ព័ត៌មានអន្ដរជាតិ

UN៖ ជិត២ខែហើយដែលអ៊ីស្រាអែលបិទជំនួយទាំងស្រុងមិនឲ្យចូលតំបន់ហ្គាហ្សា

បានផុស

១ year មុន

នៅ

ថ្ងៃអង្គារ ២២ មេសា ២០២៥

ដោយ

Chheang

គិតត្រឹមថ្ងៃទី២២ខែមេសាឆ្នាំ២០២៥ អ៊ីស្រាអែលបានបិទទាំងស្រុងនូវជំនួយមនុស្សធម៌ទាំងអស់ចូលទៅក្នុងតំបន់ហ្គាហ្សាអស់រយៈពេលជាង ៥០ថ្ងៃ។ នេះបើយោងតាមរបាយការណ៍របស់អង្គការសហប្រជាជាតិ (UN)។

សកម្មភាពចែកចាយទឹកស្អាតនៅហ្គាហ្សា (រូបថត៖ APA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបិទជំនួយ បានចាប់ផ្តើមនៅថ្ងៃទី២ខែមីនា ដោយរាំងខ្ទប់រាល់ជំនួយសំខាន់ៗទាំងអស់ ដូចជា អាហារ ទឹក ថ្នាំពេទ្យ និងប្រេងឥន្ធនៈ ដោយលើកឡើងពីតម្រូវការក្នុងការដាក់សម្ពាធក្រុមហាម៉ាសឲ្យទទួលយកការបន្តជាបណ្តោះអាសន្ននូវកិច្ចព្រមព្រៀងបទឈប់បាញ់។

អ្នកនាំពាក្យអង្គការសហប្រជាជាតិ លោក Stephane Dujarric បាននិយាយថា៖ «ចាប់តាំងពីដើមខែមីនាមក ពុំមានរថយន្តដឹកម្ហូបអាហារ ប្រេងឥន្ធនៈ ថ្នាំពេទ្យ ឬរបស់របរចាំបាច់ផ្សេងទៀតណាមួយត្រូវបានអនុញ្ញាតឡើយ ទោះបីជាវាមានសារៈសំខាន់យ៉ាងណាសម្រាប់ការរស់រានមានជីវិតរបស់មនុស្ស»។

លោក Dujarric បានបន្ថែមថា៖ «អ្វីដែលយើងអាចសង្ឃឹមបានគឺការសម្រេចបាននូវកិច្ចព្រមព្រៀង ដើម្បីធានាថា ជំនួយមនុស្សធម៌ជាថ្មីម្តងទៀតអាចដំណើរការដោយសេរី និងគ្មានការរារាំងទៅកាន់តំបន់ហ្គាហ្សា»។

អង្គការសហប្រជាជាតិ និងក្រុមជំនួយផ្សេងៗ បានថ្កោលទោសសកម្មភាពនេះ ដោយចាត់ទុកវាថាជាការរំលោភលើច្បាប់មនុស្សធម៌អន្តរជាតិ។ ការបញ្ឈប់ជំនួយ បានធ្វើឲ្យស្ថានការណ៍មនុស្សធម៌ដែលធ្ងន់ធ្ងររួចទៅហើយនៅក្នុងហ្គាហ្សាកាន់តែយ៉ាប់យ៉ឺនជាងមុនទៅទៀត ដែលមនុស្សជាង ២,១លាននាក់គ្មានលទ្ធភាពទទួលបានការផ្គត់ផ្គង់ចាំបាច់។

សូមបញ្ជាក់ថា កងទ័ពអ៊ីស្រាអែលបានបន្តការវាយលុករបស់ខ្លួនលើតំបន់ហ្កាហ្សាវិញនៅថ្ងៃទី១៨ខែមីនា ក្រោយបញ្ចប់ការអនុវត្តបទឈប់បាញ់ និងកិច្ចព្រមព្រៀងផ្លាស់ប្តូរអ្នកទោសដែលធ្វើឡើងកាលពីថ្ងៃទី១៩ខែមករា។

គិតចាប់ពីផ្ទុះសង្គ្រាមខែតុលាឆ្នាំ២០២៣ អ៊ីស្រាអែលបានសម្លាប់ជនជាតិប៉ាឡេស្ទីនជាង ៥១ ២០០នាក់នៅហ្គាហ្សា៕

ដោយ៖ ឈាង