ព័ត៌មានអន្ដរជាតិ

អតីតប្រធានាធិបតីកូរ៉េខាងត្បូង Yoon Suk Yeol ចាកចេញពីបក្ស PPP មុនការបោះឆ្នោត៣មិថុនា

បានផុស

១ year មុន

នៅ

ថ្ងៃសៅរ៍ ១៧ ឧសភា ២០២៥

ដោយ

Chheang

យោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី១៧ខែឧសភានេះ អតីតប្រធានាធិបតីកូរ៉េខាងត្បូង លោក Yoon Suk Yeol បានប្រកាសចាកចេញពីគណបក្សអំណាចប្រជាជនអភិរក្សនិយម (PPP) មុនការបោះឆ្នោតជ្រើសរើសប្រធានាធិបតីថ្មីថ្ងៃទី៣ខែមិថុនាខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដកវត្តមាននេះ ធ្វើឡើងនៅពេលដែលបេក្ខភាពប្រធានាធិបតីរបស់បក្ស PPP គឺលោក Kim Moon-soo ទទួលបានសម្លេងគាំទ្រតិចជាងមេដឹកនាំគណបក្សប្រជាធិបតេយ្យសេរី លោក Lee Jae-myung នៅក្នុងការស្ទង់មតិនាពេលថ្មីៗនេះ។

នៅក្នុងការបង្ហោះលើបណ្ដាញសង្គមហ្វេសប៊ុក លោក Yoon បាននិយាយថា៖ «ខ្ញុំចាកចេញពីគណបក្សអំណាចប្រជាជនដើម្បីបំពេញការទទួលខុសត្រូវរបស់ខ្ញុំ ដើម្បីការពារសាធារណរដ្ឋកូរ៉េសេរី»។ ទោះបីជាលោកលាលែងពីបក្សក៏ដោយ ក៏លោក Yoon បានសម្តែងការគាំទ្រចំពោះលោក Kim Moon-soo ដោយជំរុញឲ្យសាធារណជនគាំទ្របេក្ខជន PPP នៅក្នុងការបោះឆ្នោតខែក្រោយ។

សូមជម្រាបជាថ្មីថា កាលពីខែមេសា លោក Yoon ត្រូវបានដកតំណែងជាប្រធានាធិបតី បន្ទាប់ពីរងការចោទប្រកាន់ ពាក់ព័ន្ធនឹងការប្រកាសដ៏ចម្រូងចម្រាសនៃច្បាប់អាជ្ញាសឹកក្នុងខែធ្នូឆ្នាំ២០២៤។ ច្បាប់អាជ្ញាសឹកនាពេលនោះ បាននាំឲ្យមានភាពចលាចលនយោបាយពាសពេញផ្ទៃប្រទេស ហើយលោក Yoon រងការចោទប្រកាន់ជាបន្តបន្ទាប់ដោយតុលាការធម្មនុញ្ញ។ ឥឡូវនេះលោកកំពុងប្រឈមមុខនឹងការកាត់ក្តីព្រហ្មទណ្ឌពីបទបះបោរ ដែលជាបទចោទប្រកាន់ដែលអនុវត្តទោសទណ្ឌធ្ងន់ធ្ងរ។

គណបក្ស PPP របស់លោក Yoon បានជួបប្រទះនឹងភាពចលាចលផ្ទៃក្នុង មុនពេលការបោះឆ្នោតថ្មី។ អតីតនាយករដ្ឋមន្ត្រី លោក Han Duck-soo បានដកខ្លួនចេញពីការប្រកួតជ្រើសរើសបេក្ខភាពប្រធានាធិបតីបក្ស PPP ប៉ុន្មានសប្តាហ៍មុនការបោះឆ្នោត ក្នុងគោលបំណងបញ្ចប់ជម្លោះផ្ទៃក្នុង។ កាលពីថ្ងៃសៅរ៍សប្ដាហ៍មុន គណបក្ស PPP បានបញ្ជាក់ជាថ្មីថា លោក Kim Moon-soo ជាបេក្ខជនប្រធានាធិបតីរបស់ខ្លួន។

ការបោះឆ្នោតកូរ៉េខាងត្បូងលើកនេះ ផ្តោតជាសំខាន់លើការស្ដារស្ថិរភាពសេដ្ឋកិច្ច និងបញ្ហាធ្ងន់ធ្ងរដូចជា អត្រាកំណើតទាប ភាពអត់ការងារធ្វើរបស់យុវជន និងផលប៉ះពាល់នៃគោលនយោបាយពន្ធដាររបស់ប្រធានាធិបតីអាមេរិកលោក ដូណាល់ ត្រាំ៕