WHO៖ កុមារនៅហ្គាហ្សាជិត១២០០០នាក់ អាយុក្រោម ៥ ឆ្នាំកំពុងខ្វះអាហារូបត្ថម្ភធ្ងន់ធ្ងរ

អង្គការសុខភាពពិភពលោក (WHO) បានព្រមានកាលពីថ្ងៃព្រហស្បតិ៍ថា កុមារជិត ១២,០០០ នាក់ដែលមានអាយុក្រោម ៥ ឆ្នាំនៅក្នុងតំបន់ហ្គាហ្សា ត្រូវបានគេធ្វើរោគវិនិច្ឆ័យថាមានកង្វះអាហារូបត្ថម្ភធ្ងន់ធ្ងរនៅក្នុងខែកក្កដា ដែលជាតួលេខខ្ពស់បំផុតប្រចាំខែដែលមិនធ្លាប់មាន។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ Reuters នៅថ្ងៃទី០៨ខែសីហានេះ។

អគ្គនាយកអង្គការ WHO លោក Tedros Adhanom Ghebreyesus បាននិយាយថា វិបត្តិកំពុងកើនឡើងយ៉ាងឆាប់រហ័ស ជាមួយនឹងកង្វះអាហារូបត្ថម្ភជិតទ្វេដងនៅចន្លោះខែមិថុនា និងខែកក្កដា ពី ៦,៣៤៤ ទៅ ១១,៨៧៧ នេះបើយោងតាមអង្គការយូនីសេហ្វ។ ក្នុង​ចំណោម​នោះ មាន​កុមារ​ប្រមាណ ២,៥០០​នាក់ កំពុង​រង​គ្រោះ​ដោយ​កង្វះ​អាហារូបត្ថម្ភ​ធ្ងន់ធ្ងរ។

ចាប់តាំងពីដើមឆ្នាំ ២០២៥ មនុស្សយ៉ាងតិច៩៩ នាក់ រួមទាំងកុមារ ៣៥ នាក់ ក្នុងចំណោមពួកគេ ២៩នាក់មានអាយុក្រោម ៥ ឆ្នាំ បានស្លាប់ដោយសារមូលហេតុទាក់ទងនឹងភាពអត់ឃ្លាន។ អង្គការសុខភាពពិភពលោកបានកត់សម្គាល់ថា ស្ថានភាពនេះត្រូវបានផ្សំឡើងដោយការរឹតបន្តឹងជំនួយធ្ងន់ធ្ងរ និងការថយចុះនៃការផ្គត់ផ្គង់ទឹកដោះគោទារក និងអាហារបំប៉ន។

ជាមួយគ្នានេះការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានរាយការណ៍ថាការប្រើប្រាស់ស្បៀងអាហារនៅក្នុងតំបន់ហ្គាហ្សាបានធ្លាក់ចុះដល់ចំណុចទាបបំផុតចាប់តាំងពីសង្គ្រាមបានចាប់ផ្តើម។ បច្ចុប្បន្ននេះ ៨១% នៃគ្រួសារនៅហ្គាហ្សាប្រឈមនឹងការទទួលទានអាហារមិនល្អ កើនឡើងយ៉ាងខ្លាំងពី ៣៣% នៅក្នុងខែមេសា។

ទីភ្នាក់ងារអង្គការសហប្រជាជាតិព្រមានថា តំបន់ហ្គាហ្សា «ស្ថិតនៅលើគែមនៃគ្រោះទុរ្ភិក្សពេញលេញ» ជាមួយនឹងភាពអត់ឃ្លានរីករាលដាល និងការទទួលបានមនុស្សធម៌ត្រូវបានរឹតបន្តឹងយ៉ាងធ្ងន់ធ្ងរពីអ៊ីស្រាអែល៕

អត្ថបទ៖ ប៊ុន​ សុភាព