះ​ហត្ថលេខា​លើ​កិច្ច​ព្រម​ព្រៀង​​​រហូត​ដល់​៤០​ ដោយ​រាប់​ចាប់តាំ​ងពីកិច្ច​ព្រម​ព្រៀង​ក្នុងវិស័យ​ការ​ពារជាតិ ​សន្តិសុខ ​ពាណិជ្ជកម្ម ​​ហិរញ្ញវត្ថុ ​​និង​ ការ​ភ្ជាប់​​​ហេដ្ឋារចនាសម្ព័ន្ធ​៕

ដោយ រ៉ាន់ រើយ​​