ព័ត៌មានអន្ដរជាតិ

ហាម៉ាស ប្រាប់ថាមិនបដិសេធសំណើអាមេរិកទេ តែគ្រាន់ចង់កែលក្ខខណ្ឌចំនួន៤

បានផុស

៣០ វិនាទី មុន

នៅ

ថ្ងៃសុក្រ ៦ មិថុនា ២០២៥

ដោយ

Chheang

លោក Khalil al-Hayya មន្ត្រីជាន់ខ្ពស់ និងជាប្រធានក្រុមចរចារបស់ហាម៉ាស បាននិយាយកាលពីថ្ងៃព្រហស្បតិ៍ទី៥ខែមិថុនាថា ក្រុមសកម្មប្រយុទ្ធប៉ាឡេស្ទីនមិនបានបដិសេធសំណើបទឈប់បាញ់ចុងក្រោយដែលគាំទ្រដោយសហរដ្ឋអាមេរិកសម្រាប់តំបន់ហ្គាហ្សានោះទេ ប៉ុន្តែបានស្នើសុំការកែប្រែខ្លះដើម្បីធានាដល់ការបញ្ចប់អរិភាពជាអចិន្ត្រៃយ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក al-Hayya បានសង្កត់ធ្ងន់លើការត្រៀមខ្លួនរបស់ក្រុមដើម្បីចូលរួមក្នុងការចរចា «ថ្មី និងច្បាស់លាស់» ក្នុងគោលបំណងសម្រេចបានបទឈប់បាញ់យូរអង្វែង ការដកកងកម្លាំងអ៊ីស្រាអែលចេញពីតំបន់ហ្គាហ្សា និងលំហូរនៃជំនួយមនុស្សធម៌ដែលគ្មានការរារាំង។

សំណើរបស់អាមេរិក ដែលសម្របសម្រួលដោយបេសកជនពិសេស Steve Witkoff រួមមាន បទឈប់បាញ់រយៈពេល ៦០ថ្ងៃ ការផ្លាស់ប្តូរចំណាប់ខ្មាំងអ៊ីស្រាអែល ២៨នាក់សម្រាប់អ្នកទោសប៉ាឡេស្ទីនជាង ១ ២០០នាក់ និងបង្កើនជំនួយមនុស្សធម៌ដល់តំបន់ហ្គាហ្សា។ ខណៈពេលដែលក្រុមហាម៉ាសប្រកាសថាមិនបដិសេធចំពោះសំណើនេះ ខ្លួនបានស្នើឲ្យមានការកែប្រែលក្ខខណ្ឌសំខាន់ៗចំនួន៤ ដូចជា៖

ការបន្តកិច្ចចរចាទៀតបន្ទាប់ពីបទឈប់បាញ់រយៈពេល ៦០ថ្ងៃត្រូវបានអនុវត្ត រហូតដល់បទឈប់បាញ់ជាអចិន្ត្រៃយ៍ត្រូវបានសម្រេច ក្រោមការត្រួតពិនិត្យរបស់សហរដ្ឋអាមេរិក អេហ្ស៊ីប និងកាតា។
ការទទួលបានជំនួយមនុស្សធម៌ដែលមិនមានការរឹតបន្តឹងទៅកាន់គ្រប់ផ្នែកទាំងអស់នៃតំបន់ហ្គាហ្សា ដែលសម្របសម្រួលដោយអង្គការសហប្រជាជាតិ និងអឌ្ឍចន្ទក្រហម។
ការដកកងកម្លាំងអ៊ីស្រាអែលទៅកាន់ទីតាំងដើមនៅមុនថ្ងៃទី២ខែមីនាឆ្នាំ២០២៥ បន្ទាប់ពីកិច្ចព្រមព្រៀងត្រូវបានសម្រេចរយៈពេល១សប្ដាហ៍។
ការផ្ទេរអភិបាលកិច្ចភ្លាមៗនៅហ្គាហ្សាទៅស្ថាប័នឯករាជ្យជាតិប៉ាឡេស្ទីនដែលមានជំនាញវិជ្ជាជីវៈ បន្ទាប់ពីការប្រកាសនៃកិច្ចព្រមព្រៀងនេះ។

លោក Al-Hayya ក៏បានសម្តែងនូវឆន្ទៈរបស់ក្រុមហាម៉ាសក្នុងការ «ប្រគល់រដ្ឋាភិបាលនៅហ្គាហ្សាភ្លាមៗទៅឲ្យស្ថាប័នជាតិប៉ាឡេស្ទីនដែលមានជំនាញវិជ្ជាជីវៈណាមួយដែលបានព្រមព្រៀងគ្នា» ដែលបង្ហាញពីការបើកចំហចំពោះការផ្លាស់ប្តូររចនាសម្ព័ន្ធអភិបាលកិច្ចដែលជាផ្នែកមួយនៃដំណើរការសន្តិភាព។

ទោះបីជាមានការស្នើវិសោធនកម្មទាំងនេះក៏ដោយ បេសកជនអាមេរិកលោក Steve Witkoff និងនាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ បានចាត់ទុកការឆ្លើយតបរបស់ក្រុមហាម៉ាសថា «មិនអាចទទួលយកបានទាំងស្រុង» ដោយលើកឡើងពីការព្រួយបារម្ភលើការទាមទាររបស់ក្រុមសម្រាប់បទឈប់បាញ់ជាអចិន្ត្រៃយ៍ និងការដកទ័ពអ៊ីស្រាអែលចេញទាំងស្រុងពីតំបន់ហ្គាហ្សា។

សូមជម្រាបថា ជម្លោះដែលកំពុងបន្តបានបណ្តាលឲ្យមានវិបត្តិមនុស្សធម៌យ៉ាងធ្ងន់ធ្ងរនៅតំបន់ហ្គាហ្សា ដោយជនជាតិប៉ាឡេស្ទីនជាង ៥៤ ០០០នាក់ត្រូវបានគេរាយការណ៍ថាបានស្លាប់ចាប់តាំងពីការកើតឡើងនៃអរិភាពក្នុងឆ្នាំ២០២៣។ កិច្ចខិតខំប្រឹងប្រែងដើម្បីឈានដល់បទឈប់បាញ់ដ៏ទូលំទូលាយនៅតែបន្ត ដោយមានអ្នកសម្រុះសម្រួលមកពីសហរដ្ឋអាមេរិក អេហ្ស៊ីប និងកាតា ចូលរួមជាមួយភាគីទាំង២ ដើម្បីដោះស្រាយបញ្ហាដែលជាប់គាំងក្នុងដំណើរឆ្ពោះទៅរកសន្តិភាព៕