ម៉ាឡេស៊ី ដាក់ពង្រាយប៉ូលិសនិងមន្ត្រីអន្តោប្រវេសន៍ជាង ១៣ ០០០នាក់ អំឡុងកិច្ចប្រជុំអាស៊ាន

ប្រទេសម៉ាឡេស៊ី បានប្រកាសពីការដាក់ពង្រាយ ប៉ូលិសចំនួន ១០ ៤៩២នាក់និងមន្ត្រីមកពីនាយកដ្ឋានអន្តោប្រវេសន៍៣ ០០០នាក់ ដើម្បីពង្រឹងសន្តិសុខកម្រិតខ្ពស់ និងជួយសម្រួលដល់ដំណើរការចេញ-ចូល នៅតាមព្រំដែន ក្នុងអំឡុងកិច្ចប្រជុំកំពូលអាស៊ាន លើកទី៤៧នៅទីក្រុងគូឡាឡាំពួ នាខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Bernama នៅថ្ងៃអង្គារទី៣០ខែកញ្ញាឆ្នាំ២០២៥, រដ្ឋមន្ត្រីក្រសួងមហាផ្ទៃម៉ាឡេស៊ីលោក Datuk Seri Saifuddin Nasution Ismail បានឲ្យដឹងថា «គ្រប់យ៉ាងត្រៀមរួចរាល់អស់ហើយ។ ដើម្បីធានាបាននូវការសម្របសម្រួលដោយរលូនសម្រាប់គណៈប្រតិភូនិងមេដឹកនាំពិភពលោកដែលចូលរួមក្នុងព្រឹត្តិការណ៍ដ៏ធំនេះ យើងក៏បានរៀបចំនិងកំណត់ច្រកចូលសំខាន់ៗ និងចំណុចចូលផ្លូវលឿនផងដែរ»។

លោកអះអាងថា ការត្រៀមរៀបចំសម្រាប់ព្រឹត្តិការណ៍អន្តរជាតិនេះ កំពុងដំណើរការយ៉ាងល្អនៅក្នុងរាជធានី ព្រោះនឹងមានវត្តមានរបស់មេដឹកនាំពិភពលោកជាច្រើន រួមទាំងប្រធានាធិបតីសហរដ្ឋអាមេរិក ដូណាល់ ត្រាំ ផងដែរ។

បើយោងតាមនាយករដ្ឋមន្ត្រីម៉ាឡេស៊ី Anwar Ibrahim, ក្រៅពីលោក ត្រាំ មេដឹកនាំពិភពលោកធំៗចំនួន៣រូបទៀត ក៏នឹងមកចូលរួមក្នុងកិច្ចប្រជុំអាស៊ានផងដែរ ក្នុងនោះមានដូចជាប្រធានាធិបតីចិន Xi Jinping, ប្រធានាធីបតីប្រេស៊ីល Luiz Inácio Lula da Silva និងប្រធានាធិបតីអាហ្វ្រិកខាងត្បូង Cyril Ramaphosa។

ការ​ចូលរួម​របស់​លោក ត្រាំ នឹង​ក្លាយ​ជា​វត្តមាន​លើក​ដំបូង​នា​រយៈពេល​១០​ឆ្នាំ​​កន្លង​មក​នេះ សម្រាប់​ប្រធានាធិបតី​សហរដ្ឋ​អាមេរិក​​ក្នុង​កិច្ច​ប្រជុំ​​​អាស៊ាននៅ​ទីក្រុងគូឡាឡាំពួ គិត​ចាប់តាំងពី​ពេល​លោក បារ៉ាក់ អូបាម៉ា បានចូលរួម​ក្នុង​ឆ្នាំ​២០១៥​មក​ម៉្លេះ៕

អត្ថបទ៖ សុខ សុវណ្ណ

ចុចអាន៖ ត្រាំ នឹងចូលរួមកិច្ច​ប្រជុំអាស៊ាន​លើក​ទី​៤៧ នៅ​ម៉ាឡេស៊ី