ហ្សេលេនស្គី ប្រកាសកាលបរិច្ឆេទនៃកិច្ចចរចារុស្ស៊ី-អ៊ុយក្រែន លើកទី៣

ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានបញ្ជាក់ថា កិច្ចចរចាសន្តិភាពរុស្ស៊ី-អ៊ុយក្រែន លើកទី៣ នឹងធ្វើឡើងនៅថ្ងៃពុធទី២៣ខែកក្កដាឆ្នាំ២០២៥ ក្នុងទីក្រុងអ៊ីស្តង់ប៊ុល នៃប្រទេសតួកគី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រកាសបែបនេះនៅក្នុងវីដេអូតេឡេក្រាម បង្ហោះកាលពីថ្ងៃចន្ទ ដោយនិយាយថា «លោក រូស្តឹម អូមេរូហ្វ (Rustem Umerov) លេខាធិការក្រុមប្រឹក្សាសន្តិសុខនិងការពារជាតិអ៊ុយក្រែន ដែលដឹកនាំគណៈប្រតិភូទីក្រុងកៀវ ក្នុងការចរចាលើកមុន បានស្នើយកថ្ងៃពុធ ជាកាលបរិច្ឆេទសម្រាប់កិច្ចប្រជុំបន្ទាប់។ ខ្ញុំបានពិភាក្សាជាមួយលោក អូមេរូហ្វ រួចហើយអំពីការត្រៀមរៀបចំដោះដូរឈ្លើយសឹក និងកិច្ចប្រជុំមួយទៀតនៅប្រទេសតួកគី ជាមួយភាគីរុស្ស៊ី»។

តាមការចុះផ្សាយរបស់ RT, លោក ហ្សេលេនស្គី ក៏បញ្ជាក់ដែរ របៀបវារៈរបស់ទីក្រុងសម្រាប់កិច្ចចរចាខាងមុខនេះ គឺរួមមានបញ្ហាមនុស្សធម៌ ដូចជាការដោះដូរឈ្លើយសឹកថ្មីៗ និងការចរចាសម្រាប់កិច្ចប្រជុំដែលអាចកើតមានរវាងមេដឹកនាំប្រទេសទាំងពីរ។

សូមជម្រាបថា ការចរចាផ្លូវការលើកទី១រវាងភាគីទាំងពីរ ក៏រៀបចំឡើងនៅទីក្រុងអ៊ីស្តង់ប៊ុលនៃប្រទេសតួកគី ដែរ កាលពីថ្ងៃទី១៦ខែឧសភា ដោយពេលនោះ គណៈប្រតិភូរុស្ស៊ី-អ៊ុយក្រែន បានចាយពេលជិត២ម៉ោង ប៉ុន្តែមិនទទួលបានលទ្ធផលគាប់ប្រសើរ ក្នុងការឈានដល់បញ្ចប់សង្គ្រាមទេ ប៉ុន្តែសម្រេចបានលទ្ធផលគួរឲ្យកត់សម្គាល់ ដោយ​ការ​ឯកភាពដោះដូរឈ្លើយសឹកគ្នា​​​ម្ខាង ​១ ០០០​​នាក់។

ក្រោយមក កិច្ចពិភាក្សាលើកទី២ ក៏នៅតែរៀបចំក្នុងទីក្រុងអ៊ីស្តង់ប៊ុលដដែល កាលពី​ថ្ងៃទី​២​ខែមិថុនា ហើយចំពោះលទ្ធផលវិញ ភាគីទាំងពីរក៏នៅតែយល់ព្រមលើការផ្លាស់ប្តូរអ្នកទោសគ្នា ប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ វិមានក្រឹមឡាំង៖ រុស្ស៊ី​បើក​ចំហ​ចំពោះ​សន្តិភាព តែ​ត្រូវ​សម្រេច​គោលដៅធំ​៣​ឲ្យ​បាន​សិន