ព័ត៌មានអន្ដរជាតិ

សាលក្រមតុលាការធម្មនុញ្ញថៃថ្ងៃនេះ កំណត់វាសនានយោបាយថៃទៅអនាគត

បានផុស

៨ ខែ មុន

នៅ

ថ្ងៃសុក្រ ២៩ សីហា ២០២៥

ដោយ

ពេលវេលារំកិលទៅមុខកាន់តែកៀកទៅរកការប្រកាសសាលក្រមជាផ្លូវការរបស់តុលាការធម្មនុញ្ញថៃដែលមានសមាជិកចំនួន៩រូប។ សាលក្រមនេះនឹងកំណត់ជោគវាសនានយោបាយថៃ និងការកែទម្រង់ស្ថាប័នរាជបល្ល័ង្កថៃដែលធ្លាប់តែមានឥទ្ធិពលនិងអំណាចយាយី ធ្វើទុក្ខបុកម្នេញរដ្ឋាភិបាលស៊ីវិលដែលទទួលបានការគាំទ្រពីប្រជាជនថៃ។

ចៅក្រម៩រូបនៃតុលាការធម្មនុញ្ញថៃ។ thaienquirer

ថ្វីត្បិតតែសាលក្រមនៅថ្ងៃនេះគឺជាការបិទផ្លូវតវ៉ាសម្រាប់រឿងក្តីនយោបាយដ៏ល្បីបំផុតជាប់ពាក់ព័ន្ធអ្នកនយោបាយមកពីត្រកូលថាក់ស៊ីន និងមានជាប់ពាក់ព័ន្ធនឹងថ្នាក់ដឹកនាំកម្ពុជាផងដែរនោះ ក៏មានការវិភាគខ្លះលើកឡើងថា ដំណោះស្រាយនយោបាយថៃបានធ្វើឡើងនៅមុននេះ និងស្តែងឲ្យឃើញតាមរយៈសាលក្រមតុលាការព្រហ្មទណ្ឌដែលទម្លាក់ការចោទប្រកាន់ប្រឆាំងលោកថាក់ស៊ីន ក្នុងសំណុំរឿងប្រមាថព្រះមហាក្សត្រក្នុងមាត្រា១១២ ដែលតែងតែយាយីអ្នកនយោបាយសេរីនិយម និងអ្នកកែទម្រង់។

ប្រជាជនកម្ពុជា និងប្រជាជនថៃ បានប្រើប្រាស់បណ្តាញសង្គមសម្រាប់ការតាមដានយ៉ាងយកចិត្តទុកដាក់ចំពោះដំណើរការរឿងក្តីនយោបាយដ៏កក្រើកមួយនេះ។ សំណុំរឿងក្តីនយោបាយដែលបានលេចរូបរាងឡើងជិត២ខែ ពោលគឺចាប់ពីថ្ងៃទី១ខែកក្កដា រហូតដល់ថ្ងៃទី២៩ខែសីហានេះ បានទាក់ទាញការចាប់អារម្មណ៍យ៉ាងខ្លាំងមិនត្រឹមតែក្នុងចំណោមអ្នកនយោបាយកំពូលៗទាំងពីរប្រទេសប៉ុណ្ណោះទេ សូម្បីតែប្រជាជនគ្រប់ស្រទាប់វណ្ណៈនិងនិន្នាការនៃប្រទេសទាំងពីរក៏បានតាមដានដោយយកចិត្តទុកដាក់។

សំណុំរឿងចោទប្រកាន់ប្រឆាំងនាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ បានក្លាយជារឿងក្តីនយោបាយទទួលបានការចាប់អារម្មណ៍បំផុតពីសំណាក់ប្រជាជនទាំងពីរប្រទេសនិងរាលដាលដល់ពាសពេញពិភពលោក ដោយសារតែរឿងក្តីនេះជាប់ពាក់ព័ន្ធរវាងថ្នាក់ដឹកនាំរបស់ប្រទេសថៃ និងប្រទេសកម្ពុជា។ លើសពីនេះ ក្នុងអន្តរកាលនៃសំណុំរឿងក្តីនេះ ក៏មានការផ្ទុះអាវុធដ៏សាហាវបំផុតរវាងប្រទេសថៃនិងកម្ពុជានៅតំបន់ព្រំដែនភាគខាងជើងនៃប្រទេសកម្ពុជា ស្ថិតក្នុងខេត្តឧត្តរមានជ័យ និងខេត្តព្រះវិហារ ប្រឈមនឹងភាគខាងកើតនៃប្រទេសថៃ។

នាយករដ្ឋមន្ត្រីថៃ ផែថងថាន ស៊ីណាវ៉ាត្រ។ FB

ដើមហេតុនៃបណ្តឹងប្រឆាំងលោកស្រីនាយករដ្ឋមន្ត្រី ផែថងថាន ស៊ីណាវ៉ាត្រ ដោយសារតែសមាជិកព្រឹទ្ធសភាចំនួន៣៦រូប បានរួមគ្នាប្តឹងចោទប្រកាន់លោកស្រីនាយករដ្ឋមន្ត្រី ថា បានរំលោភបំពានក្រមរដ្ឋធម្មនុញ្ញ ដោយសារតែលោកស្រីនាយករដ្ឋមន្ត្រី បាននិយាយទូរស័ព្ទចរចាជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា អំពីការបើកនិងបិទច្រកទ្វារព្រំដែន។

បើទោះបីជាអ្នកនយោបាយថៃបានផ្សារភ្ជាប់រឿងនេះជាមួយថ្នាក់ដឹកនាំកម្ពុជា ដើម្បីបង្កហេតុបង្កើនជម្លោះនៅព្រំដែន ថ្នាក់ដឹកនាំកម្ពុជាក៏ដូចជាមជ្ឈដ្ឋានអន្តរជាតិ បានមើលឃើញច្បាស់ថា ជម្លោះនយោបាយផ្ទៃក្នុងរបស់ថៃទៅវិញទេ ដែលនាំទៅដល់អស្ថេរភាពនយោបាយក្នុងប្រទេសថៃ និង ការប្រជែងអំណាចរវាងក្រុមដឹកនាំរដ្ឋាភិបាលស៊ីវិល និងក្រុមយោធាដែលមានព្រះមហាក្សត្រជាខ្នងបង្អែក។

ការប្រជែងអំណាចរបស់ពួកគេ បានស្តែងយ៉ាងច្បាស់តាមរយៈមេបញ្ជាការភូមិភាគ២ថៃ លោកឧត្តមសេនីយ៍ឯក ប៊ុនស៊ីន ផាតក្លាង (Boonsin Padklang) ជាតួអង្គបង្កហេតុខ្លាំងបំផុតក្នុងជម្លោះព្រំដែនជាមួយកម្ពុជា មិនបានស្តាប់និងទទួលយកការសម្រេចចិត្តនិងដំណោះស្រាយរបស់រដ្ឋាភិបាលស៊ីវិលនោះទេ។ ផ្ទុយទៅវិញ ក្រុមយោធាបានធ្វើសកម្មភាពផ្ទុយពីការសម្រេចចិត្តរបស់រដ្ឋាភិបាលស៊ីវិល ហើយធ្វើសកម្មភាពបង្កហេតុម្តងហើយម្តងទៀត រហូតដល់មានការផ្ទុះអាវុធទ្រង់ទ្រាយធំរយៈពេល៥ថ្ងៃ៥យប់ពីថ្ងៃទី២៤ដល់ថ្ងៃទី២៨ខែកក្កដា ដែលសម្លាប់ទាហានរាប់សិបនាក់ទាំងសងខាងនិង បណ្តាលឲ្យមានជនភៀសសឹករាប់សែននាក់ទាំងសងខាង។

ខណៈសាលក្រមរបស់តុលាការធម្មនុញ្ញក្នុងសំណុំរឿងចោទប្រកាន់ប្រឆាំងនាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ គ្រោងប្រកាសជាផ្លូវការនៅម៉ោង៣រសៀលថ្ងៃសុក្រនេះ មានការវាយតម្លៃមួយចំនួនបានអះអាងថា លោកស្រីផែថងថាន ស៊ីណាវ៉ាត្រ មានភាគរយខ្ពស់អាចរួចផុតពីការចោទប្រកាន់ទម្លាក់អំណាចនេះ បើមិនដូច្នោះទេ វិបត្តិនយោបាយរបស់ប្រទេសថៃអាចនឹងអូសបន្លាយពេលវេលាយូរបន្ថែមទៀត។

ទោះបីជាមានការសម្រេចតាមរយៈសាលក្រមនៅថ្ងៃនេះ មានការវិភាគខ្លះថា ដំណោះស្រាយនយោបាយរបស់ប្រទេសបានរកឃើញរួចទៅហើយ នៅពេលដែលតុលាការព្រហ្មទណ្ឌរបស់ថៃបានទម្លាក់ការចោទប្រកាន់ប្រឆាំងលោកថាក់ស៊ីណាវ៉ាត្រក្នុងសំណុំរឿងប្រមាថមហាក្សត្រ កាលថ្ងៃទី២២ខែសីហា ដែលជាការបើកផ្លូវឲ្យមានកំណែទម្រង់នយោបាយដ៏ធំនៅក្នុងប្រទេសថៃ។

ការកែទម្រង់នយោបាយនៅថៃគឺ ការកែទម្រង់ស្ថាប័នមហាក្សត្រថៃតែម្តង ដែលមជ្ឈដ្ឋានអ្នកវិភាគមើលឃើញថា ស្ថាប័នស្តេចថៃបានប្រើប្រាស់ឥទ្ធិពលនិងអំណាចដើម្បីបំបិទសិទ្ធិនយោបាយរបស់អ្នកនយោបាយប្រជាធិបតេយ្យដែលកើតចេញពីការបោះឆ្នោត។

ចាប់តាំងពីឆ្នាំ២០០៦មក ក្រោយទម្លាក់លោកថាក់ស៊ីនចេញពីអំណាចដោយការធ្វើរដ្ឋប្រហារ តុលាការធម្មនុញ្ញថៃដែលស្ថិតនៅក្រោមអំណាចយោធា បានរំលាយគណបក្សរហូតដល់៣៦ ក្រោមហេតុផលប៉ះពាល់ដល់ព្រះមហាក្សត្រថៃ និង ការរំលោភអំណាចជាដើម៕

រ៉ាន់ រើយ