ព័ត៌មានអន្ដរជាតិ

យោធាមីយ៉ាន់ម៉ាបាញ់ប្រហារផ្លូវអាកាសសម្លាប់ជនស៊ីវិល២៣នាក់ក្នុងពេលបុណ្យឆ្លងឆ្នាំ៤ថ្ងៃ

បានផុស

១ year មុន

នៅ

ថ្ងៃសុក្រ ១៨ មេសា ២០២៥

ដោយ

របបយោធាមីយ៉ាន់ម៉ាបានធ្វើការវាយប្រហារតាមអាកាសយ៉ាងតិច ២៦លើកទៅលើគោលដៅជនស៊ីវិលក្នុងរយៈពេលបួនថ្ងៃនៃពិធីបុណ្យ Thingyan ឬបុណ្យចូលឆ្នាំថ្មីប្រពៃណីមីយ៉ាន់ម៉ា។ នេះបើយោងតាមការចេញផ្សាយរបស់សារព័ត៌មាន The Irrawaddy នៅថ្ងៃទី១៨ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យដែលចងក្រងដោយ The Irrawaddy តំបន់ចំនួន៧ក្នុងចំណោមតំបន់ចំនួន១៥របស់ប្រទេសនេះ មនុស្សយ៉ាងហោចណាស់២៣នាក់ រួមទាំង កុមារា និងកុមារី និង៥០នាក់ផ្សេងទៀតដែលមានទាំងព្រះសង្ឃបានរងរបួស ដោយសារតែការបាញ់ផ្លោងរបស់កងកម្លាំងយោធារបស់របបសឹកមីយ៉ាន់ម៉ា។

ការវាយប្រហារតាមអាកាសទាំងនេះបានកំណត់គោលដៅលើវត្តចំនួន៦ ខណៈដែលពុទ្ធសាសនិកមកជួបជុំគ្នាក្នុងពេលនៃពិធីបុណ្យចូលឆ្នាំថ្មី។ លើសពីនេះ ការវាយប្រហារតាមអាកាសត្រូវបានគេរាយការណ៍នៅក្នុងសង្កាត់ចំនួន២០ ក្នុងតំបន់ Magwe, Sagaing, Mandalay, និង Bago និងរដ្ឋ Rakine, Chin និង Karen ចាប់ពីថ្ងៃទី ១៣ ដល់ ១៦ ខែមេសា ទោះបីជាមិនមានការប្រយុទ្ធគ្នានៅលើដីក៏ដោយ។

គួរបញ្ជាក់ថាចាប់តាំងពីការរញ្ជួយដីកាលពីថ្ងៃទី ២៨ ខែមីនាមក រដ្ឋាភិបាលរួបរួមជាតិស៊ីវិល (NUG) និងក្រុមប្រដាប់អាវុធជនជាតិភាគតិចដ៏មានឥទ្ធិពលមួយចំនួនបានប្រកាសបទឈប់បាញ់ជាឯកតោភាគី ដើម្បីអនុញ្ញាតឱ្យប្រតិបត្តិការជួយសង្គ្រោះ និងពិធីបុណ្យសពដំណើរការដោយសុវត្ថិភាព។

ប៉ុន្មានថ្ងៃក្រោយមក របបយោធាក៏បានប្រកាសបទឈប់បាញ់រយៈពេល ២០ ថ្ងៃ ដោយចាប់ផ្តើមពីថ្ងៃទី ២ ខែមេសា ប៉ុន្តែផ្ទុយទៅវិញ នៅតែបន្តការវាយប្រហារតាមអាកាស និងកាំភ្លើងធំទៅលើគោលដៅទាំងជនស៊ីវិល និងក្រុមប្រដាប់អាវុធនៅទូទាំងប្រទេស។

បើតាមក្រសួងសិទ្ធិមនុស្សរបស់ NUG របបនេះបានធ្វើការវាយប្រហារដោយគ្រាប់ផ្លោងចំនួន៩២ លើកនិងការវាយប្រហារតាមអាកាសនៅទូទាំង ១២ តំបន់ និងរដ្ឋចំនួន ១៥ របស់ប្រទេសមីយ៉ាន់ម៉ា ចន្លោះពីថ្ងៃទី ២៨ ខែមីនាដល់ថ្ងៃទី ៨ ខែមេសា បានសម្លាប់មនុស្ស ៧២នាក់ និងរបួស ៩១ នាក់៕