ក្រសួងកិច្ចការនារី ធ្វើយុទ្ធនាការ Fit For Hope ២០២៤ ដើម្បីឱ្យមហាជនយល់ដឹងច្រើនពីជំងឺមហារីកសុដន់ ជាពិសេសស្ត្រី

នៅថ្ងៃទី២ ខែកញ្ញា ឆ្នាំ២០២៤ ក្រសួងកិច្ចការនារី និងក្រុមហ៊ុនដៃគូ បានរៀបចំពីធីបើកយុទ្ធនាការលើកកម្ពស់ការយល់ដឹងអំពីជំងឺមហារីកសុដន់ Fit For Hope ២០២៤ ដើម្បីផ្សព្វផ្សាយពីជំងឺមហារីកនេះដល់មហាជនបានទូលំទូលាយ ជាពិសេសគឺស្រ្តីតែម្តង ក្នុងការយល់ដឹងខ្ពស់ពីមហារីកនេះ។ នេះបើតាមការផ្សព្វផ្សាយរបស់ក្រសួងកិច្ចការនារី នៅថ្ងៃទី២ ខែកញ្ញា។

ពិធីបើកនេះ មានការចូលរួមក្រោមអធីបតីភាពដ៏ខ្ពង់ខ្ពស់របស់លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ឧត្តមភរិយានាយករដ្ឋមន្ត្រីកម្ពុជា ដែលបញ្ជាក់ពីការយកចិត្តទុកដាក់ គិតគូរ និងគាំទ្រយ៉ាងពេញទំហឹងក្នុងការលើកកម្ពស់សុខុមាលភាពសង្គម ជាពិសេសសុខុមាលភាពរបស់ស្រ្តី និងក្មេងស្រី ឱ្យចៀសឆ្ងាយពីគ្រោះថ្នាក់នានាដែលបណ្តាលមកពីជំងឺមិនឆ្លង ដូចជាជំងឺមហារីកសុដន់ជាដើម។

តាមក្រសួងបានឱ្យដឹងថា យុទ្ធនាការ Fit For Hope ២០២៤ ធ្វើឡើងក្រោមប្រធានបទ “លើកកម្ពស់ការយល់ដឹងអំពីជំងឺមហារីកសុដន់” មានគោលបំណងលើកកម្ពស់ការយល់ដឹងពីជំងឺមហារីកសុដន់ ដល់សាធារណជន ជាពិសេសស្ត្រីខ្លួនឯង ដើម្បីទទួលបាននូវចំណេះដឹងគ្រប់ជ្រុងជ្រោយ។ បន្ថែមពីនេះ យុទ្ធនាការនេះ លើទឹកចិត្តឱ្យស្រ្តីមានភាពរឹងមាំ និងក្លាហាន ហើយកាត់បន្ថយភាពអៀនខ្មាស ចេះពីរបៀបពិនិត្យរករោគសញ្ញាដោយខ្លួនឯងឱ្យបានទៀតទាត់ និងទៅទទួលបានការពិនិត្យ និងផ្តល់រោគវិនិច្ឆ័យពីគ្រូពេទ្យជំនាញបានទាន់ពេលវេលា ព្រមទាំងទទួលបានឱកាសអំណោយផលក្នុងការព្យាបាលឲ្យជាសះស្បើយ ជាផ្នែកជួយសង្គ្រោះជីវិតខ្លួនផងដែរ។

ក្នុងពិធីបើកយុទ្ធនាការនេះ មានការចូលរួមពីថ្នាក់ដឹកនាំ និងមន្រ្តីក្រសួង និងមន្ទីរកិច្ចការនារី រាជធានី ខេត្ត ដៃគូជាតិ មកពីក្រសួង ស្ថាប័នពាក់ព័ន្ធ ក្រុមប្រឹក្សា អភិបាលរងរាជធានី ខេត្ត ដៃគូអភិវឌ្ឍន៍អន្តរជាតិ វិស័យឯកជន និងសង្គមស៊ីវិល យុវជន និសិ្សត សរុបចំនួន ៦៥០ នាក់ ក្នុងនោះមាន ស្រ្តី ៥៥០ នាក់ និងតាមប្រព័ន្ធអនឡាញសរុបចំនួន ៨៧៩ នាក់។

តាមការស្រាវជ្រាវរោកសញ្ញានៃជំងឺមហារីកសុដន់ គឺដុំ​មួយ ឬ​ច្រើន​នៅក្នុង​សុដន់ ទំហំ​តូច​ឬ​ធំ​គែម​ជុំវិញ ដុំ​មិន​ច្បាស់លាស់ រឆេងរឆូង​មិនអាច​រំកិល​បានជា​ប់​ស្អិត​ជាមួយ​សាច់ដុំ​, ស្បែក​សុដន់​រាង​ដូច​សំបក​ក្រូច​, ក្បាលសុដន់​ផត​ចូលក្នុង, ​សុដន់​ប្រែប្រួល​ទំហំ​ខុសធម្មតា​ខ្លាំង​, ចេញ​ទឹកដោះ​លាយ​ឈាម​, មាន​កូនកណ្តុរ​នៅក្រោម​ក្លៀក​ និងសញ្ញា​ផ្សេងៗ​ទៀត​។ ដូចនេះ ប្រសិនមានការសង្ស័យ និងដើម្បីសុវត្ថិភាព គួរទៅពិគ្រោះជាមួយគ្រូពេទ្យដើម្បីរកវិធីសាស្ត្រព្យាបាល ឬរកវិធីសាស្ត្រដែលអាចពិនិត្យរោគសញ្ញាដោយខ្លួនឯងបាន៕