កងកម្លាំងថៃ បាញ់គ្នារង្គើព្រៃជាមួយឈ្មួញគ្រឿងញៀន នៅខេត្តជាប់ព្រំដែន មីយ៉ាន់ម៉ា

កាលពីរាត្រីថ្ងៃចន្ទទី៨ខែកញ្ញាឆ្នាំ២០២៥ មានការបាញ់តដៃគ្នាយ៉ាងខ្លាំងរវាងកងកម្លាំងថៃនិងក្រុមជួញដូរគ្រឿងញៀន នៅក្នុងព្រៃខេត្ត ឈៀងរ៉ៃ ជាប់ព្រំដែនមីយ៉ាន់ម៉ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod, ការបាញ់គ្នារង្គើព្រៃនេះមានរយៈពេល៥នាទី កើតឡើងនាវេលាម៉ោង៩យប់ ក្នុងតំបន់ Ban Pha Mi Pass នៃឃុំ Wiang Pang Kham ស្រុក Mae Sai។

អាវុធបានផ្ទុះឡើងនៅពេលឈ្មួញគ្រឿងញៀនមួយក្រុមមានគ្នាពី៨-១០នាក់ បានប្រទះជាមួយកងល្បាតថៃ ហើយក៏បើកការបាញ់ប្រហារ រួចក៏មានការបាញ់តដៃគ្នាតែម្តង។ ទោះបីជាយ៉ាងណាក៏ដោយ គ្មាននរណាម្នាក់ត្រូវរបួសទេក្នុងការប្រយុទ្ធគ្នានេះ។

លុះមកដល់ព្រឹកថ្ងៃអង្គារ កងកម្លាំងថៃ បានរកឃើញគ្រឿងញៀនចំនួន១០បាវ ដែលក្នុងមួយបាវមានថ្នាំមេតំហ្វេតាមីនប្រមាណ ២០០ ០០០គ្រាប់។

ការប្រយុទ្ធគ្នារវាងកងកម្លាំងថៃជាមួយក្រុមជួញដូរគ្រឿងញៀន នៅព្រំដែនមីយ៉ាន់ម៉ា មិនមែនជារឿងថ្មីឡើយ។ ហេតុការណ៍ចុងក្រោយបំផុត គឺកើតឡើងកាលពីថ្ងៃទី១៤ខែសីហា នៅពេលកងទ័ពថៃនិងឈ្មួញគ្រឿងញៀនមីយ៉ាន់ម៉ា បានបើកឆាកប្រយុទ្ធគ្នាយ៉ាងខ្លាំងក្លានៅតំបន់ត្រីកោណមាស ដោយជាលទ្ធផល ទាហានថៃរឹបអូសបានថ្នាំមេតំហ្វេតាមីនជិត ៣លានគ្រាប់។

ការប្រយុទ្ធគ្នានោះកើតឡើងនៅចំណុចឃុំកោះឆាង នៃស្រុក ម៉ែសៃ ខេត្តឈៀងរ៉ៃដដែលនេះ កាលពីថ្ងៃពុធទី១៣ខែសីហាឆ្នាំ២០២៥ ពេលដែលក្រុមជួញដូរគ្រឿងញៀន ជិះទូកឆ្លងទន្ល Ruak ចេញពីតំបន់ Tachilek នៃប្រទេសមីយ៉ាន់ម៉ា ចូលដីថៃរួចក៏ជួបនឹងទាហានកំពុងល្បាត។

ក្រោយការបាញ់តដៃដ៏ក្តៅគគុកប្រមាណ៥នាទី ឈ្មួញគ្រឿងញៀនដែលមានគ្នា៤នាក់ ក៏ដកថយទៅមីយ៉ាន់ម៉ាវិញ ដោយបន្សល់ទុកថ្នាំមេតំហ្វេតាមីន ២ ៨០០ ០០០គ្រាប់ឲ្យទាហានថៃរឹបអូសយក៕

អត្ថបទ៖ សុខ សុវណ្ណ

ចុចអាន៖ កងទ័ពថៃ បើកឆាកប្រយុទ្ធជាមួយក្រុមជួញដូរគ្រឿងញៀនមីយ៉ាន់ម៉ា នៅតំបន់ត្រីកោណមាស