សុខភាព

របបអាហារមានជាតិបាស ជួយកាត់បន្ថយ បញ្ហារលាក និងជំងឺផ្សេងៗ

បានផុស

៥ years មុន

នៅ

ថ្ងៃពុធ ២៩ ធ្នូ ២០២១

ដោយ

អាហារផ្ទុកជាតិបាស ជួយរក្សាកម្រិត pH ក្នុងរាងកាយរបស់យើងឲ្យនៅត្រឹមត្រូវល្អ កាត់បន្ថយការកើនឡើងនៃជាតិអាស៊ីដ និងជួយជំរុញកម្រិតថាមពលដល់រាងកាយ ដែលការណ៍នេះជួយឲ្យរាងកាយយើងមានសុខភាពល្អ។

ក្នុងឈាមរបស់យើងមានជាតិបាស ហើយក្នុងក្រពះរបស់យើងមានជាតិអាស៊ីដខ្ពស់ ដូចនេះ ការញ៉ាំអាហារមានជាតិបាសនឹងជួយរក្សាកម្រិត pH របស់បាសឲ្យមានតុល្យភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. បាស និងអាស៊ីដ

កម្រិត pH ត្រូវគេកំណត់ពី ០ ទៅ១៤ បើសិនជា pH ទាបជាង ៧មានន័យថាជាអាស៊ីដ ហើយបើ pH ធំជាង៧គេថាជាបាស និងបើសិនជា pH ស្មើនឹង ៧ នោះគេហៅថាណឺត។

ការមានតុល្យភាពរវាងអាស៊ីដ និងបាសក្នុងរាងកាយគឺជារឿងសំខាន់សម្រាប់សុខភាព។ ដំណើរការរបស់រាងកាយយើងមួយចំនួនពឹងផ្អែកទៅលើតែបាស ឬអាស៊ីដ តែប៉ុណ្ណោះ។ ឧទាហរណ៍ដូចជា ស្បែក ក្រពះ ប្លោកនោម តំបន់ប្រដាប់ភេទ គឺមានអាស៊ីដខ្ពស់ ព្រោះអាស៊ីដអាចការពារសរីរាង្គទាំងនោះពីការបង្ករោគផ្សេងៗ។ ដូចគ្នាដែរ សរីរាង្គផ្សេងទៀត និងកោសិកាផង ត្រូវការជាតិបាសទៅវិញ។

ដោយសារតែអង់ហ្ស៊ីម និងប្រតិកម្មគីមីក្នុងរាងកាយមួយចំនួនត្រូវការកម្រិត pH ជាក់លាក់ នោះបើសិនជាមានការប្រែប្រួលកម្រិត pH ណាមួយកើតឡើងអាចនឹងប៉ះពាល់ដល់ដំណើរការរបស់រាងកាយ។ ជាធម្មតា រាងកាយយើងត្រូវការ pH ក្នុងកម្រិត ៧,៤។

២. អត្ថប្រយោជន៍របបអាហារមានជាតិបាស

អាហារបែបលោកខាងលិចមួយចំនួនពេលញ៉ាំទៅធ្វើឲ្យរាងកាយរបស់យើងឡើងជាតិអាស៊ីដ ព្រោះតែអាហារទាំងនោះមានខ្លាញ់មិនល្អ ប្រូតេអ៊ីនច្រើនពេក មិនសូវមានកាកសរសៃ និងមានជាតិស្ករច្រើនជាដើម។ នៅពេលរាងកាយមានអាស៊ីដច្រើនពេក អាចធ្វើឲ្យការរលាកកើតឡើង និងបង្កើនហានិភ័យកើតជំងឺផ្សេងៗជាច្រើនទៀត។ អាហារសម្បូរជាតិអាស៊ីដមានដូចជាអាហារកែច្នៃ កាហ្វេអ៊ីន ស្ករ និងប្រូតេអ៊ីនពីសាច់សត្វជាដើម។

ចំណែកអាហារដែលមានជាតិបាសវិញ ជួយរក្សាតុល្យភាពកម្រិត pH ដែលអាចជួយកាត់បន្ថយជាតិអាស៊ីដក្នុងរាងកាយ។ ដូចនេះហើយ របបអាហារមានជាតិបាស នឹងជួយកាត់បន្ថយការរលាកដែលអាចប៉ះពាល់ដល់ខួរក្បាល ស្បែក ពោះវៀន និងសាច់ដុំ ជាដើម។