ផ្ទុះជំងឺអាថ៌កំបាំងមួយនៅអាហ្វ្រិក ស្លាប់និងឆ្លងសិស្សពេញសាលារៀន

ជំងឺមិនស្គាល់អត្តសញ្ញាណមួយ បានសម្លាប់ក្មេងស្រីម្នាក់និងបណ្តាលឲ្យសិស្សជាង៣០នាក់ទៀត ធ្លាក់ខ្លួនឈឺនៅសាលាមួយក្នុងប្រទេស នីហ្សេរីយ៉ា។

ជំងឺដ៏អាថ៌កំបាំងមួយនេះ បានរាលដាលពេញសាលា Government Girls College របស់រដ្ឋ ក្នុងទីក្រុង Sokoto។ នេះបើយោងតាមការចុះផ្សាយរបស់សារព័ត៌មានក្នុងស្រុក។

រូបភាពជាច្រើនសន្លឹក បានបង្ហាញក្មេងស្រីរាប់សិបនាក់ ដេកលើកន្ទេលក្នុងសាលា ក្នុងសភាពល្ហិតល្ហៃនិងអស់កម្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកផ្នែកសុខាភិបាលសាធារណៈនៅទីក្រុង Sokoto លោក Ahmed Abdulrahman បានប្រាប់ TVCNews ថា តាមព័ត៌មានបឋម សិស្សជាង៣០នាក់ ត្រូវបានគេបញ្ជូនទៅមន្ទីរពេទ្យក្នុងតំបន់ដោយសារតែការផ្ទុះឡើងនៃជំងឺនេះ។

ទោះបីជាយ៉ាងណាក៏ដោយ លោកមិនបានបង្ហាញព័ត៌មានលម្អិតអំពីក្មេងស្រីដែលបានស្លាប់នោះទេ ប៉ុន្តែបាននិយាយថា មន្រ្តីសុខាភិបាលបានយកសំណាកពីសិស្សដែលឈឺ ដើម្បីធ្វើការស៊ើបអង្កេតពីលក្ខណៈនៃជំងឺនេះ។

ស្របពេលជាមួយគ្នានោះ ស្នងការវិទ្យាសាស្ត្រនិងបច្ចេកវិទ្យាលោកបណ្ឌិត Julu Haruna ដែលជាអ្នកត្រួតត្រាសាលានេះ បាននិយាយថា រដ្ឋាភិបាលបានបញ្ជូនវេជ្ជបណ្ឌិតចំនួន ១០នាក់ទៅសាលានេះ។

សិស្សដែលឆ្លងជំងឺទាំងអស់ ត្រូវបានដាច់នៅដាច់ពីគេ ដើម្បីកាត់បន្ថយការរីករាលដាលនៃជំងឺនេះ។

លោក Abdulrahman បានអំពាវនាវឲ្យមានភាពស្ងប់ស្ងាត់ កុំឆោឡោ ហើយនិយាយថា ក្រសួងសុខាភិបាលកំពុងបើកការស៊ើបអង្កេតលើជំងឺនេះ៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ ​ចម្លែក​ណាស់!​ ​ទី​សក្ការ​បូជា​មួយ​នៅ​ជប៉ុន​ មានសត្វ​ឆ្មាជា​ព្រះ​សង្ឃ​