ព័ត៌មានអន្ដរជាតិ

ណេតាន់យ៉ាហ៊ូ៖ ការគំរាមរបស់អង់គ្លេស-បារាំង-កាណាដា ដូចជាការឲ្យកាដូដ៏ធំដល់ក្រុមហាម៉ាស

បានផុស

១ year មុន

នៅ

ថ្ងៃអង្គារ ២០ ឧសភា ២០២៥

ដោយ

Chheang

នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ នៅថ្ងៃទី២០ខែឧសភានេះ បានរិះគន់នាយករដ្ឋមន្ត្រីអង់គ្លេសលោក Keir Starmer បន្ទាប់ពីចេញសេចក្តីថ្លែងការណ៍រួមមួយជាមួយសម្ព័ន្ធមិត្តបារាំង និងកាណាដា ដែលថ្កោលទោសប្រតិបត្តិការយោធារបស់អ៊ីស្រាអែលនៅតំបន់ហ្គាហ្សា និងគំរាមកំហែងចាត់វិធានការខ្លាំង បើការវាយលុក និងការទប់ស្កាត់ជំនួយមិនត្រូវបានបញ្ឈប់។ លោក ណេតាន់យ៉ាហ៊ូ បានប្រដូចការព្រមានរបស់ប្រជាជាតិទាំងបីទៅនឹងការឲ្យកាដូធំមួយដល់ក្រុមសកម្មប្រយុទ្ធហាម៉ាស។

លោក បេនចាមីន ណេតាន់យ៉ាហ៊ូ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ណេតាន់យ៉ាហ៊ូ បាននិយាយថា អ៊ីស្រាអែលនឹងបន្តសម្រេចឲ្យបាននូវ«ជ័យជម្នះទាំងស្រុង»លើក្រុមហាម៉ាស។ មេដឹកនាំអ៊ីស្រាអែល បានបន្ថែមថា «តាមរយៈការសុំឲ្យអ៊ីស្រាអែលបញ្ចប់សង្រ្គាមការពារសម្រាប់ការរស់រានមានជីវិតរបស់យើងមុនពេលក្រុមភេរវករហាម៉ាសនៅតាមព្រំដែនរបស់យើងត្រូវបានកម្ចាត់ និងតាមរយៈការទាមទារនៃរដ្ឋប៉ាឡេស្ទីន មេដឹកនាំនៅទីក្រុងឡុងដ៍ អូតាវ៉ា និងប៉ារីស កំពុងផ្តល់រង្វាន់ដ៏ធំសម្រាប់ការវាយប្រហារប្រល័យពូជសាសន៍លើអ៊ីស្រាអែលនៅថ្ងៃទី៧ខែតុលា ខណៈពេលដែលបណ្ដែតបណ្ដោយឲ្យមានអំពើឃោរឃៅបែបនេះបន្ថែមទៀត»។

លោក ណេតាន់យ៉ាហ៊ូ បានសង្កត់ធ្ងន់ថា សង្គ្រាមអាចចប់ភ្លាមៗ ដរាបណាចំណាប់ខ្មាំងដែលនៅសេសសល់ទាំងអស់ត្រូវដោះលែង ហាម៉ាសព្រមទម្លាក់អាវុធចុះ ហើយមេដឹកនាំរបស់ហាម៉ាសត្រូវនិរទេសខ្លួន ព្រមទាំងការធានាថាហ្គាហ្សាលែងជាតំបន់មានយោធា។

សូមជម្រាបថា លោក Keir Starmer នាយករដ្ឋមន្ត្រីអង់គ្លេស, លោក Emmanuel Macron ប្រធានាធិបតីបារាំង និងលោក Mark Carney នាយករដ្ឋមន្ត្រីកាណាដា បានថ្កោលទោសសកម្មភាពរបស់អ៊ីស្រាអែលថាជាទង្វើហួសហេតុ ហើយបានទាមទារឲ្យបញ្ចប់ជាបន្ទាន់ចំពោះប្រតិបត្តិការយោធាជាថ្មី និងការរឹតបន្តឹងលើជំនួយនៅតំបន់ហ្គាហ្សា។ ពួកគេបានសង្កត់ធ្ងន់ថា ជំនួយមានកម្រិតដែលអនុញ្ញាតឲ្យចូលទៅក្នុងហ្គាហ្សាគឺមិនគ្រប់គ្រាន់ទេ ចំពេលមានការព្រមានអំពីគ្រោះទុរ្ភិក្សដែលជិតមកដល់។

មេដឹកនាំទាំងបី បាននិយាយថា «យើងតែងតែគាំទ្រសិទ្ធិរបស់អ៊ីស្រាអែលក្នុងការការពារជនជាតិអ៊ីស្រាអែលប្រឆាំងនឹងអំពើភេរវកម្ម។ ប៉ុន្តែការកើនឡើងភាពតានតឹងនេះគឺមិនសមាមាត្រទាំងស្រុង។ យើងនឹងមិនគាំទ្រខណៈរដ្ឋាភិបាលលោក ណេតាន់យ៉ាហ៊ូ នៅតែបន្តសកម្មភាពដ៏ឃោរឃៅទាំងនេះទេ។ បើអ៊ីស្រាអែលមិនបញ្ឈប់ការវាយលុកយោធាជាថ្មី ហើយដកការរឹតបន្តឹងលើជំនួយមនុស្សធម៌ យើងនឹងចាត់វិធានការដ៏ខ្លាំងក្លាបន្ថែមទៀតជាការឆ្លើយតប»៕