អសន្តិសុខនៅថៃ! ចោរក្លែងធ្វើប៉ូលិស ចាប់ជម្រិតនិងប្លន់ទេសចរបរទេស 

ទេសចរជនជាតិចិនម្នាក់ត្រូវបានចាប់ជម្រិតនិងប្លន់យកទ្រព្យសម្បត្តិអស់ ២៣០ ០០០បាត (៧ ០៩៩ដុល្លារអាមេរិក) ដោយបុរសថៃ២នាក់ដែលតែងខ្លួនធ្វើប៉ូលិសក្លែងក្លាយ នៅទីក្រុងប៉ាតាយ៉ា កាលពីថ្ងៃព្រហស្បតិ៍ទី១០ខែកក្កដាឆ្នាំ២០២៥ ដែលនេះបង្ហាញពីភាពអសន្តិសុខរបស់ប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីប៉ូលិសប៉ាតាយ៉ា, ទេសចរចិនដែលមានឈ្មោះ Lin Yifan អាយុ៥២ឆ្នាំ ត្រូវបានចោរចាប់ញាត់ចូលរថយន្ត SUV ពណ៌ស នៅខាងមុខហាងលក់មីមួយលើផ្លូវ North Pattaya ក្នុងតំបន់ Na Kluea នាវេលាម៉ោង៥:៣០នាទីព្រឹក។

ជនរងគ្រោះនិយាយថា គាត់ត្រូវបុរសថៃទាំងពីរ ចាប់ចងនិងជម្រិតទារប្រាក់ ដោយយកអាវុធមកភ្ជង់ពីក្រោយទាំងមិនដឹងថាជាកាំភ្លើងឬជាអ្វី រួចក៏ប្លន់យកទូរស័ព្ទ iPhone ២គ្រឿងតម្លៃ ៤៦៣ដុល្លារ និងទ្រពសម្បត្តិផ្សេងទៀត។ ក្រុមចោរក៏បានបង្ខំឲ្យ Lin ផ្ទេរប្រាក់ ៤ ៦៣០ដុល្លារពីគណនីធនាគារផងដែរ។

ចុងក្រោយ Lin ក៏ត្រូវក្រុមចោរដឹកយកទៅទម្លាក់នៅទីវាលមួយចម្ងាយ៩គីឡូម៉ែត្រ ពីកន្លែងចាប់ជម្រិត រួចទេសចរចិនរូបនេះក៏រាយការណ៍ទៅកាន់ប៉ូលិសក្រុងប៉ាតាយ៉ា។

នេះជាបញ្ហាមួយទៀតពាក់ព័ន្ធនឹងសន្តិសុខដ៏អន់ខ្សោយរបស់ប្រទេសថៃ ដែលធ្វើឲ្យទេសចរបរទេសមានការធ្លាក់ចុះយ៉ាងខ្លាំង ជាពិសេសគឺទេសចរចិនតែម្តង។

កាលពីថ្ងៃពុធ នាយករដ្ឋមន្ត្រីព្យួរតំណែងថៃលោកស្រី Paetongtarn Shinawatra បានបន្ទោសចំៗទៅអតីតរដ្ឋមន្ត្រីក្រសួងមហាផ្ទៃលោក Anutin Charnvirakul ថា ដោយសារតែប្រទេសថៃគ្មានសុវត្ថិភាព ទើបទេសចរធ្លាក់ចុះ។

ទន្ទឹមនោះលោកស្រី Paetongtarn ទទួលស្គាល់ថា ទេសចរចិនញញើតនឹងមកលេងប្រទេសថៃណាស់ ព្រោះបញ្ហាក្រុមឆបោកតាមទូរស័ព្ទ (call-centre gang)។ លោក Anutin មិនបានធ្វើគ្រប់គ្រាន់ទេដើម្បីដោះស្រាយបញ្ហា៕

អត្ថបទ៖ សុខ សុវណ្ណ

ចុចអាន៖ បញ្ហាគ្រឿងញៀនរបស់ប្រទេសថៃ ក្លាយជាកង្វល់សកល