យន្តហោះ Air India ត្រូវចុះចតនៅភូកេត ជាបន្ទាន់ ព្រោះមានការគំរាមបំផ្ទុះគ្រាប់បែក

យន្តហោះរបស់ក្រុមហ៊ុនអាកាសចរណ៍ឥណ្ឌា «Air India» មួយគ្រឿងផ្ទុកអ្នកដំណើរ ១៥៦នាក់ត្រូវបង្ខំចិត្តចុះចតជាបន្ទាន់នៅកោះភូកេតប្រទេសថៃ ដោយសារមានការគំរាមបំផ្ទុះគ្រាប់បែកនៅលើយន្តហោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Khaosod ចុះផ្សាយថា យន្តហោះនេះគឺជាជើងហោះហើរ AI 379 ហោះចេញពីខេត្តភូកេត នៅម៉ោង៩:៣០នាទីព្រឹក ឆ្ពោះទៅកាន់រដ្ឋធានី ញូវដែលី នៃប្រទេសឥណ្ឌា ប៉ុន្តែវាត្រូវហោះសំកាំងលើសមុទ្រAndaman ហើយបកមកចុះចតនៅភូកេតវិញជាបន្ទាន់។

តាមការបញ្ជាក់ពីលោក Montchai Tanode នាយកអាកាសយានដ្ឋានភូកេត, អាកាសយានិកបានរកឃើញក្រដាសសរសេរគំរាមបំផ្ទុះគ្រាប់បែកនៅក្នុងបន្ទប់ទឹកយន្តហោះ ដូចនេះមន្ត្រីអាកាសយានដ្ឋានក៏សម្រេចស្នើឲ្យយន្តហោះចុះចតជាបន្ទាន់តែម្តង។

ទោះបីជាយ៉ាងណាក៏ដោយមន្ត្រីអាកាសយានដ្ឋានថៃ មិនបកស្រាយលម្អិតអំពីករណីនេះទេ។

ហេតុការណ៍នេះកើតឡើងមួយថ្ងៃប៉ុណ្ណោះ បន្ទាប់ពីយន្តហោះរបស់ក្រុមហ៊ុន Air India ដូចគ្នានេះ បានធ្លាក់នៅប្រទេសឥណ្ឌា សម្លាប់មនុស្ស២៤១នាក់។

​យន្តហោះរបស់ក្រុម​​​ហ៊ុន​អាកាស​ច​​រណ៍​ឥណ្ឌានេះ មានដឹកមនុស្ស​​​​​​២៤២​នាក់ ក្នុងដំណើរចេញពីទីក្រុង Ahmedabad នៃប្រទេសឥណ្ឌា ឆ្ពោះ​ទៅ​​​​ព្រលាន​យន្តហោះ Gatwick ​នៃ​ទីក្រុង​ឡុង​ដ៍​ចក្រភព​អង់គ្លេស​។ វា​​បាន​ធ្លាក់​​​​ភ្លាម​ៗ​ ក្រោយ​​ហោះ​​ឡើង​​​​​​​​ក្នុង​ទីក្រុង Ahmedabad ​ភាគខាងលិច​​ប្រទេសឥណ្ឌា មិនបានប៉ុន្មាននាទីផង។

យ៉ាងណា មានបុរសមហាសំណាងម្នាក់ ឈ្មោះ Ramesh Viswashkumar ជាជនជាតិអង់គ្លេសដើមកំណើតឥណ្ឌា​អាយុ៤០ឆ្នាំ ដែលជាមនុស្សម្នាក់គត់នៅរស់ពីសោកនាដកម្មនេះ ព្រោះគាត់អង្គុយនៅកៅអី 11A ជាប់ច្រកគ្រាអាសន្ន ហើយបានលោតចុះតាមទ្វារនោះ ពេលយន្តហោះរៀបនឹងធ្លាក់ដល់ដី៕

អត្ថបទ៖ សុខ សុវណ្ណ

ចុចអាន៖ អ្នកជំនាញ​នានា វិភាគមូលហេតុធ្លាក់យន្តហោះ Air India