លោក Lee Jae-myung ចូលកាន់តំណែងជាប្រធានាធិបតីកូរ៉េខាងត្បូង សន្យាស្ដារ​សេដ្ឋកិច្ច​ឡើង​វិញ

ប្រធានាធិបតីជាប់ឆ្នោតថ្មីរបស់កូរ៉េខាងត្បូងលោក Lee Jae-myung បានចាប់ផ្ដើម​កាន់​តំណែង​ជា​ផ្លូវការ​ពី​ថ្ងៃ​ពុធ​ទី​៤ ខែ​មិថុនា​នេះ​ត​ទៅ ជាមួយនឹងការសន្យាយ៉ាងម៉ឺងម៉ាត់ក្នុងការធ្វើ​ឲ្យ​សេដ្ឋកិច្ចរបស់​កូរ៉េ​ខាង​ត្បូង​រស់ឡើងវិញ និង​ចាត់វិធានការ​លើ​អ្នក​ទាំង​ឡាយ​ណា​ដែល​ពាក់ព័ន្ធ​នឹង​ការដាក់ច្បាប់អាជ្ញាសឹកកាលពីឆ្នាំមុន ដែល​បង្ក​ភាព​វឹកវរ​ពាសពេញ​​ផ្ទៃ​ប្រទេស។

លោក Lee ដែលជាអតីតមេធាវីសិទ្ធិមនុស្ស និងជាមេដឹកនាំគណបក្សប្រជាធិបតេយ្យសេរី បានឈ្នះការបោះឆ្នោតជ្រើសរើសប្រធានាធិបតីដោយសំឡេងគាំទ្រ ៤៩,៤២% ដោយផ្តួលបេក្ខជន​បក្ស​អភិរក្សនិយមលោក Kim Moon-soo ដែល​មាន​សំឡេង​គាំទ្រ​ត្រឹម ៤១,១៥%។ ការបោះឆ្នោតជាតិ​នេះ ត្រូវបាន​ធ្វើ​​ឡើង​បន្ទាប់​ពី​មាន​ការចោទប្រកាន់ និងការដកតំណែងអតីតប្រធានាធិបតី Yoon Suk Yeol ដែលបានប្រកាសច្បាប់អាជ្ញាសឹក​កាល​ពី​ខែធ្នូ ឆ្នាំ​២០២៤ និង​បង្ក​ឲ្យ​មាន​ការជាប់គាំងនយោបាយ។

នៅក្នុងសុន្ទរកថាដំបូងរបស់គាត់ក្នុងនាមជាប្រធានាធិបតី លោក Lee បានហៅការបោះឆ្នោតថា​ជា «សាលក្រម​លើការរំលោភបំពានអំណាច» ហើយបានប្តេជ្ញាថា«នឹងមិន​ធ្វើ​​ឲ្យ​លទ្ធិប្រជាធិបតេយ្យត្រូវ​រង​​ការ​គំរាមកំហែងដោយការធ្វើអន្តរាគមន៍​យោធាខុសច្បាប់ទៀតទេ»។ លោកបានបន្ថែមថា «ប្រជាជនបាននិយាយយ៉ាងច្បាស់។ ការទាមទាររបស់ពួកគេគឺសម្រាប់យុត្តិធម៌ ស្ថិរភាព និងកំណែទម្រង់សេដ្ឋកិច្ច»។

គោល​នយោបាយ​អាទិភាពភ្លាមៗរបស់លោក Lee រួមមាន ការដោះស្រាយអតិផរណា ការជំរុញការបង្កើតការងារ និងការដោះស្រាយជម្លោះពាណិជ្ជកម្មជាមួយដៃគូសំខាន់ៗ ជាពិសេសសហរដ្ឋអាមេរិក ទាក់ទិន​នឹង​ការ​ដំឡើង​​ពន្ធ​នា​ពេល​ថ្មីៗ​នេះ។

ចំពោះ​គោលនយោបាយការបរទេស លោក Lee បាន​បញ្ជាក់ឡើងវិញនូវសម្ព័ន្ធភាពជាយុទ្ធសាស្ត្រជាមួយទីក្រុងវ៉ាស៊ីនតោន និងការគាំទ្រសម្រាប់កិច្ចសហប្រតិបត្តិការក្នុងតំបន់ជាមួយប្រទេសជប៉ុន។ លោកក៏បានបង្ហាញពីឆន្ទៈក្នុងការបន្តទំនាក់ទំនងការទូតជាមួយកូរ៉េខាងជើង និងស្តារទំនាក់ទំនងស្ថិរភាព​សេដ្ឋកិច្ច​​ឡើងវិញ​ជាមួយប្រទេសចិន៕

ដោយ៖ ឈាង