មេទ័ពមីយ៉ាន់ម៉ា ជប់លៀងផឹកស៊ីហ៊ឹកហ៊ាក់ នៅថ្ងៃមនុស្សជាង១០០នាក់ត្រូវបានសម្លាប់

មេបញ្ជាការកងទ័ពមីយ៉ាន់ម៉ាលោក Min Aung Hlaing បានរៀបចំពិធីជប់លៀងអាហារពេលល្ងាចដ៏ហ៊ឹកហ៊ាក់កាលពីយប់ថ្ងៃសៅរ៍ បន្ទាប់ពីកងទ័ពរបស់លោកបាញ់សម្លាប់មនុស្សជាង១០០នាក់ នៅថ្ងៃដែលមានការបង្ហូរឈាមបំផុតចាប់តាំងពីរដ្ឋប្រហារថ្ងៃទី១ខែកុម្ភៈមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបថតរបស់លោកឧត្តមសេនីយ៍ក្នុងឯកសណ្ឋានយោធាពណ៌ស ដើរលើកម្រាលព្រំពណ៌ក្រហម ហើយស្វាគមន៍ភ្ញៀវក្នុងកម្មវិធីអាហារពេលល្ងាច ត្រូវបានគេបង្ហោះលើបណ្តាញសង្គមកាលពីចុងសប្តាហ៍។

CNN បានឲ្យដឹងថា កម្មវិធីអាហារពេលល្ងាចផឹកស៊ីហ៊ឹកហ៊ាក់នេះ ត្រូវបានធ្វើឡើងសម្រាប់អបអរទិវាកងកម្លាំងប្រដាប់អាវុធ ដែលរំលឹកដល់ការចាប់ផ្តើមនៃចលនាតស៊ូរបស់មីយ៉ាន់ម៉ា ប្រឆាំងការកាន់កាប់របស់ជប៉ុនអំឡុងសង្គ្រាមលោកលើកទី២។

យោងតាមសារព័ត៌មាន BBC បានឲ្យដឹងថា តំណាងមកពីប្រទេសរុស្ស៊ី ចិន ឥណ្ឌា ប៉ាគីស្ថាន បង់ក្លាដែស វៀតណាម ឡាវនិងថៃបានចូលរួមពិធីជប់លៀងអាហារពេលល្ងាចកាលពីថ្ងៃសៅរ៍នេះ។

កងទ័ព បានសម្លាប់មនុស្សយ៉ាងតិច១១៤នាក់កាលពីថ្ងៃសៅរ៍ ដោយរាប់បញ្ចូលទាំងកុមារផងដែរ។

យ៉ាងណាក្តី អង្គការសហប្រជាជាតិបានដាក់ចំនួនអ្នកស្លាប់ត្រឹម១០៧នាក់ ខណៈដែលទូរទស្ស​ន៍ Myawaddy TV ដែលគ្រប់គ្រងដោយយោធាបានផ្សាយថា មានត្រឹម៤៥នាក់ប៉ុណ្ណោះ។

BBC បានឲ្យដឹងថា កងទ័ពហាក់ដូចជាបាញ់សម្លាប់អ្នកណាក៏ដោយ ដែលពួកគេបានឃើញនៅតាមដងផ្លូវកាលពីថ្ងៃសៅរ៍។ កងកម្លាំងសន្តិសុខបានបាញ់ចូលអគារលំនៅដ្ឋាន ហើយបើកការវាយឆ្មក់ពេលយប់និងចាប់ខ្លួន។

យោងតាមតួលេខចុងក្រោយបំផុតបានបង្ហាញថា ចំនួនអ្នកស្លាប់ក្នុងភាពចលាចលនៅប្រទេសប្រទេសមីយ៉ាន់ម៉ា បានកើនលើស៥០០នាក់ហើយ គិតត្រឹមថ្ងៃអង្គារនេះ។

​ ​សមាគម​ជំនួយ​សម្រាប់​អ្នក​ទោសនយោបាយ (AAPP) បាន​និយាយថា ជន​ស៊ីវិល​១៤​នាក់​ត្រូវ​បាន​សម្លាប់​កាល​ពី​ថ្ងៃ​ចន្ទ ម្សិល​មិញហើយ​ ​៨​នាក់​ត្រូវ​បាន​សម្លាប់​នៅ​ខណ្ឌ South Dagon ក្នុង​ទី​ក្រុង​យ៉ាំងហ្គោន៕

ប្រែសម្រួលដោយ៖ Vann Vann

ប្រភព៖ Business Insider

ចុចអាន៖ ប្រទេសលោកខាងលិច​ បង្កើនសម្ពាធលើយោធាមីយ៉ាន់ម៉ា