បណ្ដាប្រទេសនៅអឺរ៉ុបខាងត្បូងកំពុងប្រឈមនឹងរលកកម្ដៅដ៏ខ្លាំង

​អឺរ៉ុបខាងត្បូងកំពុងប្រឈមនឹងរលកកម្ដៅដ៏ខ្លាំងបំផុតមួយ ជាមួយនឹង​​​ការកើន​ឡើង​កម្តៅ​​​​​ដល់​កម្រិតខ្ពស់​បំបែកកំណត់ត្រា និងបង្កឱ្យមានការជូនដំណឹងអំពី​​ហានិភ័យ​ភ្លើងឆេះព្រៃ ការព្រមានអំពីបញ្ហាសុខភាព និងការឆ្លើយតបបន្ទាន់នៅ​​ប្រទេសជាច្រើន។ នេះបើយោងតាមការចេញផ្សាយរបស់សារព័ត៌មាន ​Al Jazeera នៅថ្ងៃទី៣០ខែមិថុនានេះ។

កាលពីចុងសប្តាហ៍មុននេះ បណ្តាប្រទេសមួយចំនួន​​នៅ​​អឺរ៉ុប​​ខាងត្បូង​នោះ​ រួមមាន អ៊ីតាលី ក្រិក អេស្ប៉ាញ និង​ព័រទុយ​ហ្គាល់​ បាន​ប្រឈមនឹងកម្ដៅដ៏ក្តៅ ដោយ​​កម្តៅ​នៅតំបន់ខ្លះឡើងដល់៤២អង្សាសេ។ នៅក្នុងប្រទេសព័រទុយហ្គាល់ ពីរ​ភាគ​បី​នៃប្រទេសត្រូវបានដាក់ឱ្យមានការប្រុងប្រយ័ត្នខ្ពស់ចំពោះកម្ដៅខ្លាំង និងភ្លើងឆេះព្រៃ ជាពិសេសនៅទីក្រុង Lisbon​។

ចំណែក​នៅក្នុងប្រទេសអ៊ីតាលី ទីក្រុងចំនួន ២១ រួមទាំងកន្លែងទេសចរណ៍ដ៏ពេញនិយមដូចជា Rome, Milan និង Naples ត្រូវបានដាក់នៅក្រោមការជូនដំណឹងអំពីកម្ដៅខ្ពស់បំផុត។ តំបន់មួយចំនួនកំពុងហាមប្រាមការធ្វើការងារនៅខាងក្រៅអំឡុងពេលថ្ងៃក្តៅខ្លាំង។ នៅក្នុងមន្ទីរពេទ្យជាច្រើនក៏ឃើញមានការកើនឡើង ១០% នៃជំងឺដាច់សរសៃឈាមខួរក្បាល ជាពិសេសក្នុងចំណោមក្រុមដែលងាយរងគ្រោះ ដូចជាមនុស្សចាស់ និងអ្នកគ្មានផ្ទះសម្បែង។

ដោយសាតែកម្ដៅកើនឡើងនេះ ភ្លើងឆេះព្រៃក៏បានផ្ទុះឡើងនៅក្នុងផ្នែកខ្លះនៃប្រទេសបារាំង តួកគី និងជាពិសេសនៅក្នុងប្រទេសក្រិក មានភ្លើងឆេះដ៏ធំនៅជិតទីក្រុង Athens នាំឱ្យមានការជម្លៀស និងការបិទផ្លូវ។ អ្នកពន្លត់អគ្គិភ័យ និងឧត្ថម្ភាចក្រជាង១៣០នាក់ត្រូវបានដាក់ពង្រាយដើម្បីពន្លត់អណ្តាតភ្លើង ដោយតំបន់ចំនួន ៥ ត្រូវបានដាក់នៅក្រោមការបញ្ជាជម្លៀស។

នៅក្នុងប្រទេសអេស្ប៉ាញ អាជ្ញាធរបានចេញសេចក្តីជូនដំណឹងអំពីសុខភាព ខណៈដែលសីតុណ្ហភាពកើនឡើងនៅតំបន់ភាគខាងត្បូង និងកណ្តាល។ ទីភ្នាក់ងារអាកាសធាតុរបស់ប្រទេស AEMET រំពឹងថាខែមិថុនាជាខែក្តៅបំផុតក្នុងកំណត់ត្រា ដែលជាសញ្ញាគួរឱ្យព្រួយបារម្ភនៃការផ្លាស់ប្តូរអាកាសធាតុ។

យោងតាមការសិក្សាសុខភាពសាធារណៈ Lancet ការស្លាប់ទាក់ទងនឹងកំដៅនៅអឺរ៉ុបត្រូវបានគេរំពឹងថានឹងកើនឡើងបួនដងនៅពាក់កណ្តាលសតវត្សនេះ ប្រសិនបើបញ្ហាអាកាសធាតិនៅតែបន្តកើតមាន។

បញ្ហាកម្ដៅកើនឡើងនេះបានធ្វើឲ្យរដ្ឋាភិបាលប្រទេសនានាកំពុងជំរុញឱ្យសាធារណជនជៀសវាងសកម្មភាពក្រៅផ្ទះ រក្សាជាតិទឹកក្នុងខ្លួន និងយកចិត្តទុកដាក់ជាពិសេសចំពោះក្រុមដែលងាយរងគ្រោះ។ អ្នកវិទ្យាសាស្ត្របន្តព្រមានថា រលកកម្ដៅបែបនេះមិនមែនជាព្រឹត្តិការណ៍ដាច់ដោយឡែកពីគ្នានោះទេ ប៉ុន្តែជាផលវិបាកផ្ទាល់នៃការឡើងកម្ដៅផែនដី៕

អត្ថបទ៖ ប៊ុន សុភាព