ណេតាន់យ៉ាហ៊ូ រំពឹង​ថា កិច្ចព្រមព្រៀងចំណាប់ខ្មាំងអាចនឹងត្រូវបានបញ្ចប់ក្នុង​ពេល​២-៣ថ្ងៃ​ទៀត

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានសម្តែងសុទិដ្ឋិនិយមថា កិច្ចព្រមព្រៀងដោះលែងចំណាប់ខ្មាំងជាមួយក្រុមហាម៉ាស នឹង​អាចសម្រេចបានក្នុងរយៈពេល២ទៅ​៣​ថ្ងៃខាងមុខនេះ។

ថ្លែងមុនពេលចាកចេញពីទីក្រុងវ៉ាស៊ីនតោនកាល​ពី​ថ្ងៃ​ព្រហស្បតិ៍​ទី​១០​កក្កដា លោក ណេតាន់យ៉ាហ៊ូ បាននិយាយថា លោកជឿជាក់ថា កិច្ចព្រមព្រៀងអាចធានាបាននូវការដោះលែង​ចំណាប់ខ្មាំង​ដែល​នៅ​សេស​សល់​ទាំង​អស់ មិន​ថា​​អ្នក​នៅ​រស់ឬ​ក៏​បាត់បង់​ជីវិត​នោះ​ទេ។ មេ​ដឹក​នាំ​អ៊ីស្រាអែល បានកត់សម្គាល់ថា ចំណាប់ខ្មាំងប្រហែល ៥០​នាក់នៅតែ​ជាប់ឃុំ​​​ក្នុង​​​តំបន់​ហ្គាហ្សា ដោយ​ក្នុង​នោះ​​មានតែ ២០​នាក់ប៉ុណ្ណោះដែលត្រូវបានគេជឿថានៅ​មាន​ជីវិត។

លោក ណេតាន់យ៉ាហ៊ូ បានរៀបរាប់​ថា «ខ្ញុំសង្ឃឹមថា យើងអាចបញ្ចប់វាក្នុងរយៈពេលពីរបីថ្ងៃទៀត» និងជំរុញ​ឲ្យ​ក្រុម​ហាម៉ាស​ទម្លាក់​អាវុធ​ចុះ ដើម្បីនាំយកចំណាប់ខ្មាំងមកផ្ទះវិញ។ លោកបានសង្កត់ធ្ងន់លើសារៈសំខាន់នៃ​បទឈប់បាញ់រយៈពេល ៦០​ថ្ងៃ ដែលនឹងផ្តល់នូវបង្អួចមួយបើក​ផ្លូវ​សម្រាប់​ការ​ចរចាដំណោះស្រាយអចិន្ត្រៃយ៍។

ទោះបីជាមានក្ដី​សង្ឃឹម​បែប​នេះ​ក៏ដោយ មន្ត្រីជាន់ខ្ពស់អ៊ីស្រាអែលបានព្រមានថា កិច្ចព្រមព្រៀងចំណាប់ខ្មាំង និងបទឈប់បាញ់​អាចចំណាយពេលពី​មួយទៅពីរសប្តាហ៍​ឯណោះ ដើម្បីបញ្ចប់ ជាជាងកើតឡើងភ្លាមៗ។ ការចរចានៅតែបន្តក្នុងទីក្រុងដូហា ដោយមានចំណុចជាប់គាំងសំខាន់ៗ រួម​មាន ការទទួលបានជំនួយមនុស្សធម៌ វិសាលភាពនៃការដកទ័ពរបស់អ៊ីស្រាអែល និងការធានាសន្តិសុខសម្រាប់បទឈប់បាញ់យូរអង្វែង។

សូម​រឭក​ឡើង​វិញ​ថា កាលពីថ្ងៃទី​៧​ខែតុលា​ឆ្នាំ​២០២៣ ក្រុមសកម្ម​ប្រយុទ្ធ​ប៉ាឡេស្ទីន​ហាម៉ាស បានវាយប្រហារភាគខាងត្បូង​ប្រទេស​អ៊ីស្រាអែល ដោយបានសម្លាប់មនុស្សប្រហែល ១ ២០០​នាក់ និងចាប់ចំណាប់ខ្មាំង ២៥១​នាក់។ នេះបើយោងតាមតួលេខរបស់អ៊ីស្រាអែល។ ចំណែក​ឯ​ក្រសួង​សុខាភិបាល​ហ្គាហ្សា​និយាយ​ថា ការ​សងសឹក​របស់​អ៊ីស្រាអែល​បាន​សម្លាប់​ប្រជាជន​ប៉ាឡេស្ទីន​ជាង ៥៧ ០០០​នាក់។

ភាគីទាំងពីរធ្លាប់​មានបទឈប់បាញ់ចំនួន២​លើក​រួច​មក​ហើយ គឺមួយនៅខែវិច្ឆិកា​ឆ្នាំ​២០២៣ និងមួយទៀតនៅខែមករា​ឆ្នាំ​២០២៥៕

ដោយ៖ ឈាង