អ្នកវិទ្យាសាស្ត្ររកឃើញវិធី ធ្វើឲ្យមនុស្សមានអាយុវែង

អ្នកវិទ្យាសាស្ត្រមកពីសាកលវិទ្យាល័យ Copenhagen បានធ្វើការសិក្សាលើមនុស្សចាស់ជប៉ុនអាយុលើស ១០០ ឆ្នាំ ១៧៦ នាក់ ហើយរកឃើញល្បាយបាក់តេរីនិងវីរុស ដែលអាចផ្ដល់អត្ថប្រយោជន៍ដល់មីក្រូជីវសាស្ត្រក្នុងពោះវៀនរបស់ពួកគាត់ ។

ទោះបីគេមិនអាចផ្លាស់ប្ដូរកត្តាហ្សែនរបស់មនុស្សមែន ប៉ុន្តែអ្នកស្រាវជ្រាវអាចផ្លាស់ប្ដូរមីក្រូជីវសាស្ត្ររបស់យើងបាន ដើម្បីដាក់បញ្ចូលល្បាយនោះទៅក្នុងពោះវៀន ។

លោក Joachim Johansen អ្នកដឹកនាំការសិក្សានេះ មានប្រសាសន៍ថា “យើងតែងតែព្យាយាមស្វែងរកមូលហេតុធ្វើឲ្យមនុស្សមានអាយុវែង ។ ការស្រាវជ្រាវមុនៗបានបង្ហាញថា បាក់តេរីក្នុងពោះវៀនរបស់មនុស្សចាស់ជនជាតិជប៉ុនអាចផលិតម៉ូលេគុលថ្មីដែលធន់នឹងមេរោគ នោះប្រហែលជាហេតុផលដែលធ្វើឱ្យពួកគាត់មានអាយុវែងជាងគេ” ។

ទន្ទឹមនេះដែរ ក្រុម​សិក្សាខាងលើ​បាន​បង្កើត​នូវ​ក្បួន​ដោះស្រាយ​មួយ​ ដើម្បីដឹងពីទីតាំងបាក់តេរីពោះវៀន និងបាក់តេរីវីរុសរបស់មនុស្សចាស់អាយុលើស ១០០ ឆ្នាំ ហើយយកលទ្ធផលទៅប្រៀបធៀបនឹងក្រុមមនុស្សពេញវ័យដែលមានអាយុចាប់ពី ១៨ ទៅ ៦០ ឆ្នាំ ។

លោក Johansen រៀបរាប់ថា “ក្រុមការងារបានរកឃើញភាពចម្រុះជីវសាស្ត្រដ៏អស្ចារ្យ ពីបាក់តេរី និងបាក់តេរីវីរុសនៅក្នុងមនុស្សចាស់វ័យជាង ១០០ ឆ្នាំ ។ ភាពចម្រុះនៃអតិសុខុមប្រាណខ្ពស់ ជាធម្មតាត្រូវបានផ្សារភ្ជាប់ជាមួយនឹងមីក្រូជីវសាស្ត្រពោះវៀនដែលមានសុខភាពល្អ ។ ហើយយើងរំពឹងថាមនុស្សដែលមានមីក្រូជីវសាស្ត្រពោះវៀនមានសុខភាពល្អ នឹងត្រូវបានការពារប្រសើរជាងមុនពីជំងឺមនុស្សចាស់” Johansen និយាយ ។

ដូច្នេះព័ត៌មានខាងលើអាចប្រើសម្រាប់បង្កើនអាយុមនុស្ស ដោយវិស្វកម្មមីក្រូជីវសាស្ត្រ ធ្វើឲ្យមានតុល្យភាពល្អនៃមេរោគ និងបាក់តេរី ដើម្បីការពារប្រឆាំងនឹងជំងឺផ្សេងៗបានយ៉ាងមានប្រសិទ្ធភាព ៕

ប្រែសម្រួល ៖ វារី

ប្រភព ៖ Dailymail

ចុចអាន ៖ អ្នកជំនាញ ជប៉ុន ថា បើចង់បានអាយុវែង នៅឲ្យឆ្ងាយពីអាហារ ៥ មុខ