ធ្លាក់ឧទ្ធម្ភាគចក្រយោធា នៅសូម៉ាលី ស្លាប់៥នាក់

យោងតាមការចេញផ្សាយរបស់ទីភ្នាក់ងារព័ត៌មាន​AP នៅថ្ងៃទី០៣ខែកក្កដានេះ ឧទ្ធម្ភាគចក្រយោធាបម្រើ​ឲ្យ​បេសកកម្មរក្សាសន្តិភាព​របស់​សហភាពអាហ្រ្វិកនៅប្រទេសសូម៉ាលី បានធ្លាក់នៅអាកាសយានដ្ឋាន Aden Adde ក្នុងទីក្រុង Mogadishu ដោយ​សម្លាប់មនុស្ស ៥នាក់ក្នុងចំណោមមនុស្ស ៨នាក់នៅលើឧទ្ធម្ភាគចក្រ។

ឧទ្ធម្ភាគចក្រនេះជាឧទ្ធម្ភាគចក្រ Mi-24 មានដើមកំណើតមកពីកងទ័ពអាកាស អ៊ូហ្គង់ដាស្ថិតក្នុងបេសកកម្មអមដំណើរប្រយុទ្ធតាមទម្លាប់ពីតំបន់ Lower Shabelle មុនពេលវាធ្លាក់និងផ្ទុះឆេះ។

យោធាអ៊ូហ្គង់ដាបានរាយការណ៍ថា អ្នកបើកឧទ្ធម្ភាគចក្រ សហពីឡុត និងវិស្វករហោះហើរបានរួចជីវិតពីឧបទ្ទវហេតុនេះ ប៉ុន្តែរងរបួសយ៉ាងធ្ងន់ធ្ងរ។ ពេលនេះមន្ត្រីអាកាសចរណ៍សូម៉ាលីកំពុងស៊ើបអង្កេតពីមូលហេតុដែលបណ្តាលឲ្យធ្លាក់ឧទ្ធម្ភាគចក្រនេះ។ ហេតុការណ៍នេះបានធ្វើឲ្យអាកាសយានដ្ឋានមានការពន្យារពេលតិចតួច ប៉ុន្តែឥឡូវនេះវាដំណើរការជាធម្មតាឡើងវិញហើយ។

គួរបញ្ជាក់ថា ឧទ្ធម្ភាគចក្រនេះគឺជាផ្នែកមួយនៃ AUSSOM ដែលជាបេសកកម្មរក្សាសន្តិភាពនៅក្នុងប្រទេសសូម៉ាលី។ បេសកកម្មនេះជួយកងកម្លាំងសូម៉ាលីប្រយុទ្ធប្រឆាំងនឹងក្រុមឧទ្ទាម al-Shabab និងរួមបញ្ចូលទាហានមកពីប្រទេសដូចជា អ៊ូហ្គង់ និង កេនយ៉ា ៕

អត្ថបទ៖ ប៊ុន សុភាព