ក្រុមប្រឹក្សាសន្តិសុខ UN ចោទ កូរ៉េខាងជើង ថានៅតែបន្តអភិវឌ្ឍ និងធ្វើទំនើបកម្មប្រព័ន្ធមីស៊ីល

ក្រុមប្រឹក្សាសន្តិសុខអង្គការសហប្រជាជាតិ (UNSC) និយាយថា ប្រទេសកូរ៉េខាងជើងនៅតែបន្តអភិវឌ្ឍ និងធ្វើទំនើបកម្មកម្មវិធីមីស៊ីលផ្លោងរបស់ខ្លួន ។

ក្រុមប្រឹក្សាសន្តិសុខបានចេញរបាយការណ៍ប្រចាំឆ្នាំចុងក្រោយរបស់ខ្លួនខាងលើនេះ បន្ទាប់ពីបានដាក់ជូនដោយក្រុមអ្នកជំនាញឯករាជ្យដែលឃ្លាំមើលការដាក់ទណ្ឌកម្មលើក្រុងព្យុងយ៉ាង ។

របាយការណ៍និយាយថា កូរ៉េខាងជើងបានបង្ហាញមីស៊ីល Ballistic រយៈចម្ងាយខ្លីថ្មីនៅឯព្យុហយាត្រាយោធាមួយកាលពីខែមករា ។ វាបានបញ្ជាក់ថា ប្រទេសកូរ៉េខាងជើងបាននិងកំពុងធ្វើឲ្យប្រសើរឡើងនូវសមត្ថភាពរបស់ខ្លួនក្នុងការបាញ់បង្ហោះអាវុធនុយក្លេអ៊ែរយុទ្ធសាស្ត្រ ។

ប្រព័ន្ធផ្សព្វផ្សាយអន្តរជាតិបានដកស្រង់សម្តីអ្នកជំនាញដែលនិយាយថា មីស៊ីលដែលប្រទេសកូរ៉េខាងជើងបានបាញ់កាលពីថ្ងៃទី ២៥ ខែមីនា គឺជាគ្រាប់មីស៊ីលដែលត្រូវបានដាក់បង្ហាញនៅឯព្យុហយាត្រាខែមករា ។

របាយការណ៍បានបន្ថែមទៀតថា ប្រទេសកូរ៉េខាងជើងបានខិតខំបង្កើតភាពជាដៃគូនៅបរទេសសម្រាប់ការផ្លាស់ប្តូរបច្ចេកវិទ្យាជាក់លាក់ និងសម្រាប់ការផ្គត់ផ្គង់គ្រឿងបន្លាស់ដើម្បីធ្វើឲ្យប្រសើរឡើងនូវប្រព័ន្ធមីស៊ីលផ្លោងរបស់ខ្លួន ។

របាយការណ៍បន្តថា រដ្ឋជាសមាជិកអង្គការសហប្រជាជាតិគួរតែអនុវត្តការដាក់ទណ្ឌកម្មលើកូរ៉េខាងជើងជាប្រចាំចាប់ពីពេលនេះតទៅ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូរ៉េខាងជើង ព្រមានបាញ់មីស៊ីលបន្ថែម មុនកិច្ចប្រជុំក្រុមប្រឹក្សាសន្តិសុខ UN

ចុចអាន ៖ កូរ៉េខាងជើង ថា មីស៊ីលដែលបាញ់កាលពីម្សិលមិញជាការសាកល្បងប្រព័ន្ធអាវុធយុទ្ធសាស្ត្រថ្មី