មកដឹងការងារមួយចំនួនធ្វើឲ្យស្ត្រី ប្រឈមមុខនឹងជំងឺមហារីកក្រពេញអូវែ

ការសិក្សាថ្មីមួយបានបង្ហាញថា ជាងកាត់សក់ អ្នកកែសម្ផស្ស និងគណនេយ្យករ អាចប្រឈមមុខនឹងជំងឺមហារីកក្រពេញអូវែយ៉ាងខ្ពស់ គួរឲ្យព្រួយបារម្ភ ។

បើយោងតាមការសិក្សាថ្មីដែលចេញផ្សាយដោយទស្សនាវដ្ដី “វេជ្ជសាស្ត្រការងារ និងបរិស្ថាន” បានឲ្យដឹងថា ក្រៅពីការងារមួយចំនួនខាងលើ, អ្នកធ្វើការនៅក្នុងផ្នែកលក់សម្លៀកបំពាក់ និងឧស្សាហកម្មសំណង់ក៏អាចមានហានិភ័យខ្ពស់កើតជំងឺមួយនេះផងដែរ ។

ទន្ទឹមនោះ ក្រុមស្រាវជ្រាវដែលដឹកនាំដោយអ្នកសិក្សានៅសាកលវិទ្យាល័យ Montreal ក្នុងប្រទេសកាណាដា ក៏ធ្វើការប្រៀបធៀបលើស្ត្រី ៤៩១ នាក់ ដែលមានជំងឺមហារីកអូវែ ជាមួយស្ត្រី ៨៩៧ នាក់ដែលមិនមានជំងឺផងដែរ ហើយជាលទ្ធផល ស្ត្រីធ្វើការផ្នែកគណនេយ្យរយៈពេល ១០ ឆ្នាំ មានឱកាសកើតជំងឺមហារីកក្រពេញអូវែទ្វេដង ខណៈស្ត្រីធ្វើការសំណង់អាចកើតជំងឺមហារីកក្រពេញអូវែ ៣ ដង ។

ចំណែកឯជំនួយការក្នុងហាងទំនិញ និងអ្នកធ្វើការផ្នែកលក់ មានហានិភ័យកើនឡើង ៤៥ ភាគរយ ខណៈអ្នកកាត់ដេរកើនឡើងហានិភ័យដល់ទៅ ៨៥ ភាគរយឯណោះ ។

ពាក់ព័ន្ធនឹងបញ្ហាខាងលើ អ្នកស្រាវជ្រាវនិយាយថា “ស្ត្រីដែលកើតមានជំងឺនេះទំនងជាប៉ះពាល់ជាមួយសារធាតុមួយចំនួនរួមមាន កម្ទេចកម្ទី ឬម្សៅប្រើក្នុងគ្រឿងសម្អាង, អាម៉ូញាក់, អ៊ីដ្រូសែន-ផេរ៉ូស៊ីត, ធូលីសក់, សរសៃសំយោគ, សរសៃប៉ូលីអេស្ទ័រ, សារធាតុពណ៌សរីរាង្គ, សារធាតុពណ៌ និងសារធាតុផ្សេងៗជាដើម” ។

យ៉ាងណាអ្នកសិក្សាបានសង្កត់ធ្ងន់ថា ការសន្និដ្ឋានមានកម្រិតនៅឡើយ ដូច្នេះពួកគេអំពាវនាវឲ្យធ្វើការស្រាវជ្រាវបន្ថែមទៀតពីការងារផ្សេងៗ ៕

ប្រែសម្រួល៖ វារី

ប្រភព៖ newssky

ចុចអាន៖ គ្រូពេទ្យណែនាំស្ត្រីឲ្យកាត់បំពង់ផាឡូប ដើម្បីការពារជំងឺមហារីកក្រពេញអូវែ