ប៉ូលិសថៃ រកឃើញគ្រាប់បែក ដែលគេបម្រុងនឹងបំផ្ទុះនៅខេត្ត Pattani

ស្ថានភាពនៅភាគខាងត្បូងប្រទេសថៃ នៅតែក្តៅ ដោយអំពើហិង្សាចេះតែកើតឡើងជាបន្តបន្ទាប់ ខណៈនាព្រឹកថ្ងៃចន្ទទី៩ខែមិថុនាឆ្នាំ២០២៥ ប៉ូលិសបានរកឃើញគ្រាប់បែកមួយគ្រាប់ដែលគេបង្កៃចោលបម្រុងនឹងបំផ្ទុះ ប៉ុន្តែបានដោះទាន់ពេល នៅក្នុងខេត្ត Pattani។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bankok Post, នេះគឺជាគ្រាប់បែកមួយស្ថិតក្នុងចំណោមគ្រាប់បែក៣គ្រាប់ ដែលគេបង្កៃក្នុងផ្សាររាត្រីក្រុង Pattani។

ទោះបីជាយ៉ាងណាក៏ដោយ គ្រាប់បែកចំនួន២ទៀតបានផ្ទុះកាលពីរាត្រីថ្ងៃអាទិត្យ ដោយបណ្តាលឲ្យមានមនុស្សរងរបួសនិងបង្កការខូចខាត គ្រាន់បើ។ លុះមកដល់ព្រឹកថ្ងៃចន្ទ គ្រាប់បែកទី៣ ត្រូវបានរកឃើញហើយក្រុមជំនាញចាយពេលមួយម៉ោងកន្លះ ដើម្បីដោះ។

អំពើហិង្សានៅភាគខាងត្បូងប្រទេសថៃមិនថមថយឡើយ បើទោះជាមានកិច្ចប្រឹងប្រែងចរចាសន្តិភាពក៏ដោយ។ បើគិតចាប់តាំងពីឆ្នាំ២០០៤មក ជម្លោះដ៏រ៉ាំរ៉ៃនៅភាគខាងត្បូងប្រទេសថៃ បានឆក់យកជីវិតមនុស្សជាង ៧ ០០០នាក់ និងបណ្តាលឲ្យរាប់ម៉ឺននាក់ទៀតរងរបួស។

សម្រាប់ការវាយប្រហារចុងក្រោយបំផុតគឺកើតឡើងកាលពីសប្តាហ៍មុន ដែលយោធាថៃម្នាក់ឈ្មោះ Apichart Phaphan ក៏ត្រូវបាត់បង់ជីវិត ក្នុងការវាយប្រហារបំផ្ទុះគ្រាប់បែកនៅខេត្ត Pattani នេះដែរ។

រូបគេស្លាប់ដោយសារតែផ្ទុះគ្រាប់បែកដែលបង្កៃលើផ្លូវហាយវ៉េលេខ ៤១៥៧ ក្នុងស្រុក Panare ខណៈមានសេចក្តីរាយការណ៍ថា ហេតុការណ៍នេះកើតឡើង ពេលយោធាមួយក្រុម ធ្វើដំណើរមកពីកម្មវិធីមួយ ដែលរៀបចំដោយរដ្ឋបាលស្រុកនេះ។

ក្រៅពីអ្នកស្លាប់ហើយនោះ ក៏មានមន្ត្រីយោធា៤នាក់ផ្សេងទៀតត្រូវរបួសផងដែរ ក្នុងនោះមានម្នាក់របួសធ្ងន់ ហើយត្រូវបានបញ្ជូនទៅកាន់មន្ទីរពេទ្យស្រុក Panare ភ្លាមៗ៕

អត្ថបទ៖ សុខ សុវណ្ណ

ចុចអាន៖ ផ្ទុះគ្រាប់បែក២គ្រាប់ នៅកណ្តាលផ្សារ ភាគខាងត្បូងប្រទេសថៃ