ហេតុការណ៍ធ្លាក់យន្តហោះ Air India ប៉ះពាល់ដល់ផែនការកំណែទម្រង់​ឡើងវិញរបស់ថៅកែ​ក្រុមហ៊ុន​ថ្មី

ការធ្លាក់យន្តហោះ Air India ដ៏សាហាវនៅទីក្រុង Ahmedabad រដ្ឋ Gujarat ប្រទេសឥណ្ឌាដែលបានសម្លាប់មនុស្ស ២៤១នាក់ ក្លាយជាផលប៉ះពាល់យ៉ាងធ្ងន់ធ្ងរដល់កិច្ចខិតខំប្រឹងប្រែងរបស់ក្រុមហ៊ុនអាកាសចរណ៍ក្នុងការកសាងឡើងវិញក្រោមកម្មសិទ្ធិឯកជនថ្មី។ នេះបើយោងតាមការចេញផ្សាយរបស់កាសែត The New York Times នៅថ្ងៃទី១៤ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន Tata Group បានកាន់កាប់ក្រុមហ៊ុន Air India ក្នុងឆ្នាំ២០២២ បន្ទាប់ពីសេវាកម្មមិនល្អ និង​បញ្ហា​សុវត្ថិភាពជាច្រើនទសវត្សរ៍ក្រោមការគ្រប់គ្រងរបស់រដ្ឋាភិបាល។ រដ្ឋាភិបាលឥណ្ឌា បានលក់ក្រុមហ៊ុនអាកាសចរណ៍ទៅឱ្យក្រុមហ៊ុន Tata Group ដែលជាស្ថាបនិកដើមក្នុងតម្លៃ ៣៥០លានដុល្លារ ដោយសង្ឃឹមថា ការគ្រប់គ្រងឯកជននឹងនាំមកនូវកំណែទម្រង់ដែលល្អ​ប្រសើរ​ជាង​មុន។

ចាប់តាំងពីពេលនោះមក Tata Group បានព្យាយាមកែលម្អក្រុមហ៊ុនអាកាសចរណ៍ដោយជួលអ្នកដឹកនាំថ្មី បញ្ជាយន្តហោះថ្មីរាប់រយគ្រឿង និងរួមបញ្ចូលគ្នានូវក្រុមហ៊ុនអាកាសចរណ៍តូចៗ ដោយ Tata​ Group នាំ​យក​នាយក​ប្រតិបត្តិ​បរទេស​លោក Campbell Wilson ហើយ​បាន​ធ្វើ​ការ​បញ្ជា​ទិញ​យន្តហោះ​ថ្មី​ចំនួន ៥៧០ ពី​ក្រុមហ៊ុន Boeing និង Airbus។ ថ្វីបើមានការខិតខំប្រឹងប្រែងទាំងនេះក៏ដោយ ក៏វឌ្ឍនភាពមានភាពយឺតយ៉ាវ ខណៈការធ្លាក់យន្តហោះនេះរឹតតែគំរាមកំហែងធ្វើឱ្យកិច្ចខិតខំប្រឹងប្រែងទាំងនេះថយចុះ និងធ្វើឱ្យខូចទំនុកចិត្តសាធារណៈ។

គួរបញ្ជាក់ថា មូលហេតុ​នៃ​ការ​ធ្លាក់​យន្តហោះ​នេះ​កំពុង​ស្ថិត​ក្រោម​ការ​ស៊ើបអង្កេត​នៅឡើយ​។ ពីមុន ក្រុមហ៊ុន Air India មិន​ធ្លាប់​ជួប​ឧបទ្ទវហេតុ​ធ្ងន់ធ្ងរ​ទេ ចាប់​តាំង​ពី​ Tata ​ចូល​គ្រប់គ្រង។ ការធ្លាក់នេះគឺជាការបរាជ័យដ៏ធំមួយសម្រាប់ផែនការរបស់ក្រុមហ៊ុនក្នុងការធ្វើឱ្យប្រសើរឡើង និងក្លាយជាក្រុមហ៊ុនអាកាសចរណ៍កំពូលនៅលើពិភពលោក។ ជាមួយគ្នានេះអ្នកជំនាញនិយាយថា ការដោះស្រាយបញ្ហាទាំងអស់នឹងត្រូវការពេលវេលា៕

អត្ថបទ៖​ ប៊ុន សុភាព