ម៉ាឡេស៊ី ត្រៀមដាក់ពង្រាយកងកម្លាំងលើសមុន ដើម្បីពង្រឹងសន្តិសុខសម្រាប់កិច្ចប្រជុំកំពូលអាស៊ាន

ប្រទេសម៉ាឡេស៊ី បានប្រកាសថា ខ្លួនត្រៀមរួចរាល់ហើយដើម្បីដាក់ពង្រាយកងកម្លាំងបន្ថែមទៀត ដើម្បីពង្រឹងសន្តិសុខសម្រាប់កិច្ចប្រជុំកំពូលអាស៊ាន នៅចុងខែនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំបូងឡើយរដ្ឋាភិបាលទីក្រុងគូឡាឡាំពួ បញ្ជាក់ពីការដាក់ពង្រាយ ប៉ូលិសចំនួន ១០ ៤៩២នាក់និងមន្ត្រីមកពីនាយកដ្ឋានអន្តោប្រវេសន៍៣ ០០០នាក់ ដើម្បីពង្រឹងសន្តិសុខកម្រិតខ្ពស់ និងជួយសម្រួលដល់ដំណើរការចេញ-ចូល នៅតាមព្រំដែន ក្នុងអំឡុងកិច្ចប្រជុំកំពូលនេះ។

យ៉ាងណា បើតាមការផ្សាយរបស់ Bernama នៅថ្ងៃសុក្រទី៣ខែតុលាឆ្នាំ២០២៥ នាយកនៃនាយកដ្ឋានសន្តិសុខផ្ទៃក្នុងនិងសណ្តាប់ធ្នាប់សាធារណៈ (JKDNKA) លោក Datuk Seri Azmi Abu Kassim បាននិយាយថា កងកម្លាំងត្រៀមរួចរាល់ហើយសម្រាប់ការដាក់ពង្រាយបន្ថែម ខណៈកំពុងមានការវាយតម្លៃជាបន្តបន្ទាប់ លើស្ថានភាពសន្តិសុខជាតិ ចាប់ពីពេលនេះការរហូតដល់សន្និសីទអន្តរជាតិនៅចុងខែតុលា។ 

លោក Azmi អះអាងថា «ដោយសារមេដឹកនាំរដ្ឋចំនួន៣៤ រួមទាំងប្រធានាធិបតីសហរដ្ឋអាមេរិក ដូណាល់ ត្រាំ ផងដែរនឹងមកចូលរួមកិច្ចប្រជុំនោះ ដូច្នេះទំនួលខុសត្រូវគឺស្ថិតនៅលើប៉ូលិស ជាពិសេស JKDNKA ដែលត្រូវយកចិត្តទុកដាក់ទាំងស្រុងលើសន្តិសុខ និងសណ្តាប់ធ្នាប់សាធារណៈគ្រប់ផ្នែក។ យើងនឹងពង្រាយកម្លាំងមិនតិចជាង ១០ ៤០០នាក់ឡើយ ដើម្បីធានាថា កិច្ចប្រជុំកំពូលអាស៊ានដំណើរការដោយជោគជ័យ»។

សូមជម្រាបជាថ្មី កិច្ចប្រជុំកំពូលអាស៊ានលើកទី៤៧ ក្នុង​ទីក្រុងគូឡាឡាំពួ នឹងប្រព្រឹត្តទៅនៅថ្ងៃទី២៦-២៨ ខែតុលា​។ យោងតាមនាយករដ្ឋមន្ត្រីម៉ាឡេស៊ី Anwar Ibrahim, ក្រៅពីលោក ត្រាំ មេដឹកនាំពិភពលោកធំៗចំនួន៣រូបទៀត ក៏នឹងមកចូលរួមក្នុងផងដែរ ក្នុងនោះមានដូចជាប្រធានាធិបតីចិន Xi Jinping, ប្រធានាធីបតីប្រេស៊ីល Luiz Inácio Lula da Silva និងប្រធានាធិបតីអាហ្វ្រិកខាងត្បូង Cyril Ramaphosa៕

អត្ថបទ៖ សុខ សុវណ្ណ

ចុចអាន៖ ម៉ាឡេស៊ី ដាក់ពង្រាយប៉ូលិសនិងមន្ត្រីអន្តោប្រវេសន៍ជាង ១៣ ០០០នាក់ អំឡុងកិច្ចប្រជុំអាស៊ាន