Macron ចេញមុខបកស្រាយថា លោកនិងភរិយាគ្រាន់ញោះគ្នាលេងប៉ុណ្ណោះ 

ក្រោយផ្ទុះវីដេអូជំទាវ Brigitte រុញមុខស្វាមី Emmanuel Macron ក្នុងយន្តហោះនៅពេលចុះចតនៅលើទឹកដីវៀតណាម សម្រាប់ដំណើរទស្សនកិច្ចផ្លូវរដ្ឋកាលពីរាត្រីថ្ងៃអាទិត្យទី២៥ខែឧសភាឆ្នាំ២០២៥ ពេលនេះប្រធានាធិបតីបារាំង Emmanuel Macron បានចេញមុខបកស្រាយហើយថា លោកនិងភរិយាមិនមានទាស់គ្នាអ្វីទេ ពោលគឺអ្នកទាំងពីរគ្រាន់ញោះគ្នាលេងប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងវីដេអូដែលចែកចាយពេញបណ្តាញសង្គមដ៏ល្បីកក្រើក គេឃើញប្រធានាធិបតីបារាំង ត្រូវភរិយារុញមុខ ពេលទ្វារយន្តហោះបើក នៅឯអាកាសយានដ្ឋានអន្តរជាតិ Noi Bai នៃទីក្រុងហាណូយ ហើយក្រោ​យចុះយន្តហោះ គេក៏ចាប់អារម្មណ៍ឃើញលោក Macron ដើរក្តាប់ដៃ ហាក់ដូចជាមានកំហឹងផងដែរ។

ទោះបីជាយ៉ាងណាក៏ដោយ ថ្លែងប្រាប់អ្នកសារព័ត៌មានកាលពីថ្ងៃចន្ទទី២៦ខែឧសភា លោក Macron ​និយាយថា «ពិតជាស្មានមិនដល់មែន ដែលគ្រប់គ្នាត្រូវមកជជែកវែកញែកគ្នាអំពីរឿងនេះ។ មានវីដេអូដែលខ្ញុំនិងភរិយាញោះគ្នាលេង ប៉ុន្តែវាបែរជាធ្វើឲ្យគ្រប់គ្នាលើកជាប្រធានបទមកជជែកទៅវិញ»។

ទោះបីជាយ៉ាងណាក៏ដោយ វិមាន Elysee មិនបានចេញបកស្រាយអ្វីទេជុំវិញរឿងនេះ។

សូមជម្រាបថា លោក Macron មកបំពេញទស្សនកិច្ចផ្លូវរដ្ឋជាមួយភរិយា តបតាមការអញ្ជើញរបស់ប្រធានាធិបតីវៀតណាម Luong Cuong ដើម្បីពិភាក្សាលើបញ្ហាសំខាន់ៗនិងស៊ីញេកិច្ចព្រមព្រៀង ជាច្រើន។

ដើមឡើយ លោក Macron គឺជាកូនសិស្សរបស់អ្នកនាង Brigitte ប៉ុន្តែអ្នកទាំងពីរ បានរៀបការជាមួយគ្នាក្នុងឆ្នាំ២០០៧។ Brigitte បង Macron ២៤ឆ្នាំ ដែលកត្តាអាយុនេះបង្កការញញែកវែកញែករួចមកហើយនៅក្នុងប្រទេសបារាំង៕

អត្ថបទ៖ សុខ សុវណ្ណ

ចុចអាន៖ Macron ចាប់ផ្តើមទស្សនកិច្ចផ្លូវរដ្ឋនៅ វៀតណាម ជាមួយការចុះហត្ថលេខាលើកិច្ចព្រមព្រៀងសំខាន់ៗ