កីឡា

យប់មិញ សមាជិកថ្មី៣នាក់ចូល ធ្វើឲ្យតំបន់ប្រយុទ្ធក្រុមនារីកម្ពុជាប្រែប្រួលខ្លាំង

បានផុស

១១ ខែ មុន

នៅ

ថ្ងៃចន្ទ ៣០ មិថុនា ២០២៥

ដោយ

ក្រុមបាល់ទាត់ជម្រើសជាតិនារី កម្ពុជា បានស្មើជាមួយក្រុមនារី ចិនហុងកុង ដោយលទ្ធផល ១-១ សម្រាបា់ការប្រកួតជម្រុះពូល G ពានរង្វាន់នារីអាស៊ី AFC WOMEN’S ASIAN CUP 2026 QUALIFIERS នៅពហុកីឡដ្ឋានជាតិអូឡាំពិក ថ្ងៃទី២៩ ខែមិថុនា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតនៅវគ្គទី១ ឃើញថា ក្រុមនារីកម្ពុជា ពិតជាបាកក្នុងការបង្កើតឱកាសនៅតំបន់ប្រយុទ្ធ ដោយសារខ្សែការពាររបស់ នារីហុងកុង ពិតជារឹងមាំខ្លាំងមែនទែន។ ភាគច្រើនក្រុមនារីហុងកុង ដាក់សម្ពាធ និងបានរកបានគ្រាប់បាល់នាំមុខ ១-០ នៅទីទី៣១ ដោយកីឡាការិនី Hong Kiu Anke Leong តាមរយៈការស៊ុតបាល់ពិន័យ១១ម៉ែត្រ បន្ទាប់ពីខ្សែការពារ វិបុល សេរីសេដ្ឋា បានបង្កកំហុស នៅប្រអប់ទី។

សម្រាប់ការប្រកួត នៅវគ្គទី២ ក្រុមនារីកម្ពុជា បានកែប្រែនៅតំបន់ប្រយុទ្ធ បន្ទាប់ពីផ្លាស់ប្តូរកីឡាការិនីថ្មីមួយចំនួនចូល។ ពឿន គន្ធា ដែលជាម្ចាស់ស្បែកជើងមាសពាន ASEAN Women’s Cup នៅប្រទេសឡាវ កាលពីឆ្នាំ ២០២៥, កីឡាការិនី សឹម ម៉ៃសុំ ដែលជាម្ចាស់ស្បែកជើងមាសក្នុងលីគនារីកម្ពុជារដូវកាល ២០២៤-២៥ និងកីឡាការិនី វឿន សុថាន ត្រូវបានប្តូរចូលបានធ្វើឲ្យតំបន់ប្រយុទ្ធរបស់ក្រុមនារីកម្ពុជារស់រវើកតែម្តង។

ការដាក់សម្ពាធជាបន្តបន្ទាប់នៅចុងវគ្គទី២ ទីបំផុត ក្រុមនារីកម្ពុជា រកបានគ្រាប់បាល់តាមស្មើ ១-១ ដោយការស៊ុតរបស់កីឡាការិនី វឿន សុថាន នៅនាទី៨១ តាមរយៈការបង្កើតឱកាសពីកីឡាការិនី វិបុល សេរីសេដ្ឋា និងកីឡាការិនី ហុក សៅឌី។

លទ្ធផលនេះ ក្រុមនារីកម្ពុជា រកបាន១ពិន្ទុដ៏សំខាន់ ពីក្រុមនារីហុងកុង ដែលជាក្រុមខ្លាំងមួយនៅក្នុងពូល។ វាក៏បង្ហាញឲ្យឃើញពីសញ្ជាវិជ្ជមាន និងល្អប្រសើរសម្រាប់ក្រុមបាល់ទាត់នារីកម្ពុជាដែលមានគុណភាពរីកចម្រើនឆ្ពោះទៅមុខ បើទោះជាទើបត្រូវបានបង្កើតឡើងសម្រាប់ការប្រកួតអន្តរជាតិប៉ុន្មានឆ្នាំ ចុងក្រោយប៉ុណ្ណោះ។

កីឡាការិនី វឿន សុថាន (លេខ២៣) ស៊ុតគ្រាប់បាល់តាមស្មើ ហុងកុង ១-១

ពីរប្រកួតចុងក្រោយរបស់ ក្រុមនារីកម្ពុជាពិតជាធ្វើបានល្អខ្លាំងមែនទែនដោយបានប៉ះដៃគូសុទ្ធតែមានតារាងចំណាត់ថ្នាក់ល្អ។ ការប្រកួតមិត្តភាពអន្តរជាតិ ក្រុមនារីកម្ពុជា បានយកឈ្នះដោយលទ្ធផល ១-០ លើ ក្រមជម្រើសជាតិនារី ហ្គាំ ដែលស្ថិតនៅលេខ ៩៧ ក្នុងតារាង Women’s FIFA Ranking និងស្មើ ១-១ លើក្រុមនារី ហុងកុង មានចំណាត់ថ្នាក់លេខ៨០ ខណៈក្រុមនារីកម្ពុជាមានចំណាត់ថ្នាក់លេខ ១១៨។ សង្កេតឃើញថា ក្រុមនារីកម្ពុជា មានការផ្លាស់ប្តូរគួរឲ្យកត់សំគាល់ ដោយធ្លាប់ចាញ់ដៃគូច្រើនគ្រាប់ ហើយមកសល់ត្រឹមតិចគ្រាប់ និងមានឱកាសស៊ុតចូលដៃគូស្ទើរគ្រប់ការប្រកួត៕