ព័ត៌មានអន្ដរជាតិ

លទ្ធផលស្ទង់មតិបង្ហាញថា លោកស្រី ផែថងថាន ធ្លាក់ប្រជាប្រិយភាពកាន់តែទាប ធៀបបេក្ខជនផ្សេងទៀត

បានផុស

១១ ខែ មុន

នៅ

ថ្ងៃចន្ទ ៣០ មិថុនា ២០២៥

ដោយ

លទ្ធផលនៃការស្ទង់មតិចុងក្រោយនេះរបស់វិទ្យាស្ថានជាតិនៃការគ្រប់គ្រងការអភិវឌ្ឍន៍ (NIDA) បង្ហាញថា ប្រជាប្រិយភាពរបស់នាយករដ្ឋមន្ត្រី ផែថងថាន ស៊ីណាវ៉ាត្រ បានធ្លាក់ចុះជាង អតីតនាយករដ្ឋមន្ត្រី ប្រាយុធ ចាន់អូចា និង សូម្បីប្រធានគណបក្សភូមិចៃថៃ (Bhumjaithai) លោក Anutin Charnvirakul ដែលទើបដកខ្លួនចេញពីរដ្ឋាភិបាលចម្រុះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លទ្ធផលស្ទង់មតិចុងក្រោយនៃវិទ្យាស្ថានជាតិនៃការគ្រប់គ្រងការអភិវឌ្ឍន៍ (NIDA) បង្ហាញថា សម្រាប់បេក្ខជននាយករដ្ឋមន្ត្រី បន្ទាប់ដែលទទួលបានការគាំទ្រខ្ពស់ជាងគេ គឺបានទៅ លោក Natthapong Ruengpanyawut នៃ បក្សប្រជាជន (People’s Party) ដែលមានការគាំទ្រដល់ទៅ ៣១.៤៨%។

តាមការចុះផ្សាយរបស់ The Nation បេក្ខជនរូបនេះត្រូវបានគេសរសើរថាជាអ្នកនយោបាយវ័យក្មេងដែលមានភាពក្លាហាន និងមានគំនិតទាន់សម័យ ច្បាស់លាស់ និងមានជំហរនយោបាយរឹងមាំ។

បេក្ខជននាយករដ្ឋមន្ត្រីថៃ ដែលប្រជាជនថៃពេញចិត្តបន្ទាប់ គឺលោកឧត្តមសេនីយ៍ ប្រាយុធ ចាន់អូចា (Prayut Chan-o-cha) មកពីគណបក្សជាតិថៃរួបរួម (United Thai Nation) ដែលមានការគាំទ្រដល់ទៅ ១២,៧២ភាគរយ ដោយមានការកោតសរសើរចំពោះភាពស្មោះត្រង់ សុចរិតភាព និងតម្រង់ទិសសកម្មភាព ជាមួយនឹងកេរ្តិ៍ឈ្មោះក្នុងការរក្សាស្ថិរភាពជាតិ។

បេក្ខជននាយករដ្ឋមន្ត្រី ជាប់ចំណាត់ថ្នាក់លេខ៣ពីការស្ទង់មតិនោះ គឺ លោក Anutin Charnvirakul មកពីគណបក្ស Bhumjaithai ដែលមានការគំាទ្រដល់ទៅ ៩,៦៤ភាគរយ ដែលអ្នកបោះឆ្នោតក្នុងការស្ទង់មតិនោះទទួលស្គាល់សម្រាប់ការសម្រេចចិត្ត និងបទពិសោធន៍ក្នុងការគ្រប់គ្រងជាតិ។

ចំណែកនាយករដ្ឋមន្ត្រី កំពុងកាន់អំណាច គឺលោកស្រី ផែថងថាន ស៊ីណាវ៉ាត្រ (Paetongtarn Shinawatra) នៃគណបក្សភឿថៃវិញ បានធ្លាក់មកនៅចំណាត់ថ្នាក់លេខ៤ មានត្រឹមតែ៩,២០ភាគរយប៉ុណ្ណោះ ដោយត្រូវបានគេមើលឃើញថាមានភាពស្មោះត្រង់ និងប្តេជ្ញាចិត្ត ទោះបីជាមានបទពិសោធន៍មានកម្រិតក៏ដោយ ដោយមានអ្នកឆ្លើយសំណួរមួយចំនួនបង្ហាញពីបំណងចង់ផ្តល់ឱកាសឱ្យនាងដើម្បីបង្ហាញពីសមត្ថភាពដឹកនាំ។

ការស្ទង់មតិដែលបានធ្វើឡើងនៅចន្លោះថ្ងៃទី ១៩ និង ២៥ ខែមិថុនា ឆ្នាំ ២០២៥ បានប្រមូលការឆ្លើយតបពីបុគ្គលចំនួន ២៥០០នាក់ដែលមានអាយុចាប់ពី ១៨ ឆ្នាំឡើងទៅ មកពីគ្រប់តំបន់ កម្រិតអប់រំ មុខរបរ និងប្រាក់ចំណូល។

សារព័ត៌មាន The Nation បានផ្សាយថា ការស្ទង់មតិនេះកើតឡើង បន្ទាប់ពីបញ្ហាប្រឈមជាបន្តបន្ទាប់ រួមទាំងវិបត្តិសេដ្ឋកិច្ចដែលកើតចេញពីភាពតានតឹងពាណិជ្ជកម្មសកល ជម្លោះព្រំដែនកម្ពុជា-ថៃ និងអស្ថិរភាពនយោបាយដែលបង្កឡើងដោយការដកខ្លួនរបស់គណបក្ស Bhumjaithai ពីសម្ព័ន្ធដែលកំពុងកាន់អំណាច៕

រ៉ាន់ រើយ