អ៊ីស្រាអែលវាយប្រហារលើ​ទីតាំង​សាលារៀននៅហ្គាហ្សា សម្លាប់មនុស្ស១០នាក់

យ៉ាងហោចណាស់មនុស្ស ១០នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែលបង្កឱ្យមានអគ្គិភ័យលើសាលារៀន​មួយកន្លែងសម្រាប់ជនភៀសខ្លួននៅក្នុងទីក្រុងហ្គាហ្សា។ នេះបើយោងតាមការចេញផ្សាយរបស់សារព័ត៌មាន​ Al Jazeera នៅថ្ងៃ​ទី២៣​ខែ​មេសានេះ។

ក្រសួងការពារជនស៊ីវិលប៉ាឡេស្ទីន បានឱ្យដឹង​ថា បុគ្គលិកសង្គ្រោះបន្ទាន់របស់ខ្លួនបានរកឃើញសាកសពចំនួន១០នាក់ដែល​ក្នុង​នោះមានកុមារម្នាក់ នៅព្រឹកថ្ងៃពុធនេះ បន្ទាប់ពីការវាយប្រហារលើសាលារៀនជាកន្លែងសម្រាប់អ្នកផ្លាស់ទីលំនៅ​ដោយបង្ខំពីការវាយប្រហាររបស់អ៊ីស្រាអែលកន្លងមក។

តាមទីភ្នាក់ងាររបស់ Al Jazeera មិនមានតំបន់សុវត្ថិភាពទេ ហើយគ្មានអ្នករស់រានមានជីវិតពីអំពើប្រល័យពូជសាសន៍នេះទេ ខណៈទីក្រុងហ្គាហ្សានិងតំបន់ភាគខាងជើងត្រូវបានទទួលរងនូវការបាញ់ផ្លោង និងការបាញ់កាំភ្លើងធំរបស់អ៊ីស្រាអែលអស់រយៈពេលជាច្រើនម៉ោង។

គួរបញ្ជាក់ថា ចាប់តាំងពីមិនបន្តបទឈប់បាញ់អ៊ីស្រាអែលបានបើការវាយប្រហារនិងបិតផ្លូវជំនួយកាន់តែខ្លាំង។ ការបិទ​ជំនួយ​ បានចាប់ផ្តើមនៅ​ថ្ងៃទី​២​ខែមីនា​ ដោយ​រាំង​ខ្ទប់​រាល់​ជំនួយ​សំខាន់ៗ​ទាំង​អស់ ដូចជា អាហារ ទឹក ថ្នាំពេទ្យ និងប្រេងឥន្ធនៈ ដោយលើកឡើងពីតម្រូវការក្នុងការដាក់សម្ពាធក្រុមហាម៉ាស​​ឲ្យ​ទទួលយកការបន្ត​ជា​បណ្តោះអាសន្ន​នូវ​កិច្ចព្រមព្រៀងបទឈប់បាញ់។

អង្គការសហប្រជាជាតិ និងក្រុមជំនួយផ្សេងៗ បានថ្កោលទោសសកម្មភាពនេះ ដោយចាត់ទុកវាថាជាការរំលោភលើច្បាប់មនុស្សធម៌អន្តរជាតិ។ ការ​បញ្ឈប់​ជំនួយ​ បានធ្វើ​ឲ្យ​ស្ថានការណ៍មនុស្សធម៌​ដែល​ធ្ងន់ធ្ងររួចទៅហើយនៅក្នុងហ្គាហ្សា​កាន់​តែ​យ៉ាប់យ៉ឺន​ជាង​មុន​ទៅ​ទៀត ដែលមនុស្សជាង ២,១​លាននាក់គ្មានលទ្ធភាពទទួលបានការផ្គត់ផ្គង់ចាំបាច់៕

អត្ថបទ៖ ប៊ុន សុភាព