របបយោធាមីយ៉ាន់ម៉ាបង្កើនការវាយប្រហារ​ដោយ​​សម្លាប់ជនស៊ីវិល១៣នាក់បន្ថែមទៀត

យ៉ាងហោចណាស់មនុស្ស ១៣ នាក់បានស្លាប់ និងជាង ២០នាក់ទៀតរងរបួសនៅក្នុងការវាយប្រហារតាមអាកាសដែលធ្វើឡើងដោយកងកម្លាំង​របស់​របប​​យោធាមីយ៉ាន់ម៉ាលើភូមិមួយនៅភាគខាងលិចប្រទេសមីយ៉ាន់ម៉ា។ នេះបើយោងតាមការចេញផ្សាយរបស់ទីគេហទំព័រសារព័ត៌មាន The Irrawaddy នៅថ្ងៃទី១៥ខែឧសភា។

យន្តហោះចម្បាំងមួយគ្រឿងរបស់របបយោធាបានទម្លាក់គ្រាប់បែកលើភូមិ Tun Yawai ក្នុងរដ្ឋ Rakhine ជាមួយ​នឹង​គ្រាប់បែកទម្ងន់ ៥០០ ផោន ( ២៣០គីឡូក្រាម) ​ចំនួន​២​​គ្រាប់នៅម៉ោងប្រហែល ១០ព្រឹក(ម៉ោងក្នុងស្រុក) កាលពីថ្ងៃអង្គារ។ ​នេះ​​តាម​​​សារ​ព័ត៌មាន​ ដែល​យោងតាមសម្តីអ្នកនាំពាក្យកងទ័ព Arakan Army លោក Khaing Thukha ។

ក្នុងការវាយប្រហារនេះ ផ្ទះ១២ខ្នងត្រូវបានបំផ្លាញទាំងស្រុង ស្រប​ពេល​ដែល​សាកសព១៣ត្រូវបានរកឃើញ ហើយជាង២០នាក់បានរងរបួស។ ជនរងគ្រោះផ្សេងទៀតទំនងនៅតែជាប់នៅក្រោមគំនរបាក់បែក ដូច្នេះចំនួនអ្នកស្លាប់អាចកើនឡើង។

ការវាយប្រហារនេះកើតឡើងរតែមួយថ្ងៃ បន្ទាប់ពីរបបយោធាមីយ៉ាន់ម៉ាបានសម្លាប់កុមារយ៉ាងតិច ២៣នាក់ និងគ្រូបង្រៀន ២ នាក់នៅក្នុងការបំផ្ទុះគ្រាប់បែកនៅសាលារៀនមួយនៅតំបន់ Sagaing ភាគពាយ័ព្យ។

គួរបញ្ជាក់ថាកាលពីដើមខែនេះ របបយោធាភូមាបានពន្យាពេលបទឈប់បាញ់ប្រឆាំងនឹងក្រុមឧទ្ទាមជនជាតិភាគតិចរហូតដល់ថ្ងៃទី ៣១ ខែឧសភា ក្នុងកិច្ចខិតខំប្រឹងប្រែងដើម្បីកាត់បន្ថយផលប៉ះពាល់នៃការរញ្ជួយដីកាលពីថ្ងៃទី ២៨ ខែមីនា នៅក្នុងប្រទេសមីយ៉ាន់ម៉ា ប៉ុន្តែរបបនេះនៅតែបន្តធ្វើការវាយប្រហារឥតឈប់ឈរសម្លាប់ជនស៊ីវិលបន្តបន្ទាប់៕

អត្ថបទ៖ ប៊ុន សុភាព