ក្រោយអាមេរិកប្រកាសផ្តល់ជំនួយវិញ, ហ្សេលេនស្គី គំរាមបាញ់ចូលជ្រៅក្នុងដីរុស្ស៊ី

គ្រាន់តែសហរដ្ឋអាមេរិកប្រកាសថា នឹងជួយជំនួយយោធាថ្មីបន្ថែមទៀតភ្លាម ស្រាប់តែប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី គំរាមបាញ់ចូលជ្រៅក្នុងទឹកដីរុស្ស៊ីសាជាថ្មីតែម្តង។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីដើមសប្តាហ៍មុន មេដឹកនាំសេតវិមាន ដូណាល់ ត្រាំ ប្រកាសថា​ មន្ទីរបញ្ចកោណនឹងចាប់ផ្តើមការផ្តល់ជំនួយឡើងវិញទៅឲ្យទីក្រុងកៀវ ក្រោយផ្អាកប៉ុន្មានសប្តាហ៍។

មកដល់ថ្ងៃអាទិត្យទី១៣ខែកក្កដាឆ្នាំ២០២៥ លោក ហ្សេលេនស្គី បានបង្ហោះសារលើបណ្តាញសង្គម X ថា «កងកម្លាំងរបស់យើងនឹងបន្តបំផ្លាញអ្នកឈ្លានពាន ហើយធ្វើគ្រប់យ៉ាងដើម្បីនាំយកសង្រ្គាមចូលទឹកដីរុស្ស៊ី។ យើងកំពុងត្រៀមបើកការវាយប្រហាររយៈចម្ងាយឆ្ងាយថ្មីទៀត»។

ជុំវិញការ​វាយ​ប្រហារ​​របស់អ៊ុយក្រែនចូលជ្រៅក្នុងដីរុស្ស៊ី, កាលពីខែមុន អ៊ុយក្រែន​បាន​កំណត់​គោលដៅ​លើ​អាកាសយានដ្ឋាន​យោធា​ ដោយបំផ្លាញ​យន្តហោះ​ទម្លាក់​គ្រាប់បែក​យុទ្ធសាស្ត្រ​ក្នុង​តំបន់​រុស្ស៊ី​ជាច្រើន។ ដ្រូននិងមីស៊ីលអ៊ុយក្រែន ក៏វាយប្រហារម្តងហើយម្តងទៀតផងដែរលើប្លុកផ្ទះល្វែង និងហេដ្ឋារចនាសម្ព័ន្ធស៊ីវិលដទៃទៀត។

យោងតាមទីក្រុងមូស្គូ, អ៊ុយក្រែនជាអ្នកទទួលខុសត្រូវចំពោះហេតុការណ៍រថភ្លើងដឹកអ្នកដំណើររត់ធ្លាក់ផ្លូវកាលពីថ្ងៃទី៣១ខែមីនា ដែលបណ្តាលឲ្យមនុស្ស៧នាក់ស្លាប់៕

អត្ថបទ៖ សុខ សុវណ្ណ

ចុចអាន៖ ចារកម្ម​អ៊ុយក្រែន ប្រាប់​ថា សព្វាវុធ​ដែល​រុស្ស៊ី​ប្រើ​ធ្វើ​សង្គ្រាម​៤០%​មាន​ប្រភព​ចេញ​ពី​កូរ៉េខាងជើង