ព័ត៌មានអន្ដរជាតិ

កូរ៉េខាងត្បូង៖ បុរសម្នាក់ចាក់សម្លាប់មនុស្ស២នាក់និងរបួស២នាក់

បានផុស

១ year មុន

នៅ

ថ្ងៃអង្គារ ២០ ឧសភា ២០២៥

ដោយ

យោងតាមការចេញផ្សាយរបស់សារព័ត៌មាន CNA កាលពីថ្ងៃទី១៩ ខែឧសភា មានបុរសម្នាក់ប្រើកាំបិត វាយប្រហារដោយការចាក់ បណ្តាលឲ្យមនុស្ស ២ នាក់ស្លាប់ និង ២នាក់ទៀតរងរបួស ក្នុងខេត្ត Gyeonggi ប្រទេសកូរ៉េខាងត្បូង ជំរុញឱ្យមានប្រតិបត្តិការប៉ូលិសជាបន្ទាន់ និងការព្រមានសុវត្ថិភាពសាធារណៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អំពើហិង្សាបានកើតឡើងនៅក្នុងទីក្រុង Siheung ភាគខាងលិចនៃទីក្រុងសេអ៊ូល និងពាក់ព័ន្ធនឹងការវាយប្រហារជាច្រើននៅទីតាំងផ្សេងៗគ្នាក្នុងរយៈពេលត្រឹមតែប៉ុន្មានម៉ោង។

ជនសង្ស័យជាបុរសជនជាតិចិនអាយុ៥០ឆ្នាំ បានចាប់ផ្តើមការវាយប្រហាររបស់គាត់នៅម៉ោង ៩ និង ៣០ នាទីព្រឹកដោយការចាក់ស្ត្រីម្ចាស់ហាងអាយុ ៦០ឆ្នាំម្នាក់ នៅក្នុងសង្កាត់ Jeongwang-dong ។ ភ្លាមៗនោះ គាត់បានរត់គេចខ្លួនពីកន្លែងកើតហេតុ។ កម្លាំងប៉ូលិសបានចុះត្រួតពិនិត្យរថយន្តដែលភ្ជាប់នឹងជនសង្ស័យទៅលំនៅឋានមួយកន្លែង បានរកឃើញសាកសពម្ចាស់រថយន្ត ដោយសន្និដ្ឋានថា ជនសង្ស័យពិតជាបានប្រព្រឹត្តអំពើឃាតកម្មលើម្ចាស់រថយន្ត។

ប្រហែលពីរម៉ោងក្រោយមក ជនសង្ស័យបានវាយប្រហារបុរសម្នាក់អាយុ៧០ឆ្នាំ មុនពេលរត់គេចខ្លួនបន្តទៀត។ មួយសន្ទុះក្រោយមក សាកសពមួយទៀត ត្រូវបានគេរកឃើញ នៅក្បែរផ្ទះមួយកន្លែង ជិតកន្លែងវាយប្រហារដំបូង ដែលនាំឱ្យចំនួនអ្នកស្លាប់សរុបកើនដល់២នាក់។

ក្នុងអំឡុងពេលនៃការតាមប្រមាញ់នេះ អាជ្ញាធរក្រុង Siheung បានចេញការជូនដំណឹងចល័តបន្ទាន់ដោយព្រមានអ្នកស្រុកឱ្យស្នាក់នៅក្នុងផ្ទះ និងជៀសវាងតំបន់ដែលរងផលប៉ះពាល់។ ជនសង្ស័យ ជាបុរសទំពែកក្បាល ស្លៀកខោខ្មៅ និងអាវពណ៌ខៀវខ្ចី ។ ទោះយ៉ាងណាជនសង្ស័យត្រូវបានប៉ូលិសឃាត់ខ្លួនបាន និងបានសារភាពចំពោះការចោទប្រកាន់ទាំងអស់។ បច្ចុប្បន្នប៉ូលិសកំពុងស្រាវជ្រាវពីមូលហេតុនៃការវាយប្រហាររបស់ជនសង្ស័យ។

ហេតុការណ៍នេះបានធ្វើឲ្យប្រជាសហគមន៍ក្នុងតំបន់មានការភ្ញាក់ផ្អើល និងបានលើកឡើងពីការព្រួយបារម្ភអំពីសុវត្ថិភាពសាធារណៈក្នុងតំបន់លំនៅឋាន។ ចំណែកជនរងគ្រោះទាំងពីរនាក់ដែលនៅរស់រានមានជីវិតកំពុងទទួលការព្យាបាលនៅមន្ទីរពេទ្យ។ ករណីនេះស្ថិតក្រោមការស៊ើបអង្កេតយ៉ាងសកម្ម។

គួរបញ្ជាក់ថាករណីនេះកើតឡើងប៉ុន្មានខែបន្ទាប់ពីគ្រូបង្រៀនម្នាក់បានចាក់សម្លាប់សិស្សអាយុប្រាំបីឆ្នាំនៅសាលាបឋមសិក្សាមួយក្នុងប្រទេសកូរ៉េខាងត្បូង។

ទោះជាយ៉ាងណា កូរ៉េខាងត្បូងនៅតែជាប្រទេសដែលមានសុវត្ថិភាពបំផុត ជាមួយនឹងអត្រាឃាតកម្ម ១.៣ ក្នុង ១០០,០០០ នាក់ក្នុងឆ្នាំ ២០២១ នេះបើយោងតាមស្ថិតិផ្លូវការ ទាបជាងមធ្យមភាគពិភពលោកចំនួន ៦ នាក់ក្នុង ១០០,០០០ នាក់៕

អត្ថបទ៖ ប៊ុន សុភាព