អ៊ីស្រាអែលបន្តវាយប្រហារនៅ​ហ្គាហ្សា​ឥតបន្ធូរ​ដៃ សម្លាប់ដោយ​ទាំងអ្នកកំពុងចាំបើកជំនួយ

យោងតាមប្រភពពេទ្យ យ៉ាងហោចណាស់ជនជាតិប៉ាឡេស្ទីន ៤៣នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែល​នៅទូទាំងតំបន់ហ្គាហ្សាកាលពីថ្ងៃចន្ទ រួមទាំងមនុស្ស១៣នាក់ត្រូវបានបាញ់សម្លាប់ពេលកំពុងស្វែងរកអាហារនៅកន្លែងចែកចាយជំនួយ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៤ខែមិថុនានេះ។

ការ​វាយ​ប្រហារ​ចុង​ក្រោយ​នេះ​បាន​បង្កើន​ចំនួន​អ្នក​ស្លាប់​នៅ​ហ្គាហ្សា​ដល់​ជាង ​៥៦០០០​នាក់​ ចាប់​តាំង​ពី​សង្គ្រាម​បាន​ចាប់​ផ្តើម​ជិត​២០​ខែ​មុន។ ជនរងគ្រោះជាច្រើននាក់បានព្យាយាមចូលទៅទទួលអាហារនៅមជ្ឈមណ្ឌលចែកចាយដែលគ្រប់គ្រង​ដោយ​មូលនិធិមនុស្សធម៌ហ្គាហ្សា (GHF) គាំទ្រដោយអ៊ីស្រាអែលនិងអាមេរិក ដែលត្រូវបានរិះគន់ថាជា «កន្លែងសម្លាប់មនុស្ស»។ ជនជាតិប៉ាឡេស្ទីនជាង ៤០០ នាក់បានស្លាប់ និង ១,០០០នាក់បានរងរបួសនៅជិតកន្លែងផ្តល់ជំនួយទាំងនេះចាប់តាំងពីប្រតិបត្តិការ GHF បានចាប់ផ្តើមកាលពីចុងខែឧសភា។

ការវាយប្រហារតាមអាកាសក៏បានវាយប្រហារតំបន់លំនៅដ្ឋានក្នុងទីក្រុង Jabalia, Beit Lahiya និងតាមបណ្តោយផ្លូវ Salah al-Din ខណៈដែលកាំភ្លើងធំរបស់អ៊ីស្រាអែលបានបាញ់ផ្លោងនៅភាគខាងកើតទីក្រុងហ្គាហ្សា។ មន្ទីរពេទ្យនៅកណ្តាលហ្គាហ្សាបានរាយការណ៍ថាមានអ្នករបួសរាប់សិបនាក់ មនុស្សជាច្រើនស្ថិតក្នុងស្ថានភាពធ្ងន់ធ្ងរ។

ទន្ទឹមនឹងនេះ ក្រុមប្រឹក្សាជនភៀសខ្លួនន័រវេសបានព្រមានថា ការទប់ស្កាត់ និងការរឹតបន្តឹងថាមពលរបស់អ៊ីស្រាអែល កំពុងបង្កើតវិបត្តិមនុស្សធម៌ធ្ងន់ធ្ងរ។ ដោយសារគ្មានអគ្គិសនី ឬប្រេងឥន្ធនៈ ធ្វើឲ្យមន្ទីរពេទ្យនៅហ្គាហ្សាមិនអាចធ្វើការវះកាត់ ឬដំណើរការឧបករណ៍សង្គ្រោះជីវិតបានទេ។

ក្រុមជំនួយកំពុងជំរុញសហគមន៍អន្តរជាតិឱ្យធ្វើសកម្មភាពភ្លាមៗដោយសង្កត់ធ្ងន់ថាការទទួលបានថាមពលគឺចាំបាច់សម្រាប់ការរស់រានមានជីវិតនៅក្នុងតំបន់ហ្គាហ្សា៕

អត្ថបទ៖ ប៊ុន សុភាព