កូវីដផ្ទុះខ្លាំង! ថៃ ដាក់ចេញវិធានការរឹតត្បិតដ៏តឹងរ៉ឹង ផ្តោតសំខាន់លើសិស្សមត្តេយ្យទូទាំង បាងកក

ស្របពេលកូវីដផ្ទុះឡើងម្តងទៀត ដែលជំរុញខ្លាំងដោយសារមេរោគបំប្លែងថ្មី JN.1, ការិយាល័យ​អភិវឌ្ឍន៍​សង្គម​នៃប្រទេសថៃ (SDO) បានដាក់ចេញនូវវិធានការទប់ស្កាត់យ៉ាងតឹងរ៉ឹង ជាពិសេសផ្តោតលើក្មេងៗសិស្សសាលាមត្តេយ្យទូទាំងទីក្រុងបាងកក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bangkok Post កាលពីថ្ងៃពុធទី១៤ខែឧសភាឆ្នាំ២០២៥, នាយក SDO អ្នកស្រី Kanjana Phupipatthanaphon បានសង្កត់ធ្ងន់លើសារសំខាន់នៃវិធានការការពារដូចជារក្សាគម្លាតពីគ្នា១-២ម៉ែត្រ, ពាក់ម៉ាស, លាងដៃឲ្យបានញឹកញាប់និងវាស់កម្តៅ ដើម្បីធានាសុវត្ថិភាពកុមារ គ្រូបង្រៀន ក៏ដូចជាមន្ត្រីសាលា។

សាលានានាក៏ត្រូវសម្អាតឲ្យបានញឹកញាប់ និងមានការបាញ់ថ្នាំសម្លាប់មេរោគផងដែរ។

លើសពីនេះ ប្រសិនបើកុមារចេញរោគសញ្ញាសង្ស័យដូចជាឈឺក្បាល គ្រុន ក្អក តឹងច្រមុះ ពិបាកដកដង្ហើមឬឈឺបំពង់ក កុមារត្រូវដាក់ឲ្យនៅដាច់ដោយឡែក ឬជូនដំណឹងដល់ឪពុកម្តាយឲ្យយកកូនទៅផ្ទះ ហើយកុមារក៏ប្រហែលជានឹងត្រូវធ្វើតេស្តរកជំងឺកូវីដ-១៩ផងដែរ។

ក្នុងករណីវិជ្ជមានកូវីដ កុមារនឹងត្រូវព្យាបាលនៅមន្ទីរពេទ្យ ហើយបើសាលាផ្ទុះការឆ្លងជាចង្កោម សាលាត្រូវប្រឈមនឹងការបិទជាបណ្តោះអាសន្ន។

សូមជម្រាបជាថ្មី ស្ថានការណ៍ឆ្លងរាលដាលជំងឺកូវីដប្រភេទថ្មីនៅប្រទេសថៃ កំពុងឈានដល់កម្រិតព្រួយបារម្ភសាជាថ្មី ដោយក្នុងរយៈពេលត្រឹមមួយសប្តាហ៍ ពោលគឺចាប់ពីថ្ងៃទី៤ដល់១០ខែឧសភា មានករណីឆ្លងចំនួន១៦ ៦០៧ករណី ដែលភាគច្រើនជាប្រភេទអូមីក្រុងបំប្លែងថ្មី JN.1 ខណៈក្នុងរយៈពេលដូចគ្នានោះ ក៏មានមនុស្សស្លាប់៦នាក់ផងដែរ។

តួលេខនេះបានបង្ហាញពីករណីឆ្លងកើនឡើងគួរឲ្យកត់សម្គាល់ បើធៀបនឹងរយៈពេលមួយសប្តាហ៍មុននោះ ដែលមានមនុស្សឆ្លងប្រមាណ ១៤ ៦៨០នាក់៕

អត្ថបទ៖ សុខ សុវណ្ណ

ចុចអាន៖ ប្រយ័ត្ន! ថៃ មានមនុស្សស្លាប់៦នាក់ដោយសារកូវីដប្រភេទថ្មី ត្រឹមមួយសប្តាហ៍ ខណៈការឆ្លងកំពុងវាយលុកខ្លាំង