ទារិកាអាយុ ៣ ខែ កើតមិនគ្រប់ខែ មានជំងឺបេះដូង សរសៃបេះដូង ៣ មុខ ត្រូវបានមន្ទីរពេទ្យគន្ធបុប្ផាភ្នំពេញ សង្គ្រោះជោគជ័យ

ទារិកា​តូច អាយុ ៣ ខែ មកពី​ខេត្ត​ស្វាយរៀង កើត​មិន​គ្រប់​ខែ មាន​ជំងឺ​បេះដូង និង​សរសៃ​បេះដូង​ដល់​ទៅ ៣ មុខ នាំ​ឲ្យ​ពិបាក​ដក​ដង្ហើម ព្រមទាំង​មាន​សន្ទះ​បេះដូង​ចំហ​ទៀត (VSD) ត្រូវ​បាន​មន្ទីរពេទ្យ​គន្ធបុប្ផា​ភ្នំពេញ ជួយ​សង្គ្រោះ​ជោគជ័យ។

នៅ​ថ្ងៃ​ទី ២២ ខែ​កញ្ញា ឆ្នាំ ២០២៣ នេះ ដោយ​យោង​តាមរយៈ​ផេក​ហ្វេសប៊ុក​ផ្លូវការ Dr. Beat Richner បាន​ឲ្យ​ដឹង​ថា ទារិកា​តូច ទើប​អាយុ​បាន ៣ ខែ មកពី​ខេត្ត​ស្វាយរៀង កើត​មិន​គ្រប់​ខែ មាន​ជំងឺ​បេះដូង​ស្មុគស្មាញ​ពី​កំណើត​-​មាន​សរសៃឈាម​សួត​បេះដូង​ស្តាំ​ត្បៀត​តូច​ខាងស្ដាំ (main-right pulmonary artery hopoplasia), សរសៃឈាម​សួត​ឆ្វេង​ដុះ​បែក​ចេញពី​សរសៃ​បេះដូង​ឆ្វេង (left hemi-truncus) និង​មាន​សរសៃ​កង​អា​ទែ​រ​ធំ នៃ​បេះដូង​ឆ្វេង រុំ​រឹត​បំពង់ខ្យល់ និង​បំពង់​បាយ នាំ​ឲ្យ​ពិបាក​ដក​ដង្ហើម (double aortic arches and vascular ring) ព្រមទាំង​មាន​សន្ទះ​បេះដូង​ចំហ​ទៀត (VSD) នាង​ត្រូវ​បាន​ក្រុម​គ្រូពេទ្យ​ឯកទេស​វះកាត់​បេះដូង​កម្ពុជា នៅ​មន្ទីរពេទ្យ​គន្ធបុប្ផា​ភ្នំពេញ ជួយ​សង្គ្រោះ ដោយ​ធ្វើការ​វះកាត់​ភ្ជិត​ប្រហោង​បេះដូង កាត់ត​តម្រូវ​សរសៃ​បេះដូង​ឡើងវិញ បាន​ដោយ​ជោគជ័យ។

ផេក​ហ្វេសប៊ុក​ដដែល​បញ្ជាក់​ថា នេះ​ជា​ករណី​ដ៏​កម្រ​បំផុត ដែល​កូនង៉ែត​នេះ​មាន​ជំងឺ​បេះដូង និង​សរសៃ​បេះដូង​ដល់​ទៅ ៣ មុខ។ ថ្ងៃនេះ កូនង៉ែត​ខាងលើ បាន​ធូរស្បើយ​ដោយ​ស្នាមញញឹម​ជាមួយ​ឪពុកម្ដាយ​នាង។

ជាមួយ​គ្នា​នេះ មន្ទីរពេទ្យ​គន្ធបុប្ផា ក៏បាន​អរគុណ​មូលនិធិ​គន្ធបុប្ផា​ស្វីស និង​មូលនិធិ​គន្ធបុប្ផា​កម្ពុជា ព្រមទាំង​សប្បុរសជន​គ្រប់ៗ រូប ដែល​តែងតែ​គាំទ្រ​ដល់​ដំណើរការ​មន្ទីរពេទ្យ​គន្ធបុប្ផា​ផង​ដែរ។

សូម​បញ្ជាក់​ថា រាល់​ការ​ព្យាបាល​ជំងឺ​ទាំងអស់ គឺ ឥតគិតថ្លៃ​សម្រាប់​គ្រប់ៗ គ្នា ដោយ​គ្មាន​ការ​រើសអើង​ចំពោះ​បុគ្គល​ណា​ម្នាក់​ឡើយ៕

អត្ថបទ ៖ ពិសី